बाढीपीडितको तीन महिनादेखि स्कुलमा बास

A+ A A-

असारमा आएको भारी वर्षाका कारण घरबार विहीन भएका नागरिक अहिलेसम्म घर फर्कन सकेका छैनन् । वर्षाबाट घरबार विहीन भएका पीडितहरु अर्कैको घर र सार्वजनिक स्थलमा आश्रित छन् ।

प्रदेश २ को राजधानी जनकपुरधाम उपमहानगरपालिका–२४ बसहिया कायस्थ टोलका शेलु मण्डल घरबारविहीन भएपछि अहिले नजिकैको स्कुलमा बसोबास गरिरहेकी छिन् । उनी टोलमै रहेको राष्ट्रिय प्राथमिक विद्यालयको एउटा कक्षा कोठामा झण्डै चार महिनादेखि बसिरहेकी छन् ।

शेलु मण्डलको परिवार विद्यालयमै बसेपछि त्यहाँको पठन पाठन समेत प्रभावित भएको छ । ८ जनाको परिवारसहित मण्डलका गाई तथा बाख्रा पनि तीनमहिनादेखि विद्यालय हातामै छन् ।

असार अन्तिम साता आएको भीषण वर्षामा शेलु मण्डलको घर भत्किएपछि उनको परिवार अहिले पनि बिचल्लीमा छ । दिनरात अरुमै काम गरेर परिवार धान्दै आएकी सेलु र उनका पतिले जोगाएको केही पैसाले बाँसको घर बनाएका थिए । तर वर्षामा त्यो घर समेत खसेपछि उनको परिवारमा बज्रपात नै परेको छ ।

घरबार विहीन भएपछि ८ जनाको परिवारसहित तीन महिनादेखि उनको परिवार विद्यालयमै बस्न वाध्य छन् । घरबार विहीन भएको करिब तीन महिना भईसकेपनि यसमा सरोकारवालाको ध्यान जान सकेको छैन ।

उनको परिवार वर्षाबाट पीडित परिवारले राहतको नाममा ५/६ वटा चाउचाउ बाहेक केही पाउन सकेका छैनन् । ‘राहतको नाममा चाउचाउ बाहेक केही पाउन सकेका छैनाै । घर बनाउन पैसा छैन, कहाँ जाने ?,’ शेलुले भनिन् ।

पठनपाठन प्रभावित भइरहेको र भाडा पनि नतिरेकाले विद्यालयबाट निस्किन व्यवस्थापन समितिका अध्यक्ष र समाजबाट समेत दबाब आइरहेको शेलुले बताइन् ।

उनले भनिन्, ‘घर बनाइदिन सहयोगका लागि वडाध्यक्षलाई खोज्दा उनी कहिलै भेट हुँदैनन् । पटकपटक वडाध्यक्षलाई भनेतापनि कुनै प्रकारको सहयोग पाएको छैन ।’

उनको पति सुकेश्वर मण्डल दिनभरी रक्सी पिएरै बस्ने र छोरा अमित मण्डल ग्याँस सिलिण्डर घरघरमा पुर्याउने काम गर्ने गरेकोले उनले कमाएको पैसाले घर खर्चमै सकिदा घर बनाउन नसकेको उनको गुनासो छ ।

‘छोराको पैसाले खान पनि पुग्दैन । कहीलेकाहीँ भोकै सुत्नुपर्छ । फेरी बालबच्चादेखि हामी सबै बेलाबेलामा बिरामी परिरहेका हुन्छौँ,’ सेलुले पीडा सुनाइन् । उनकी बुहारी मिथिलेश देवीकाे काेखमा ६ महिनाकाे गर्भ छ ।

पैसा र ठाउँ अभावले बस्नै गाह्रो परेको उनको परिवारलाई बच्चा कसरी जन्माउने भन्ने चिन्ताले सताएको छ । सहयोेगी हातलाई कुर्दै उनी विद्यालयमा बसिरहेकी छन् ।

प्रकाशित मिति: बिहीबार, असोज १६, २०७६ १३:२१