पैसा नतिरेपछि जनप्रतिनिधिका ‘सरकारी कोट’ लिलामीमा

A+ A A-

सिरहाको सनलाइट टेलर्समा र संचालकको फेसबुकमा एक सातादेखि एउटा सूचना छ । जसमा लेखिएको छ– जनप्रतिनिधिका कोट लिलामीमा छ ।
पसलेले कोट महत्त्वपूर्ण भएर लिलामीमा राखेका होइनन् । उनले लिलामीमा राखिएका कोट जनप्रतिनिधिका भएकाले लिलामीमा राखेका हुन् ।

जनप्रतिनिधि सिरहाको कर्जन्हा नगरपालिकाका हुन, जहाँका ५९ जनप्रतिनिधिले नगरपालिकाबाट कोट पाइन्ट सिलाउन १० हजारका दरले रकम बुझे । टेलर्समा गएर कोट पाइन्ट अर्डर गरे । तर, नगरपालिकाले दिएको रकम अन्तै मासिएपछि कोट लिन पसलमा गएनन् ।

लामो सयमसम्म पनि पसलमा कोट पाइन्ट लिन नआएपछि दशैको मुखमा ह्याँगरमा त्यतिकै झण्डाएर राख्नुको सट्टा पसलेले जनप्रतिनिधिका कोट लिलामीमा राखिदिए ।

पसल संचालकका अनुसार जनप्रतिनिधिले कोट पाइन्ट अर्डर गरेको पाँच महिना भयो । ‘पाँच महिनादेखि कोट पाइन्ट ह्यांगरमा त्यत्तिकै झुन्डियो, कोही लिन आएनन्, त्यही भएर लिलामी गर्नुबाहेक अर्को विकल्प भएन,’ पसलका संचालक मण्डलले भने ।

कर्जन्हा नगरपालिकाले ५९ जनप्रतिनिधि र मेयरका चालकलाई सुट किन्न १०–१० हजार बाँडेको थियो । बैंक खातामा निकासा गरिएको रकम जनप्रतिनिधिले अन्तै मासेपछि सुट पाँच महिनादेखि मिर्चैया बजारस्थित सनलाइट टेलरको ह्यांगरमै थन्किएका हुन् ।

दसैँसम्म नआए सस्तो दररेटमा बेच्ने भन्दै टेलरका सञ्चालक मण्डलले सामाजिक सञ्जालमै सुट लिलामीमा राखेका छन् । उनले तत्कालको मूल्य एउटा सुटको ६ हजार तोकेका छन् ।

सुट सिलाउन उधारोमा कपडा दिने गुरुशरण साधुशरण वस्त्रालयका सञ्चालक लक्ष्मण साह भने पैसा फस्ने चिन्तामा छन् । उनका अनुसार नगरपालिकाले ३६ पुरुष जनप्रतिनिधि र मेयरका चालकका लागि कोट, पाइन्ट र सर्टको कपडा तथा २३ महिला जनप्रतिनिधिका लागि कोटको कपडा उधारोमा लगेको छ ।

सुटको कपडा डोनियर ब्रान्डको हो । मेयर गंगा पासवानको वचन हार्न नसकेर उधारो दिएको उनले बताए । कपडा उधारो लिएका मेयर पासवानले सनलाइट टेलरलाई प्रत्येक सुटको ५ हजार र महिलाको कोट सिलाएको ३५ सय ज्याला दिने गरी सिलाइको जिम्मा दिएका थिए ।

तर, सुट तयार गरिएको पाँच महिना बित्दा पनि अधिकांश जनप्रतिनिधि लिन नआएपछि मण्डलले फेसबुकमार्फत लिलामीमा बेच्ने सूचना सार्वजनिक गरेका छन् ।

पसलको ह्यांगरमा झुन्ड्याइएका कोटमा सम्बन्धित जनप्रतिनिधिको नामसहितको ट्याग लगाइएको छ । दसैंसम्म लिन आएनन् भने जति पैसा पाइन्छ, त्यतिमा क्रमशः बेचेर लगानी उठाउने टेलर सञ्चालक मण्डलले बताए ।

पुरुष जनप्रतिनिधिका लागि कोट, पाइन्ट र सर्ट तथा महिला जनप्रतिनिधिका लागि कोट, सारी र ब्लाउज दिने निर्णय गरेर मेयर गंगा पासवानकै अग्रसरतामा गत चैतमा जनप्रतिनिधिको सुटका लागि कपडा खरिद गरिएको थियो ।

त्यतिबेला रकम भने निकासा नगरेकाले मेयरले नै कपडा पसलमा उधारो मिलाएका थिए । ३९ जनप्रतिनिधि र मेयरका चालकले टेलर्समा पुगेर नाप पनि दिए । २० जनाले अझैसम्म नाप दिएका छैनन् । अहिलेसम्म मेयर गंगा पासवान, चालक हरि पासवान, वडा नम्बर ५ का अध्यक्ष भूषण खाती, वडा ८ का अध्यक्ष प्रकाश अधिकारी र वडा ११ का अध्यक्ष कपिल यादवले मात्रै टेलर्सबाट सुट लगेका छन् ।

३५ कोट–पाइन्ट टेलर्समै छन् । वडा ३ का अध्यक्ष कपलेश्वर यादव, वडा ४ का अध्यक्ष टेकबहादुर सिंगार, वडा ९ का अध्यक्ष बहादुर महरा, वडा १० का अध्यक्ष जगदीश साहलगायत ३५ जनाको कोट, पाइन्ट र सर्ट तयारी अवस्थामा छन् ।

सबै जनप्रतिनिधिको पोशाकको रकम भने असारमै व्यक्तिगत खातामा निकासा भइसकेको छ । ५९ जनप्रतिनिधि र एक चालकसहित ६० जनाका लागि ६ लाख निकासा भएको हो । कपडा लिएर कोट सिलाउन नापो दिएका अधिकांश जनप्रतिनिधिले पनि कपडा पसल र टेलर्समा पैसा तिरेर कोट ल्याउने नैतिकता देखाएका छैनन् ।

‘नगर सभामा सहभागी हुँदा एउटै ड्रेस कोड होस् भनेर पुरुषलाई कोट–पाइन्ट र महिलालाई कोट–सारीको योजना ल्याइएको हो । यो नराम्रो होइन । मेरो खातामा पनि १० हजार हालिदिएको छ । तर, कोट सिलाउन पाएको छैन । अब सिलाउने हो,’ उपप्रमुख भन्छिन् ।

कपडा साहु लक्ष्मण साह भने मेयरको वचन हार्न नसकेर कपडा उधारोमा दिएको बताउँछन् । ‘मेयर गंगा पासवानसँग पहिल्यैदेखि मेरो व्यवहार चल्दै आएको छ । उहाँले कपडा दिनुपर्‍याे भनेपछि मैले सुटको डेढ सय मिटरजति कपडा दिएँ । सबै उधारोमै दिएको हो । तर, त्यसको पैसा पाएको छैन । यसबारे मेयरसँग कुरा गरिरहेको छु । धेरै कुरा अहिले नै नबोलौ‌ होला,’ उनले भने ।

नगरपालिकाका प्रमुख प्रशासकीय अधिकृत रामनारायण साह भने कपडाका लागि रकम निकासा भइसकेका कारण अर्को पटक निकासा गर्न नसकिने बताउँछन् । भन्छन, ‘एकपटक पैसा दिएपछि फेरि दिने भन्ने कुरै हुँदैन ।’

टेलर्स संचालकका अनुसार फोन गरेर बोलाउँदा पनि जनप्रतिनिधि कोट लिन आएका छैनन् । जनप्रतिनिधिका कारण कम्तिमा डेढ लाख रुपैयाँ डुब्ने अवस्थामा पुगेकाे उनी बताउँछन् ।

‘अब पनि लिन नआए दसैंमा प्रतिसुट ६ हजारदेखि माथि जति पाइन्छ, त्यतिमा लिलाममा बेच्छु । फेसबुकमा सूचना हालिसकेको छु,’ मण्डलले भने । तर, वडा ११ कि सदस्य रामसतीदेवी सदा भने कोटका लागि पाएको पैसा मासिइसकेको भन्दै नगरपालिकाले पसलबाट ल्याइदिए लगाउने नत्र लिन नजो बताउँछिन् । भन्छिन्, ‘पैसा त अन्तै मासियो, कोट नगरपालिकाले ल्याइदिए लगाउने हो ।’

प्रकाशित मिति: सोमबार, असोज ६, २०७६ ०३:५०