फलाेअप : दिक्तेलमा शुभमले चलाएको विद्यालय व्यवस्थापन समितिबाट राजीनामा दिँदै अध्यक्ष सूर्य राई

फलाेअप : दिक्तेलमा शुभमले चलाएको विद्यालय व्यवस्थापन समितिबाट राजीनामा दिँदै अध्यक्ष सूर्य राई

A+ A A-

बालयौन दुराचार आरोपित मदन राई संस्थापक रहेको शुभद्रा मदन (शुभम) फाउन्डेसनद्वारा सञ्चालित जनजागृति माध्यमिक विद्यालय व्यवस्थापन समितिका अध्यक्ष सूर्य राईले राजीनामा दिने भएका छन् ।

खाेटाङकाे दिक्तेल, रुपाकोट, मझुवागढी नगरपालिकाले छानबिन समिति गठन गरी काम सुरु गरेपछि राईले राजीनामा दिन लागेका हुन् । ‘छानबिनलाई सहजीकरण गर्न नैतिक हिसाबले राजीनामा गर्न लागेको हुँ,' उनले शिलापत्रसित भने । राई अध्यक्ष रहेको सामुदायिक विद्यालय दिरुम वडा नम्बर २ मा छ । व्यावहारिक सिकाइको नारासहित सञ्चालित यो विद्यालय आवासीय सुविधासहितकाे छ ।

शुभम फाउन्डेसनको आर्थिक सहयोगमा सञ्चालित जनजागृति माध्यमिक विद्यालय । व्यावहारिक सिकाइको नारासहित चलिरहेको यो स्कुल खोटाङको दिक्तेल रुपाकोट मझुवागढी नगरपालिका वडा नम्बर २ मा छ ।

ज्येष्ठ सदस्यको अध्यक्षतामा आजै बस्ने विद्यालय व्यवस्थापन समिति बैठकमा राईले राजीनामा दिनेछन् । स्रोतका अनुसार, राजीनामा गरी नगरपालिकाको छानबिन समितिलाई सघाउन उनलाई मेयर तीर्थराई भट्टराईले सुझाव दिएका थिए । ‘मंगलबार भेटेर अनि बुधबार बिहान फोन गरेर नगरप्रमुखले उहाँलाई मार्गप्रशस्त गर्न भन्नुभयो, सूर्यजी पनि छानबिनलाई सहजीकरण गर्न राजीनामा दिन तयार हुनुभएको छ,' स्रोतले शिलापत्रसित भन्यो । राई दिक्तेल रुपाकोट मझुवागढी नगरपालिकाको शिक्षा समिति सदस्य पनि हुन् ।

उनको ठाउँमा विद्यालय व्यवस्थापन समितिको अध्यक्षको जिम्मेवारी हाललाई समितिकै ज्येष्ठ सदस्यले सम्हाल्ने बताइएको छ ।

शुभम फाउन्डेसनको आर्थिक सहयोगमा सञ्चालित जनजागृति माध्यमिक विद्यालय व्यवस्थापन समिति अध्यक्ष सूर्य राई । उनी दिक्तेल रुपाकोट मझुवागढी नगरपालिकाको शिक्षा समिति सदस्य पनि हुन् ।

अध्यक्ष राई सपरिवार उक्त विद्यालयमा बस्दै आएका छन् । उनका दुई छोरा सोही विद्यालयमा पढ्छन् । आफूले बिनापारिश्रमिक सेवा दिइरहेको बताउने राईलाई विद्यालयका सबै छात्रछात्राले ‘अंकल’ भन्छन् ।

सरकारी विद्यालय भए पनि जनजागृति मावि मदन राई संस्थापक रहेको शुभद्रा मदन फाउन्डेसनले नि:सर्त चलाउँदै आएको छ । सम्पूर्ण खर्च पनि शुभमले नै गरिरहेको छ । सोही विद्यालयमा पढेकी एक बालिकाले दिएको जाहेरीपछि समातिएका ७५ वर्षे राईलाई बालयौन दुराचार अभियोगमा प्रहरीले छानबिन गरिरहेको छ । कृषि वैज्ञानिकका रूपमा कहलिएका राई अहिले दिक्तेलस्थित जिल्ला प्रहरी कार्यालयको हिरासतमा छन् ।

याे पनि..

विद्यालय व्यवस्थापन समिति अध्यक्ष सूर्य राईमाथि समेत सोही विद्यालयकी एक बालिकालाई यौन दुर्व्यवहार गरेको आरोप छ । यद्यपि, यसबारे प्रहरीमा जाहेरी परेको छैन । अध्यक्ष राईले आरोप इन्कार गर्दै आएका छन् । उनले भने, ‘मैले सोच्न पनि नसक्ने विषयमा आरोप लगाइयो । झण्डै २० वर्षको सामाजिक सेवामा ममाथि जे आइलागेको छ, त्यो थेगिनसक्नुको छ, त्यसैले पनि पद छोड्न लागेको हुँ ।’

डेढ दशकअघि खोटाङमा उनी एमालेमा रहेर राजनीति गर्थे । राई अनेरास्ववियुको जिल्ला अध्यक्षसमेत भएका थिए । तर, पछि राजनीतिबाट अलग्गिएर आफू सामाजिक काममा पूर्णकालीन भएको उनी बताउँछन् ।

छानबिन समिति

दिक्तेल रुपाकोट मझुवाढी नगरपालिकाले विद्यालय सञ्चालनको वैधानिकता बुझ्न सामाजिक विकास समिति संयोजकसमेत रहेका वडा नम्बर १२ का अध्यक्ष दानबहादुर राईको नेतृत्वमा पाँचसदस्यीय छानबिन समिति बनाएको छ । विद्यालय सञ्चालनको कानुनी पाटो, बालबालिकाको अवस्थालगायत अध्ययन गरी प्रतिवेदन बुझाउने कार्यादेश पाएको समितिमा नगर शिक्षा समितिका प्रमुख तीर्थ विक, महिला विकास समिति प्रमुख इरन राई, नेपाल बार एसोसिएसन खोटाङ र जिल्ला प्रशासन कार्यालयका एक/एक प्रतिनिधि सदस्य छन् ।

संस्थापक राईमाथि लागेको बालयौन दुराचार आरोपमा भने जिल्ला प्रहरी कार्यालय दिक्तेलका प्रहरी निरीक्षक बेनु कार्कीको नेतृत्वमा छानबिन भइरहेको छ ।

सम्बन्धित समाचार

प्रकाशित मिति: बुधबार, जेठ १०, २०८० ०९:१०