गेरु वस्त्रभित्रको यौन अपराध: टुल्कु जेल पुगे, सिद्धबाबा र बम्जनमाथि के हाेला ?

गेरु वस्त्रभित्रको यौन अपराध: टुल्कु जेल पुगे, सिद्धबाबा र बम्जनमाथि के हाेला ?

A+ A A-

भारतीय धर्मगुरुहरूमाथि विभिन्न जघन्य अपराधका मुद्दा लाग्नु नौलो हुन छाडेको छ । विभिन्न समयमा धर्म र आश्रमको नाममा बालबालिकामाथि बलात्कार र हत्या गरेको अभियोगका समाचार सार्वजनिक हुँदै आएका छन् । तर, धर्मगुरुमाथि लाग्ने बलात्कार र हत्या अभियोग अब भारतमा मात्र सीमित रहेन । नेपालका धर्मगुरुमाथिसमेत बलात्कार र हत्याजस्ता जघन्य अपराधका मुद्दा एकपछि अर्को लाग्दै आएको छ । पछिल्लो समय बलात्कार आरोप लागेका कृष्णबहादुर गिरी उर्फ ‘सिद्धबाबा’ चर्चामा छन् ।

उनीमाथि तीन वर्षअघि आफ्नै एक जना महिला अनुयायीलाई बलात्कार गरेको अभियोग लागेको थियो । हाल सिद्धबाबा अदालती मुद्दा झेलिरहेका छन् । सोही प्रकरणमा उनी पुर्पक्षका लागि जेल चलान नै भएका थिए । २२ मंसिर २०७७ मा भने सिद्धबाबालाई जिल्ला अदालत सुनसरीले सफाइ दिएपछि उनी जेलमुक्त भए ।

तर, उच्च अदालत विरानगरले जिल्ला अदालतको फैसला त्रुटिपूर्ण रहेको ठहर्‍याउँदै फेरि ३ जेठ ०७९ मा पुनः सुरुदेखि सुनुवाइ गर्न जिल्ला अदालत सुनसरी नै फर्काइदिएको छ । हाल मुद्दा विचाराधीन अवस्थामै छ । जिल्ला अदालतले पीडितको तर्फबाट लड्ने सरकारी वकिलको बहस नै नसुनी सिद्धबाबा पक्षको एकतर्फी सुनुवाइको भरमा उनले सफाइ पाएका थिए । अदालती प्रक्रिया जारी रहेकै अवस्थामा सिद्धबाबा विभिन्न धार्मिक कार्यक्रममा सक्रिय छन् ।

२ साउनदेखि १० सम्म पशुपतिनाथ क्षेत्रमा चलेको अतिरुद्र महायज्ञमा सरिक भएका सिद्धबाबाको आशीर्वाद लिन मन्त्रीदेखि उनीविरुद्ध वकालत गर्ने प्रमुख महान्यायाधिवक्ता खम्मबहादुर खातीसमेत पुगेका थिए । यसरी गेरु वस्त्रधारीको अपराधको घटना यो एउटा मात्रै होइन ।

लिटिल बुद्ध भनेर चिनिएका ‘तपस्वी’ रामबहादुर बम्जनलाई पक्राउ गर्न यतिखेर प्रहरीलाई नै हम्मेहम्मे परेको छ । उनीमाथि पनि सिद्धबाबा प्रकरणजस्तै २० साउन २०७३ मा आफ्नै आश्रममा आएकी आनीलाई प्रलोभनमा पारेर यौनशोषण र बलात्कारपछि बेपत्ता पारेको आरोप छ ।

सोही उजुरी प्रहरीहुँदै जिल्ला अदालत सर्लाहीमा पुगेको छ । प्रहरीले बम्जनलाई पक्राउ गर्न पटक–पटक उनको आश्रममा छापा नै मारेको थियो । तर, पक्राउ पर्नबाट भने जोगिँदै आएका छन् ।

पछिल्लोपटक प्रहरीको केन्द्रीय अनुसन्धान ब्युरो (सीआईबी) को टोलीले सिन्धुलीको कमलामाई नगरपालिका– ८, पैरेनीस्थित २० रोपनीभन्दा बढी जंगल अतिक्रमण गरेर बसेका बम्जनको आश्रममा तालिमप्राप्त कुकुरसहित हतियार नै लिएर पुगेको थियो ।

बम्जनमाथि सर्लाहीकी रिता बोट, नुवाकोटकी कर्मा तामाङ र मकवानपुरकी फुलमाया तामाङलाई यौनशोषणपछि बेपत्ता पारेको अभियोग छ । सरकारी वकिलको कार्यालय सर्लाहीले उनीविरुद्ध बालबालिकासम्बन्धी ऐन, २०७६ अनुसार १४ वर्ष जेल सजायको माग राखेर प्रहरीले प्रतिवेदन पेस गरेको थियो ।

प्रहरी प्रवक्ता डीआईजी टेकप्रसाद राईले धर्मको नाममा अनुचित फाइदा उठाउन खोज्ने कथित् धर्मगुरुमाथि प्रहरीले कुनै कसुर बाँकी नराखेर अनुसन्धान थाल्ने बताए । ‘हाम्रो समाज धार्मिक छ । धर्मगुरुको इच्छा पूरा गर्दा पुण्य हुन्छ भन्ने अन्धविश्वास अझै छ । त्यसैको फाइदा उठाउँदै धर्मको नाममा अपराध कर्म गरेका छन् । अपराध गर्दा धर्मसँग सम्बन्धित हुँदैन, अपराध कसुरमा पक्राउ पर्ने हुन् । प्रहरी त्यसमा चनाखो नै छ,’ डीआईजी राईले भने ।

जो कारावास पुगे

सिद्धबाबा र बम्जनको मुद्दा किनारा लाग्न बाँकी छ । तर, उनीहरूमाथि लागेको आरोपको प्रकृति जघन्य अपराध हो । यसअघि गुम्बामा उपचारका लागि आएकी युवतीको बलात्कार गरेको अभियोगमा दक्षिणकालीस्थित गुम्बाका धर्मगुरु टुल्कु लामालाई भने अदालतले दोषी ठहर गरेर जेल पठाएको थियो ।

आफूलाई औतारी लामा भएको दाबी गर्ने उनीमाथि दक्षिणकालीको आफ्नै गुम्बामा एक महिलामाथि लामो समयसम्म यौन शोषण गरेको अभियोग लागेको थियो । सोही मुद्दामा उनलाई उच्च अदालत पाटनले सात वर्ष कैदको सजाय सुनाएको थियो । उनीमाथि झारफुक र उपचारको बहानामा अरू महिलामाथि पनि यौन शोषण गरेको उजुरी प्रहरीमा परेको थियो । उनीमाथि अदालतले डर-त्रासमा पारेर, झुक्याएर अनुचित प्रभावमा पारी गुम्बाभित्र पीडितलाई यौनदासीको रूपमा राखेको ठहर गरेको थियो ।

पीडितलाई ३० लाख क्षतिपूर्ति दिने फैसला पनि अदालतले सुनाएको थियो । पीडितले लामाले आफूलाई तन्त्र र झारफुक गरी उपचार गर्ने भन्दै २०६६ सालमा पहिलोपटक बलात्कार गरेको र त्यसपछि २०७३ सालसम्म शारीरिक र मानसिक यातना दिएको भन्दै जाहेरी दिएकी थिइन् । हाल भने उनी जेलजीवन भोगिरहेका छन् । त्योबाहेक अर्का धर्मगुरु स्वामी श्रीनिवासाचार्यले समेत धर्मको आडमा अर्को अपराध कर्म रोजे । उनले आफैँलाई गोली हान्न लगाएर चर्चामा आएका थिए ।

२५ चैत ०७५ मा विराटनगरको जेतुवामा रहेको रामजानकी मन्दिरमा उनीमाथि भएको गोली प्रहारको घटनाको अनुसन्धानका क्रममा उनी आफैँले भाडाका अपराधीलाई आफूमाथि गोली हान्न लगाएको खुलेपछि प्रहरीले पक्राउ गरेको थियो । उनी धर्मको आडमा राजतन्त्र र हिन्दु राज्यको चर्को वकालत गर्दै आएका थिए । सोही आन्दोलन चर्काउन उनले आफैँलाई गोली हान्न लगाएको खुलेपछि २४ वैशाख २०७६ मा पक्राउ परेर जेल पुगेका थिए । हाल उनी जेलमुक्त भइसकेका छन् ।

प्रकाशित मिति: बिहीबार, साउन १२, २०७९ १४:०६