कर्णालीमा मुख्यमन्त्री शर्माले विश्वासको मत लिए सत्ता गठबन्धन के होला ?

A+ A A-

कर्णालीका मुख्यमन्त्री राजकुमार शर्माले आज प्रदेशसभाबाट विश्वासको मत लिँदै छन् ।

प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डले एमालेका लागि मुख्यमन्त्री छोड्न दिएको निर्देशनविपरीत मुख्यमन्त्री शर्माले विश्वासको मत लिन लागेका हुन् । तर, प्रधानमन्त्री प्रचण्डले मुख्यमन्त्रीबाट राजीनामा दिन र एमालेको नेतृत्वमा नयाँ सरकार बनाउन शर्मालाई दबाब दिइरहेका छन् ।

अन्तिम समयसम्म आफ्नो अडानमा कायमै रहेर मुख्यमन्त्री शर्माले प्रदेशसभाबाट विश्वासको मत लिए प्रदेशदेखि केन्द्रसम्मको नयाँ सत्ता गठबन्धनमा खटपट आउन सक्ने देखिन्छ । मुख्यमन्त्री शर्माले एमालेसहित दलको विश्वासको मत लिने गरी छलफल गरिरहेका छन् । एमालेले विश्वासको मत नदिने अवस्था आउन सक्ने भन्दै विश्वासको मतका लागि मुख्यमन्त्री शर्माले कांग्रेसलाई पनि फकाइरहेका छन् ।

कांग्रेसले विश्वासको मत दिए मुख्यमन्त्रीमा शर्माको निरन्तरता हुनेछ । अध्यक्ष प्रचण्डको निर्देशनलाई अटेर गरेर मुख्यमन्त्री शर्माले प्रदेशसभाबाट विश्वासको मत लिए एमाले फेरि प्रतिपक्षी बन्ने सम्भावना हुन्छ । कर्णालीको विश्वासको मतबाट केन्द्रसम्मको गठबन्धनलाई असर गर्नेछ । त्यसैले पनि प्रधानमन्त्री प्रचण्डले कर्णाली प्रदेशको समस्या समाधान गर्न कर्णालीका पूर्वमुख्यमन्त्री महेन्द्रबहादुर शाहीलाई सुर्खेत पठाएका छन् । तर, कांग्रेसले विश्वासको मत दिन सक्ने भएकाले मुख्यमन्त्री शर्माले आफ्नो निर्णयबाट पछि नहट्ने संकेत दिएका छन् ।

केन्द्रमा प्रधानमन्त्री प्रचण्ड र एमाले अध्यक्ष केपी शर्मा ओलीबीच भएको सहमति अनुसार माओवादी केन्द्रले कर्णाली एमालेका लागि छोड्नुपर्ने हुन्छ । तर, केन्द्रमा भएको सहमतिविपरीत शर्माले मंगलबार दिउँसो प्रदेशसभाबाट विश्वासको मत लिए केन्द्र गठबन्धनमा भुइँचालो जानेछ ।

कर्णालीमा एमालेलाई माओवादी केन्द्रले मुख्यमन्त्री नछोडे केन्द्र र अन्य प्रदेशमा पनि समस्या आउने एमालेका एक केन्द्रीय सदस्यले बताए । ‘अहिले कर्णाली चक्रब्युहमा फसेको छ । विश्वासको मत दिँदा पनि समस्या, नदिँदा पनि समस्या हुने देखिएको छ । माओवादीका मुख्यमन्त्री शर्मा आफ्नो अडानबाट पछि हटेनन् र विश्वासको मत लिए भने त्यसको असर केन्द्रको गठबन्धनमा पनि स्वाभाविक रूपमा पर्छ,' उनले शिलापत्रसँग भने ।

यो पनि :

शर्माद्वयले प्रचण्ड-ओलीको निर्णय च्यालेन्ज गर्ने तयारी गरेपछि उत्कर्षमा कर्णालीको सत्ता संघर्ष, कांग्रेसले के गर्ला ?