तीन आनीलाई बलात्कार गरी बेपत्ता पारेकाे मुद्दा लागेका बम्जन अझै फरार

A+ A A-

लिटिल बुद्ध भनेर चिनिएका तपस्वी रामबहादुर बम्जनमाथि आफ्नै आश्रमकी आनीलाई बलात्कारपछि बेपत्ता पारेको आरोप लाग्यो । पीडित परिवार उनीबिरुद्ध मुद्दा लिएर जिल्ला अदालत सर्लाही पुगे । अदालतले हाजिर हुन दिएको म्याद नाघे पनि तपस्वी बम्जन अझै सम्पर्कमा आएका छैनन् ।

बम्जनमाथि भन्दै जिल्ला अदालत सर्लाहीमा मुद्दा दायर भएको थियो । बम्जनलाई पक्राउ गर्न यसअघि सर्लाही प्रहरी, केन्द्रीय अनुसन्धान ब्युरो (सीआईबी) सिन्धुली प्रहरी र सिन्धुपाल्चोक प्रहरीले तीव्र खोजी गरे पनि पक्राउ गर्न सकेको थिएन । पक्राउ गर्न नसकेपछि २१ असारमा उनबिरुद्धको मुद्दा सिधै अदालत पुगेको थियो । तर, पाँच महिनासम्म पनि बम्जन अदालत समेत हाजिर हुन नआएको सर्लाही अदालतका बैतनिक वकिल नरेशकुमार चौधरीले बताए ।

बम्जन सिन्धुलीको कमलामाई नगरपालिका– ८, पैरेनीस्थित आश्रममा बस्दै आएको अनुमान प्रहरीको छ । तर, उनको आश्रममा पटक–पटक प्रहरीले छापा मारे पनि पक्राउ गर्न भने उनलाई फेला पार्न सकेको छैन । उनी अझै पनि त्यही आश्रममा रहेको प्रहरीको अनुमान छ । प्रहरीले उनको सिन्धुपाल्चोक आश्रमबाट शव गलाउन प्रयोग गरिएका नुनका ढिकाहरू फेला पारेको थियो ।

बम्जनमाथि सर्लाहीकी रीता बोट, नुवाकोटकी कर्मा तामाङ र मकवानपुरकी फूलमाया तामाङलाई यौनशोषणपछि बेपत्ता पारेको अभियोग छ । सर्लाही अदालतले गत माघमै पहिलो पटक बम्जनविरुद्ध पक्राउ पुर्जी जारी गरेको थियो । तर उनी पक्राउ पर्नबाट भने जोगिदै आएका छन् ।

पक्राउ नपरे पनि प्रहरीको अनुसन्धान प्रतिवेदनको आधारमा जिल्ला सरकारी वकिलको कार्यालय सर्लाहीले बम्जनविरुद्ध असारमा बालबालिकासम्बन्धी ऐन, २०७६ अनुसार कारबाहीको माग गर्दै मुद्दा दायर गरेको थियो । जसमा बम्जनसहित तीन जनालाई प्रतिवादी बनाइएको जिल्ला न्यायाधिवक्ता केशवप्रसाद गौतमले जानकारी दिए ।

तर, अदालतमै मुद्दा अगाडी बढे पनि उनी हाजिर हुन गएका छैनन् । मुद्दा अगाडी बढेर हाजिर हुन दिइएको म्याद समेत सकिएको अधिवक्ता चौधरी बताउँछन् । ‘बम्जनको मुद्दाको फाइल अगाडी बढिसकेको छ । उनलाई अदालतमा उपस्थित हुन पहिलो पटक ३० दिनको म्याद दिइएको थियो । तर, उपस्थित भएका छैनन्,’ चौधरीले भने ।
बम्जन अदालत हाजिर नभए पनि मुद्दाको प्रक्रिया भने नरोकिने अदालतस्रोतले बताएको छ । बम्जनलाई १४ वर्ष र उनलाई सघाएको आरोप लागेका ज्ञानबहादुर बम्जन तथा जितबहादुर तामाङलाई त्यसको आधा सजायँको माग दाबी गरिएको छ ।

बम्जनमाथि २०७३ साउन २० मा आश्रममै आएकी आनीलाई प्रलोभनमा पारेर यौनशोषण र बलात्कार गरेको आरोप लागेको थियो । उनीमाथि त्यसको ३ वर्षपछि मात्रै पहिलो पटक सर्लाहीमा किटानी जाहेरी परेको थियो ।

प्रकाशित मिति: मंगलबार, कात्तिक २५, २०७७ १२:२०