तपस्वी दाबी गर्ने रामबहादुर बम्जनमाथि हत्यादेखि आनी बेपत्ता पारेकाे सम्मका आराेप

तपस्वी दाबी गर्ने रामबहादुर बम्जनमाथि हत्यादेखि आनी बेपत्ता पारेकाे सम्मका आराेप

A+ A A-

यौनशोषण तथा हत्याआरोपी रामबहादुर बम्जनलाई पक्राउ गर्न प्रहरी अन्ततः मंगलबार सफल भएको छ । पटकपटक प्रहरीलाई चक्मा दिएर टाउको दुखाइ बनेका उनी आफूलाई तपस्वी भएको दाबी गर्थे ।

उनी चर्चामा कसरी आए भन्ने विषय भने निकै रोचक र अपत्यारिलो छ । मध्य तराईको बाराको एकान्त वनमा एक ठूलो पीपलको बोटमुनि ध्यान गरिरहेका कलिला रामबहादुर बम्जनले सन् २००५ मा एकाएक चर्चा बटुलेका थिए । त्यतिबेला १६ वर्षीय बम्जनले बारास्थित एक जङ्गलमा ध्यान गर्न सुरु गरेका थिए ।

ध्यानमा रहेका बेला उनी सेतो पातलो कपडामा थिए भने आँखा बन्द थियो । यसरी ध्यानमै बसेपछि उनी एकाएक चर्चामा आएका थिए । उनको चर्चा अन्तर्राष्ट्रियस्तरसम्मै भयो ।

उनी ध्यानमा बसेको स्थानमा स्थानीयवासी मात्र होइन, बाहिरबाट तीर्थयात्रीहरू पनि आउन थाले । यसै बेला उनी ध्यानमा बसेको एक तस्वीर विश्वचर्चित नै बन्न पुग्यो । यसरी बौद्ध धर्मावलम्बीका उनी एक पूज्य व्यक्ति नै बन्न पुगे । तर, उनको उपासनामा रहेका भक्तजन नै यौनशोषणको सिकार बनेको र हत्या भएको चर्चाले उनी लुकेर हिँड्नुपर्ने अवस्था आयो । उनका आश्रममा आनीहरूमाथि यौनशोषण भएको र उनीहरूको हत्या भएको आरोप छ । उनको आश्रमबाट केही व्यक्तिहरू बेपत्ता भएका समाचाहरू आएपछि उनी आबद्ध संस्था, बोधी श्रवण धर्म संघले एक विज्ञप्ति निकाल्दै त्यसको खण्डन गरेको थियो ।

बम्जन आबद्ध धार्मिक संस्थाको वेबसाइट मैत्रीय डट इन्फोमा उपलब्ध जानकारीअनुसार उनको जन्म सन् १९९० को अप्रिल १० तारिखमा रतनपुर, बारामा भएको थियो । उनका मातापिता किसान थिए । उनकी आमाको १२ वर्षको उमेरमा विवाह भएको थियो । उनका ५ छोरा र ४ छोरी छन् । रामबहादुर तेस्रो छोरा हुन् ।

उनले कलिलो उमेरमै ध्यानमा मग्न भएर सबैलाई आश्चर्यचकित बनाएको चर्चा चल्ने गर्छ । उनका अनुयायीहरूले बम्जन ६ महिनासम्म पानीसमेत नपिएर ध्यानमा लीन भइसकेको र बुद्धत्व प्राप्त नहुँदासम्म उनी ध्यानमै रहने बताएका थिए । गौतम बुद्धको आमाको नाम मायादेवीसँग बम्जनकी आमाको नाम पनि मिलेका कारण स्थानीयहरूले उनले गरेको तपस्यालाई गौतम बुद्धसँग जोडेर हेरेका थिए ।

त्यसो त तपस्या सुरु गर्नुअघि नै उनले आफ्नो परिवारका अन्य सदस्यलाई पशुबलि नदिन, माछा मासु र रक्सी सेवन नगर्न आग्रह गर्ने गरेको पनि बताइन्छ । तपस्या गर्ने क्रममा उनी बीचबीचमा हराउने र केही समयपछि फेला पर्ने क्रम चलिनै रह्यो । १६ वर्षको उमेरमा तपस्या गर्न सुरु गरेका बम्जन पहिलोपटक १० महिना लामो ध्यान बसेकै बेला अचानक गायब भएका थिए ।

अनुयायीहरूले बिस्तारै बम्जन ध्यानमा बसेको क्षेत्रलाई लुङ्ता छोर्तेनजस्ता धार्मिक ध्वजापताकाले सुसज्जित गरेपछि उक्त स्थान बिस्तारै धार्मिकस्थलमा परिणत हुँदै गएको थियो । नेपालमा मात्र नभएर विश्वव्यापी रूपमै चर्चा बटुल्न सफल उनको कर्मले यति चर्चा पायो कि उनले निकै कम समयमा सामान्य बुद्धभक्तबाट चर्चित तपस्वीको भेष धारण गरे ।

देशका विभिन्न ठाउँहरूमा आश्रम खोले र नेपालभित्र र बाहिर आफ्ना अनुयायीहरूको सङ्ख्या समेत क्रमिक रूपमा बढाउँदै लगे । त्यसै कारण उनले भित्रभित्रै असीमित शक्ति आर्जन गर्न थालेको बताइन्छ ।

बाराको रतनपुरी गाउँनजिकैको वनबाट तपस्या सुरु गरेका बम्जनले पछिल्लो दशकमा मुलुकको विभिन्न ठाउँमा आश्रम बनाउँदै आफ्नो वासस्थानसमेत फेरिरहने गरेको पाइएको छ ।

बाराबाहेक सिन्धुपाल्चोक, लमजुङ र सर्लाही जिल्लामा समेत उनको आश्रम रहेको प्रहरीले जनाएको छ ।

आरोपहरू के छन् ?

बम्जनले सञ्चालन गरेको आश्रमबाट अनुयायीहरू बेपत्ता भएको विवरण सार्वजनिक भएसँगै उनीमाथि विभिन्न किसिमका आरोप लाग्न सुरु भएको छ ।

हेटौँडास्थित प्रहरी कार्यालयमा फुलमाया रूम्बा र कर्म वाइबालगायतका अनुयायी बम्जनको आश्रमबाटै हराएको भनेर उजुरी परेको थियो । प्रहरी समक्ष उजुरी दिनेमा फुलमाया रूम्बाका भाइ विजय रूम्बा र सञ्चलाल वाइबाका छोरा महेन्द्र वाइबा थिए ।

त्यस्तै, बाराका हस्तबहादुर आले मगर र नुवाकोटकी गंगामाया तामाङले पनि हराइरहेका आफन्तको खोजी गरिदिन सम्बन्धित जिल्लाका प्रहरी कार्यालयमा उजुरी दिएका थिए ।

२०७२ सालको भूकम्पअघि नै सिन्धुपाल्चोकस्थित आश्रममा गएका पिता कर्म वाइबाले आश्रमबाट फर्कन्छु भनेर फोन गरे पनि नफर्किएको र त्यसको एक महिनापछि हेटौँडास्थित प्रहरी कार्यालयमा उजुरी दिएको उनका छोरा महेन्द्र वाइबाले बताएका थिए ।

बारा जिल्लामै केही स्थानीयहरूमाथि हातपात गरेको विवरण आएपछि सन् २०१० मा बम्जनमाथि प्रहरीले अनुसन्धान सुरु गरेको थियो । सन् २०१२ मा फेरि सोही कारण देखाउँदै करिब तीन महिना दुई जना विदेशी महिलालाई बन्धक बनाएपछि उनी चर्चामा आएका थिए ।

यसै वर्षको भदौ महिनामा ललितपुरस्थित एक सामुदायिक रेडियो कार्यालयमा १८ वर्षीय गंगामाया तामाङले पत्रकार सम्मेलन गर्दै बम्जनले आफूमाथि बलात्कार गरेको आरोप लगाएकी थिइन् । त्यसपछि बम्जनविरुद्ध थप आरोपहरू लागेका र प्रहरीमा उजुरीहरू परेका थिए ।

सम्बन्धित समाचार:

रामबहादुर बम्जनको आश्रममा सीआईबीकाे छापा
आश्रममा भेटिएनन् बम्जन, कुकुरको सहयोग लिँदै प्रहरी
बम्जनलाई पक्राउ गर्न सर्लाही प्रहरीको टोली सिन्धुलीमा
सिन्धुलीमा देखापरे बम्जन
बम्जनले बेपत्ता पारेका अनुयायीबारे प्रमाण खोज्दै प्रहरी
बम्जनविरुद्ध सीआईबीको तेस्राे अप्रेसन, पछिल्लो १३ घन्टा पनि निरर्थक
तीन आनीलाई बलात्कार गरी बेपत्ता पारेकाे मुद्दा लागेका बम्जन अझै फरार
गेरु वस्त्रभित्रको यौन अपराध: टुल्कु जेल पुगे, सिद्धबाबा र बम्जनमाथि के हाेला ?

प्रकाशित मिति: मंगलबार, पुस २४, २०८० २१:३१