जानकी मन्दिरको पर्खाल भत्काउँदा युवाहरूले गरे विरोध

A+ A A-

सडक विस्तारका लागि भन्दै जनकपुरधामको प्रसिद्ध धार्मिकस्थल जानकी मन्दिरको पर्खाल भत्काइएपछि स्थानीय युवाहरू विरोधमा उत्रेका छन् । एसियाली विकास बैंकको सहयोगमा सञ्चालित एकीकृत शहरी विकास आयोजनाअन्तर्गत सडक विस्तार गर्न मन्दिरको जग्गासमेत प्रयोग भएपछि युवाहरूले विरोध गरेका हुन् ।

जनकपुरधामभित्र अन्य सडकहरू विस्तार भइसके पनि विवादका कारण जानकी मन्दिर पूर्वतर्फको सडक विस्तार हुन सकेको थिएन । सडक विस्तारका लागि मन्दिरको जग्गा प्रयोग गरिए विश्व सम्पदा सूचीमा पर्ने सम्भावना न्यून हुने स्थानीयको भनाइ छ । जनकपुरधाम उपमहानगरपालिकाले मन्दिरको पूर्वतर्फको सडक ९ मिटर फराकिलो बनाउने मापदण्ड निर्धारण गरेको छ । यसअनुसार सडकको दुवैतर्फ ३/३ फिट जग्गा अधिग्रहण गरिएको छ ।

मापदण्डअनुसार सडक निर्माण गर्दा मन्दिरको साविकको जग्गा साँघुरिएको हो । स्थानीय युवाहरूकै विरोधका कारण करिब ३ महिनादेखि त्यहाँ सडक निर्माण हुन सकेको थिएन । तर, अहिले आएर उपमहानगरपालिकाले निर्माण सुरु गरेपछि फेरि विवाद चर्केको हो । धार्मिक, सांस्कृतिक र पूरातात्त्विक महत्त्वको जानकी मन्दिर परिसरको जग्गा कुनै पनि बहानामा अतिक्रमण हुन नदिइने स्थानीय युवा सरोज मिश्र बताउँछन् ।

‘सडकको अर्कोतर्फको जग्गा दिन व्यापारीहरू तयार छन् भने त्यसैतर्फ सडक विस्तार गरियोस्, नभए पुरानै मापदण्डअनुसारको सडक ठीक छ,’ मिश्र भन्छन् । अहिले मन्दिरको पूर्वतर्फको जग्गा मिचिए भोलि चारैतिरको जग्गा मिचिने भन्दै उनी चिन्ता व्यक्त गर्छन् । आफूहरूको मागको सुनुवाइ नभइरहेकाले अब अदालत जाने तयारीमा रहेको उनले बताए ।

मन्दिरको जग्गा मिचेर सडक निर्माण गर्नु जानकी मन्दिरको अस्तित्वमाथि खेलवाडबाहेक अरु केही नहुने युवा अभियानी अमितकुमार पाठक बताउँछन् । राजपाका केन्द्रीय सदस्य रामजी रायले पुरातात्त्विक स्थललाई नगरपालिकाले समाप्त पार्न खोजेको आरोप लगाएका छन । सो स्थलमा स्थानीय होटल व्यवसायी हंसराज र स्थानीयवासीबीच विवाद पनि भएको छ । केही व्यापारीले मन्दिरसँग जग्गा लिई सडक विस्तारको माग गरिरहेका छन् ।

सडक विस्तार गर्ने जानकी मन्दिरको पूर्वतर्फको पर्खाल भत्काएको उपमहानगरपालिकाले मापदण्डअनुसार सडक विस्तार गर्न दुवैतर्फ बराबर जग्गा अधिग्रहण गरिएको जनाएको छ ।

प्रकाशित मिति: शुक्रबार, भदौ २७, २०७६ ००:०५