बम्जनविरुद्ध सीआईबीको तेस्राे अप्रेसन, पछिल्लो १३ घन्टा पनि निरर्थक

A+ A A-

हत्या र बलात्कार आरोपमा पक्राउ पुर्जी जारी भएका लिटिल बुद्ध भनेर चिनिएका रामबहादुर बम्जनको आश्रममा प्रहरीले पटक–पटक छापा मार्दा पनि पक्राउ गर्न सकेकाे छैन ।

बिहीबार सिन्धुलीको कमलामाई नगरपालिका– ८, पैरेस्थित बम्जनको आश्रम सिल गरेर छापा मार्दा पनि पक्राउ गर्न सकेन । सिन्धुलीको उनको यो आश्रममा प्रहरीले दास्रो पटक छापा मारेको हो भने समग्रमा बम्जनमाथिकाे याे चाैथाे अप्रेसन हाे ।

यसअघि ४ माघमा पनि प्रहरीले छापा मारेको थियो । उसो त यसअघि बम्जनको सिन्धुपाल्चोक आश्रममा पनि प्रहरीले छापा मारेको थियो । तर, उनले प्रहरीको पटक पटकको प्रयास पनि असफल पार्दै आएका छन् ।

यसअघि प्रहरीको केन्द्रीय अनुसन्धान ब्यूरो (सीआईबी)कै टाेलीले उनकाे सिन्धुपाल्चाेकस्थित आश्रममा पनि खानतलासी लिएकाे थियाे । त्यसलगत्तै जिल्ला प्रहरी कार्यालय सिन्धुपाल्चाेकले पनि छापा मारेकाे थियाे । सिन्धुपाल्चाेक प्रहरीले उनकाे आश्रमबाट शव गलाउन प्रयाेग गरिएका नुनका ढिकाहरू फेला पारेकाे थियाे ।

उनीमाथि सर्लाहीकी रिता बोट, नुवाकोटकी कर्मा तामाङ र मकवानपुरकी फुलमाया तामाङको हत्या गरेको अभियोग छ । त्यसरी नै आश्रममा आउने अनुयायीमाथि बलात्कार गरेको आरोप पनि छ ।

उनीमाथि सर्लाही अदालतले पक्राउ पुर्जी जारी गरेको छ । बिहीबार सिन्धुलीकाे आश्रममै रहेको सूचनाका आधारमा सीआईबीको टोलीले छापा मारेको हो ।

प्रहरीले उनको आश्रम सिल गरेर २ वटा तालिमप्राप्त कुकुरसमेत प्रयोग गरेको थियो । त्यस्तै, प्रहरीको विशेष कार्यदलबाट स्पेसल टास्क फोर्स (एसटीएफ) को टोलीसमेत गएको थियो ।

तर, उनी आश्रममा नभेटिएको सीआईबीका प्रमुख डीआईजी सहकुल थापाले जानकारी दिए । ‘हाम्रो टोली त्यही आश्रममा रहेको विशेष सूचनाका आधारमा सिन्धुली पुगेको हो । तर, लामो अप्रेसनमा पनि बम्जन भेटिएनन्,’डीआईजी थापाले भने ।

सिन्धुलीको ठूलो जंगलको बीचमा उनको आश्रम र बीचमा नदीसमेत भएका कारण उनी त्यही जंगलमा भागेको अनुमान प्रहरीको छ । सीआईबीका अनुसार बम्जनको आश्रममा राति १ बजेदेखि दिउँसोको करिब ३ बजेसम्म सर्च अप्रेसन चलाएको थियो । तरु, अन्ततः सीआईबी र एसटीएफको टोली रित्तो हात फर्किएको छ ।

प्रकाशित मिति: बिहीबार, असार ४, २०७७ १७:३४