प्रचण्डको निर्देशन नटेर्ने मुडमा कर्णालीका मुख्यमन्त्री शर्माः भन्छन्- विश्वासको मत लिन्छौँ, अरु कुरा थाहा छैन

प्रचण्डको निर्देशन नटेर्ने मुडमा कर्णालीका मुख्यमन्त्री शर्माः भन्छन्- विश्वासको मत लिन्छौँ, अरु कुरा थाहा छैन

A+ A A-

कर्णाली प्रदेशका मुख्यमन्त्री राजकुमार शर्माले विश्वासको मत लिने भएका छन् ।

केन्द्रमा सत्ता गठबन्धनमा फेरिएसँग कर्णाली प्रदेश सरकारको नेतृत्व नेकपा एमालेले पाउने सहमति भएको बताइएको छ । उक्त सहमतिपछि आज विश्वासको मत लिने तयारीमा रहेका शर्मालाई प्रधानमन्त्रीसमेत रहेका माओवादी केन्द्रका अध्यक्ष पुष्पकमल दाहाल प्रचण्डले एमालेका लागि मार्ग प्रशस्त गर्न भनेका छन् ।

केन्द्रको सहमतिअनुसार माओवादीले बागमती र लुम्बिनी प्रदेश सरकारको नेतृत्व लिने सहमति भएको छ । कर्णालीमा पहिला पनि एमालेसँग आलोपालो सरकारको नेतृत्व गर्ने सहमति भएको र त्यही सहमतिअनुसार अहिले सरकारको नेतृत्व माओवादीले गर्ने तयारी गरेको माओवादीका नेताहरू बताउँछन् ।

मुख्यमन्त्री शर्माले मंगलबारको प्रदेशसभा बैठकमा विश्वासको मत लिने कार्यसूची छ । सोही कार्यसूचीअनुसार आफूले विश्वासको मत लिने शर्माले बताए । ‘आज हामी विश्वासको मत लिन्छौँ । पहिला नै तय भएको भएर आज विश्वासको मत लिन्छौँ । अरु कुरा हामीलाई थाहा छैन,’ मुख्यमन्त्री शर्माले शिलापत्रसँग भने ।

केन्द्रमा सत्ता समीकरण फेरिएपछि फागुन २२ मा कांग्रेसले मुख्यमन्त्री शर्मालाई दिएको समर्थन फिर्ता लिएको थियो । त्यसपछि एमाले र माओवादीको गठबन्धन बन्ने भएको थियो । तर, कसको भागमा कुन प्रदेश पर्ने निश्चित नभएकाले एमाले प्रदेश सरकारमा सामेल भएको छैन ।

आज मुख्यमन्त्री शर्माले विश्वासको मत लिन तयारी गरेपछि सोमबार प्रचण्डले विश्वासको मत नलिएर एमालेलाई मुख्यमन्त्री दिन निर्देशन दिएका थिए । तर, शर्माले भने आज विश्वासको मत लिने र पहिला भएको सम्झौताअनुसार नै अगाडि बढ्ने बताए ।

भागवण्डाअनुसार नभएर पहिलाको कार्यसूचीअनुसार मुख्यमन्त्री शर्माले विश्वासको मत लिने तयारी गरेका छन् ।

दुवै दलसँग मत माग्ने तयारी

शर्मा भने कांग्रेस र एमाले दुवै दलबाट विश्वासको मत लिने गृहकार्यमा छन् । एमालेले विश्वासको मत नदिए कांग्रेसलाई त्यसमा सहमत गराउने उनको तयारी छ । एमालेले विश्वासको मत नदिने अवस्था आउन सक्ने आकलन गरेका शर्माले कांग्रेससँग निरन्तर छलफल गरेको माओवादीका एक कर्णालीका सांसद बताउँछन् ।

‘एमालेले नै विश्वासको मत दिन्छ । यदि यस्तो भएन भने विकल्पमा पनि छलफल जारी रहेको छ । विश्वासको मत लिन्छौँ,’ ती सांसदले भने । पछिल्लो समय प्रचण्ड र जनार्दन शर्माबीचको आन्तरिक द्वन्द्वको प्रभाव कर्णाली सरकारमा परेको छ । प्रचण्डले शर्मालाई भूमिका दिएका छैनन् । त्यसको बदलता शर्माले कर्णालीमा केन्द्रको निर्णयलाई चुनौती दिने तयारी गरेका छन् । मुख्यमन्त्री शर्मा नातामा जनार्दनका भाइ पर्छन् ।

प्रचण्डले जनार्दनका भाइलाई मुख्यमन्त्रीबाट हटाएर त्यसको सट्टा लुम्बिनीमा आफूनिकट नेतालाई मुख्यमन्त्री बनाउन चाहेका हुन् । तर, कर्णालीमा ठूलो दल माओवादी भएकाले अहिले नै सरकार छोड्न नहुने माओवादीका केही नेताहरूको धारणा पनि छ । शर्माले पनि पदाधिकारी बैठकमा कर्णाली सरकारको नेतृत्व एमालेलाई छोड्न नहुने धारणा राखेका थिए ।

माओवादीको विधान अधिवेशनमा जनार्दनले केन्द्रदेखि वडासम्म नेतृत्व मतदानबाट चयन हुनुपर्ने प्रस्ताव राखेका थिए । त्यसबाट प्रचण्ड-जनार्दनको सम्बन्ध झन् चिसिएको थियो । प्रदेशसभाको पहिलो कार्यकालमा पनि एमाले नेता यामलाल कँडेलले मुख्यमन्त्री हुन धेरै कसरत गरे पनि सफल भएका थिएनन् । आज शर्माले विश्वासको मत पाए सत्ता गठबन्धनमा नयाँ तरंग आउने छ ।

प्रकाशित मिति: मंगलबार, चैत २०, २०८० ०७:५४