अमेरिकाको आरोप– उत्तर कोरियाले रुसलाई एक हजार कन्टेनर हतियार दियो

A+ A A-

रुस र युक्रेनबीच एक वर्षयता जारी युद्ध रोकिने कुनै छाँटकाँट देखिएको छैन । रुसी सेनाहरू अझै युक्रेनभित्रै छन् र त्यहाँका विभिन्न स्थानहरूमा युक्रेनको जवाफी आक्रमणविरुद्ध लडिरहेका छन् ।

अमेरिका, बेलायत, जर्मनीजस्ता नेटोमा आवद्ध राष्ट्रहरूले युक्रेनलाई लगातार हतियारहरू सहयोग गरिरहेका छन् । उनीहरूले रुसलाई कुनै देशले कुनै पनि प्रकारको सहयोग गर्न नहुने बताएका छन् ।

यी देशहरूले रुसमाथि आर्थिक प्रतिबन्धहरू लगाएका छन् । यस्तोमा उत्तर कोरियाले रुसलाई हतियारहरू सहयोग गरिरहेको समाचारहरू बाहिरिँदा अमेरिका रुष्ट बनेका छन् ।

केही समयअगाडि मात्र उत्तर कोरियाली सर्वोच्च नेता किम जोङ उन रुस भ्रमणमा पुगेका थिए । त्यसपछि नै यतिबेला उत्तर कोरियाले रुसलाई हजारभन्दा बढी कन्टेनरमा हतियारहरू सहयोग गरेको अमेरिकाले आरोप लगाएको हो ।

अमेरिकी नेसनल सेक्युरिटी काउन्सिलका प्रवक्ता जोन किर्बीले उत्तर कोरियाबाट रुसतर्फ हजारभन्दा बढी कन्टेनरमा हतियार र गोलाबारुद आपूर्ति भएको बताएका छन् । किर्बीका अनुसार समुद्र र रेल हुँदै रुसमा उत्तर कोरियाली हतियारहरू पुगेका छन् ।

युक्रेनसँग लामो समययता युद्ध लडिरहँदा रुसको हतियारहरू सकिँदै गएको बताइएको छ । तर सन् १९५३ देखि युद्ध नगरेको उत्तर कोरियासँग धेरै हतियार भएको बताइन्छ । यस्तोमा गत महिनाको किमको रुस भ्रमणमा हतियार सम्झौता भएको अनुमान छ ।

सो भ्रमणमा रुसी राष्ट्रपति भ्लादिमिर पुटिनले उत्तर कोरियाको भूउपग्रह कार्यक्रममा सहयोग गर्ने वाचा गरेका थिए । उत्तर कोरिया र रुसले भूउपग्रह विकासमा सहकार्य गर्ने भएपछि अमेरिका चिन्तित छ । भूउपग्रह कार्यक्रम र क्षेप्यास्त्र कार्यक्रममा उस्तै प्रविधि प्रयोग हुने भएकाले उनीहरू दुवैले शक्तिशाली हतियार बनाउन सक्नेमा अमेरिकाको चिन्ता हो ।

उत्तर कोरियाले यसवर्ष भूउपग्रह प्रक्षेपणको प्रयास पनि गरेको थियो । तर भूउपग्रह प्रक्षेपण दुवैपल्ट असफल भएको थियो । उत्तर कोरियाका अनुसार उनीहरूको भूउपग्रहले अमेरिका र दक्षिण कोरियाली खतराको सूचना संकलन गर्दछ । भूउपग्रह कार्यक्रममा असफल भएपछि उत्तर कोरियाले रुससँग सहयोग मागेको हो ।