फलाेअपः मदन राईले चलाएको स्कुलबारे छानबिन गर्न स्थानीय सरकारले बनायो समिति, चार दिनमा प्रतिवेदन तयार गर्ने

फलाेअपः मदन राईले चलाएको स्कुलबारे छानबिन गर्न स्थानीय सरकारले बनायो समिति, चार दिनमा प्रतिवेदन तयार गर्ने

A+ A A-

बालयौन दुराचार आरोपित मदन राईले चलाएको जनजागृती माध्यमिक विद्यालयबारे दिक्तेल रुपाकोट मझुवागढी नगरपालिकाले छानबिन गर्ने भएको छ । यसका लागि नगरपालिकाले समिति गठन गरेको छ ।

नगरपालिकाको सामाजिक विकास समिति संयोजकसमेत रहेका वडा नम्बर १२ का अध्यक्ष दानबहादुर राईको नेतृत्वमा पाँच सदस्यीय छानबिन समिति गठन गरिएको नगर प्रमुख तीर्थराज भट्टराईले जानकारी दिए ।

विद्यालय सञ्चालनको कानुनी पाटो, बालबालिकाको अवस्थालगायत अध्ययन गरी प्रतिवेदन बुझाउने कार्यादेश पाएको समितिमा नगर शिक्षा समितिका प्रमुख तीर्थ विक, महिला विकास समिति प्रमुख इरन राई, नेपाल बार एसोसिएसन खोटाङ र जिल्ला प्रशासन कार्यालयका एक/एक प्रतिनिधि सदस्य छन् । समितिको पहिलो बैठक आज बस्ने सदस्य तीर्थ विकले बताए । ‘बैठकले समितिको काम र प्राथमिकता तय गर्नेछ’, उनले शिलापत्रसित भने ।

छानबिन समितिले काम थालेको चार दिनभित्र प्रतिवेदन नगरपालिकालाई बुझाउने उनले बताए ।

शुभम फाउण्डेनको आर्थिक सहयोगमा सञ्चालित जनजागृती माध्यमिक विद्यालय । व्यावहारिक सिकाइको नारासहित चलिरहेको यो स्कुल खोटाङको दिक्तेल रुपाकोट मझुवागढी नगरपालिका वडा नम्बर २ मा छ ।

बालयौन दुराचारजस्तो गम्भीर घटना सार्वजनिक हुँदासमेत बालबालिकाकाे हितमा प्रभावकारी कदम चाल्न नसकेकोमा नगरपालिका नेतृत्वले आलोचना खेप्दै आएको छ । नगरप्रमुख भट्टराईले भने, ‘हामीले यो विषयलाई गम्भीर रूपमा नलिएकोचाहिँ होइन । न त हामीले नचाहेको नै हो । आफ्नै तरिकाले अध्ययन गरिरहेका थियौँ ।’

सम्बन्धित समाचार

'ठूला मान्छेको दिसापिसाब बालबालिकालाई सोहोराइन्छ,' मदन राईले चलाएको स्कुलका २९ तथ्य

प्रभावित विद्यालयमा अध्ययनरत बालबालिकाको सुरक्षामा आफूहरू संवेदनशील रहेको उनले बताए । ‘छानबिन समितिले दिएको रायअनुसार के गर्ने भन्ने तय गरिने छ’, शिलापत्रसित उनले भने । यद्यपि, नगरपालिकाकाे छानबिन समितिले विद्यालयकाे कानुनी पाटाेबारे मात्रै छानबिन गर्न पाउँछ ।

सयभन्दा बढी केटाकेटीको भविष्यको सवाल रहेकाले परिपक्व निर्णय नगरिए प्रतित्युपादक हुन सक्ने चिन्ता आफूहरूलाई रहेको भट्टराईको भनाइ छ । ‘हालका लागि हाम्रो पहिलो दायित्व भनेको त्यहाँका बालबालिकालाई सुरक्षाको प्रत्याभूति दिलाउनु हो, त्यसपछि अन्य कुराको खोजबिन र कारबाही गर्ने हो ।’

सरकारी विद्यालय भए पनि जनजागृती मावि मदन राई संस्थापक रहेको शुभद्रा मदन फाउण्डेसनले निशर्त चलाउँदै आएको छ । सम्पूर्ण खर्च पनि शुभमले नै गरिरहेको छ । सोही विद्यालयमा पढेकी एक बालिकाले दिएको जाहेरीपछि समातिएका ७५ वर्षे राईलाई बालयौन दुराचार गरेको अभियोगमा प्रहरीले छानबिन गरिरहेको छ ।

न्यायिक समिति प्रमुख नै पीडक भनिएकाको पक्षमा

bisan rai1684659187.jpg

नगरपालिकाका उपप्रमुख विसन राई । उनी नगर न्यायिक समितिका प्रमुख पनि हुन् ।

नगरपालिकाले छानबिन समिति बनाए पनि मुख्य तालकुदार नगर न्यायिक समितिका प्रमुख विसन राई भने आरोपित मदन राईको बचाउमा प्रस्ट उभिएका छन् । आरोपित राईले आफूमाथिको आरोप स्वीकार्दासमेत विसन राई भने संस्थापक राईलाई फसाइएको तर्क गरिरहेका छन् । गत २ जेठमा पालिकामा बाल अधिकारवादी संस्थाहरूको सामुन्ने उनले मदन राईले कुनै गलत काम नगरेको दलील दिएका थिए । बाल अधिकारको क्षेत्रमा काम गर्ने विभिन्न पाँचवटा संस्थाले उपमेयर राईमा पीडित बालबालिकाप्रति कुनै सहानुभूति नदेखिएको, उल्टै आरोपितको प्रवक्ताजस्तो गरी प्रस्तुत भएको संयुक्त प्रतिवेदनमा उल्लेख गरेका छन् ।

सम्बन्धित समाचार

स्थलगतः पीडितको मतलब छैन, दिरुमका उपमेयरलाई बालयौन दुराचार आरोपी मदन राईको चिन्ता

यसबारे नगरप्रमुख भट्टराईले भने, ‘मेरो छोराछोरी पढ्ने स्कुलमा यस्तो भएको भए म पनि चुप लागेर बस्ने थिइनँ । म व्यक्तितिर गइनँ तर पालिकाले घटनालाई गम्भीर रूपमा लिएको छ । त्यसैले त छानबिन समिति बनाएका छौँ ।’

नगरपालिकाको शिक्षा समिति सदस्य सूर्य राई विद्यालय व्यवस्थापन समितिका अध्यक्ष छन् । अध्यक्ष राईमाथि समेत विद्यालयकी एक पूर्वछात्रालाई यौन दुर्व्यवहार गरेको आक्षेप लागेको छ । उनले भने आरोप अप्रत्यासित र सोच्नसमेत नसक्ने खालको भन्दै इन्कार गरेका छन् ।

शुभम फाउण्डेनको आर्थिक सहयोगमा सञ्चालित जनजागृती माध्यमिक विद्यालय व्यवस्थापन समिति अध्यक्ष सूर्य राई । उनी दिक्तेल रुपाकोट मझुवागढी नगरपालिकाको शिक्षा समिति सदस्य पनि हुन् ।

शिलापत्रसितको कुराकानीमा उनले नगरपालिकाबाट हुने निर्णय स्वीकार्य हुने तर अनेक आक्षेप खेप्दै आफू विद्यालयमा बस्न नचाहेको बताएका थिए । आरोप लगाउने बालिकाले जाहेरी दिए उनीसमेत अनुसन्धानमा तानिने छन् ।

सम्बन्धित समाचार