इन्धन किन्न नसक्दा संसदका गाडी थन्किएः २२ लाख उधारो, पेट्रोल पम्पले इन्धन दिन रोक्यो

इन्धन किन्न नसक्दा संसदका गाडी थन्किएः २२ लाख उधारो, पेट्रोल पम्पले इन्धन दिन रोक्यो

A+ A A-

संघीय संसदका एक कर्मचारी शुक्रबार बिहान ११ बजेसम्म पनि कार्यालयमा आइपुगेनन् । ढिला कार्यालय आइपुग्नुको कारण हो, सचिवालयको ‘स्टाफ’ बस लिन नजानु । तीन दिन भयो सचिवालयको बस कर्मचारी लिन गएको छैन, सचिवालयको प्राङ्गणमा थन्किएको छ ।

‘अफिसको गाडी पेट्रोल किन्न नसकेर थन्किएको छ । सार्वजनिक बसमा आएको जाममा फसियो,’ ती कर्मचारीले ढिला कार्यालय आउनुको कारण सुनाए । त्यसो त उनी मात्र होइन संसद सचिवालयका अधिकांश कर्मचारीको समस्या हो यो ।

चालु आर्थिक वर्षमा सरकारले सचिवालयको सवारी इन्धनको लागि ९१ लाख छुट्टाएको थियो । उक्त रकम सकिएर पनि सचिवालयले भद्रकालीस्थित नेपाली सेनाको पेट्रोल पम्पबाट उधारोमा इन्धन लिएर काम चलाइरहेको थियो । तर, उधारो रकम बढ्दै गएपछि पेट्रोल पम्पले इन्धन दिन छोड्यो । हाल संसद सचिवालयले आर्मीको पेट्रोल पम्पमा २२ लाख तिर्न बाँकी छ ।

‘उधारो बढेपछि इन्धन दिन छोड्यो । पेट्रोल पम्पको बाहिर पेट्रोल नदिने भनेर सूचना नै टाँसेको छ,’ संसद सचिवालयका एक कर्मचारीले भने, ‘अर्थ मन्त्रालयले पैसा दिएको छैन ।’

शुक्रबार दिउँसो भद्रकालीस्थित आर्मीको पेट्रोल पम्पमा पुग्दा संसद सचिवालयसहित अधिंकाश मन्त्रालयको नामको लिस्ट टाँसिएको थियो । हाल पेट्रोल पम्पले उधारो धेरै हुनेलाई इन्धन उपलब्ध गराएको छैन ।

‘पेट्रोल पम्पको पनि बाध्यता होला । उहाँहरूले इन्धन उधारोमा ल्याउन मिल्दैन । सबै सरकारी निकायले उधारोमा ल्याएपछि व्यवस्थापनमा समस्या भएर आर्मीले इन्धन रोकेको हो,’ संसद सचिवालयका एक अधिकारीले भने ।

संसद सचिवालयको सवारीसाधन व्यवस्थापन शाखाका प्रमुख लक्ष्मण अर्यालले इन्धन खरिद गर्न नसकेर गाडी थन्किएको स्वीकार गरे । ‘तीन दिन भयो स्टाफ गाडी चलाउन सकिएको छैन,’ उनले भने । सचिवलायको चार वटा स्टाफ बससहित करिब ३० वटा गाडी थन्किएका छन् ।

गत आर्थिक वर्षमा सरकारले सचिवालयका लागि १ करोड ६ लाख रुपैयाँ इन्धनका लागि दिएको थियो । जसमा गत वर्ष २० लाख जोगिएको थियो । तर, यो वर्ष ११ लाख कम रकम दिएका कारण पनि सचिवालयलाई समस्या परेको हो ।

अर्को कारण हो पेट्रोलको मूल्य वृद्धि हुनु । ‘गत वर्ष पेट्रोलको प्रतिलिटर १२० रुपैयाँ थियो सोहीअनुसार बजेट दिएको थियो । तर, अहिले इन्धनको मूल्य बढेको छ । इन्धनको मूल्य बढेकाले यो वर्ष पैसा पुगेन,’ सचिवालयका एक अधिकारीले भने ।

हाल संसद सचिवालयका महासचिवदेखि, सहसचिव चढ्ने गाडी र स्टाफ बसका लागि समस्या भएको हो । सचिवालयको गाडी नचल्दा राति संसद बैठक बसेको दिन कार्मचारीहरूलाई घर जान समस्या परेको छ । ‘रातिसम्म बैठक बस्छ । सार्वजनिक यातायात चलेको हुँदैन । पठाओमा जानुपर्ने हुन्छ । अरू उपाय छैन,’ सचिवालयका कर्मचारी गुनासो गर्छन् ।’

सवारी थन्किँदा सचिवालयलाई विधेयकलगायतका र महत्त्वपूर्ण कागजात सिहंदरबाबाट संसद भवन बानेश्वर र अन्य मन्त्रालयबाट पनि कागजात ल्याउन र पुर्‍याउन कठिन भएको छ । ‘विधेयकजस्तो महत्त्वपूर्ण डकुमेन्ट संसद भवन पुर्‍याउन गाडी छैन,’ सचिवालयका एक कर्मचारीले भने ।

प्रतिनिधिसभाका सभामुख, उपसभामुख, राष्ट्रियसभाका अध्यक्ष, उपाध्यक्ष, समिति सभापतिलगायतको सवारीमा भने समस्या नरहेको सचिवालयले जनाएको छ ।

‘पदाधिकारीलाई अहिलेसम्म समस्या परेको छैन । पदाधिकारीको तलबसँगै इन्धनको पैसा पनि सिधै जाने भएकोले हो,’ सचिवालयका एक अधिकारीले भने । पदाधिकारीका लागि गत आर्थिक वर्षमा ६२ लाख रकम छुट्टाइएको थियो । चालु आर्थिक वर्षमा भने पदाधिकारीको इन्धनमा बजेट बढाएर ७१ लाख पुर्‍याइएको छ ।

सम्बन्धित समाचार

प्रकाशित मिति: शुक्रबार, जेठ २६, २०८० १९:५०