मस्कोमा पाँचवटा ड्रोन आक्रमण भएपछि रुसले युक्रेनलाई भन्यो आतंकवादी (भिडियो)

मस्कोमा पाँचवटा ड्रोन आक्रमण भएपछि रुसले युक्रेनलाई भन्यो आतंकवादी (भिडियो)

A+ A A-

रुसको राजधानी मस्कोमा मंगलबार बिहानै पाँचवटा ड्रोन आक्रमण भएको त्यहाँको रक्षा मन्त्रालयले जनाएको छ । रुसी रक्षा मन्त्रालयका अनुसार यो ड्रोन हमला युक्रेनले गरेको हो ।

रुसले आफ्नो देशको राजधानीमा ड्रोन हमला गरेर त्यहाँका नागरिकको ज्यान लिन खोजेको भन्दै युक्रेनलाई आतंकवादी पनि भनेको छ । केही समयअगाडि मात्र रुसी राष्ट्रपति भ्लादिमिर पुटिनको सरकारी आवास क्रेमलिन प्यालेसमै ड्रोन आक्रमण भएको थियो ।

सो ड्रोन हमलाको भिडियो सार्वजनिक गर्दै रुसले युक्रेनले रुसी राष्ट्रपति पुटिनको ज्यान लिन खोजेको आरोप लगाएको थियो । भिडियोमा सो ड्रोन हमलालाई असफल बनाइएको देखिएको छ । युक्रेनले त्यसबेला र यसबेला पनि ड्रोन हमलामा आफ्नो हात नभएको बताएको छ । युक्रेनका अनुसार उनीहरू रुसी सेनालाई युक्रेनी भूमिबाट लखेट्न मात्र चाहन्छन्, रुसी भूमिमा गएर आक्रमण गर्न चाहँदैनन् ।

(भिडियो)

रुसका अनुसार मंगलबार बिहान युक्रेनले ड्रोन हमला गर्दा भनुकोभो अन्तर्राष्ट्रिय विमानस्थलका उडानहरू प्रभावित भए । कयौँ अवतरण गर्न तयार विमानलाई डाइभर्ट पनि गरिएको थियो । ड्रोन आक्रमणपछि टर्की, यूएई र इजिप्टबाट रुस आउने विमानलाई केही समय विमान नल्याउन पनि भनिएको रुसले बताएको छ ।

रुसी विदेश मन्त्रालयकी प्रवक्ता मारिया जाखारोभा भन्छिन्, ‘युक्रेनले अन्तर्राष्ट्रिय विमानस्थल र आवासीय क्षेत्रमा आक्रमण गरेर आतंकवादी गतिविधि देखाएको छ ।’

-सीएनएनको सहयोगमा

प्रकाशित मिति: मंगलबार, असार १९, २०८० १६:४१