पार्टीमा हस्तक्षेप गर्न किन रोकिए गगन ?

A+ A A-

नेपाली कांग्रेसका शुभेच्छुक तथा समर्थकहरूको अपेक्षा थियो- १४औँ महाधिवेशनबाट कांग्रेस महामन्त्रीमा गगन थापा र विश्वप्रकाश शर्माले जितेपछि पार्टीमा सुधार हुन्छ । तर, विधान नमान्ने पुरानो समस्याबाट कांग्रेसले मुक्ति पाएन ।

पार्टी सुधारको लागि थापाको आवाज चर्को सुनिन्छ । मंसिर ४ मा भएको संघ र प्रदेशको चुनावपछि कांग्रेसमा बहस भयो- ‘महामन्त्रीहरूले हस्तक्षेप किन गरेनन् ?’ चारैतिरबाट प्रश्नले घेरिएका थापाले शिलापत्रसँगको अन्तर्वार्तामा भनेका थिए, ‘महामन्त्रीको भूमिका अझै बढोस्, काम प्रभावकारी ढंगले बढोस् भन्ने सबैको चाहना भएपछि साँच्चिकै बढाइहाल्छु । मैले हस्तक्षेप गर्दै जानुपर्‍यो । निर्णय पनि गर्दै जानुपर्‍यो । मैले हस्तक्षेप बढाएर निर्णय बढाउँदै गर्दा महामन्त्री भएर आफ्नो सीमाभन्दा बाहिर आयो अथवा आवश्यकताभन्दा बढी हस्तक्षेप भयो भनेर ती साथीहरूबाट सुन्न नपरोस् भन्ने मेरो कामना हो ।’

गठबन्धन टुट्नु र कांग्रेसको सरकार बनाउन नसक्नुको जिम्मा अरुले लिँदैनन् भने म लिन्छु : गगन थापा

बढी हस्तक्षेप गर्‍यो भनेको सुन्न नपरोस् भनेका थापाले भनेको जस्तो हस्तक्षेप कांग्रेसमा देखिएको छैन । उनले कांग्रेस कस्तो बनाउने भन्ने अवधारणाहरू सार्वजनिक गरिसकेका छन् । १४औँ महाधिवेशनपछि आफ्नो अवधारणा कार्यान्वयन गर्ने जिम्मेवारीमा पुगेका छन् थापा । यो कार्यकालमा थापाको कथनी र करनीको परीक्षण हुनेछ । तर, अहिलेसम्मको स्थितिले सकारात्मक संकेतहरू भने नदेखाएको कांग्रेसकै नेताहरू बताउँछन् ।

महामन्त्री हुँदा थापाले गरेका कामले कांग्रेसमा उनको भविष्य पनि तय गर्नेछ । लोकप्रीय भाषणले मात्र पुग्दैन, कांग्रेस कार्यकर्ताले उनलाई 'काम गर्ने ठाउँ'मा पुर्‍याएका छन् । निरन्तर उकालो लागेको आफ्नो 'राजनीतिक करियर'लाई थप बढाउन थापाले अब नतिजा दिन सक्नुपर्छ ।

अब थापाले न 'म सभापति हैन' भनेर सुख पाउनेछन् न त 'संसदीय दलको नेतामा हारेँ' भनेर नै । संसदमा गरेका टिप्पणी र सरकारलाई गरेका प्रश्नले मात्र अब थापाको 'काम' देखिँदैन । यसअघिका तीन कार्यकालबाट उनको संसदीय शक्ति परीक्षण भइसकेको छ ।

हस्तक्षेप गर्ने बताएको ४ महिनापछि थापाले पार्टीभित्र आफूले राखेका विषयले प्रवेश नपाएको गुनासो गरे । २४ वैशाखमा उनले सामाजिक सञ्जालमा लेखे, ‘कहिले प्रक्रिया चित्त बुझेन, कहिले पद्धति, कति निर्णयहरू मन परेनन्, कति आफूले राखेका विषयले प्रवेश नै पाएनन् । धेरैपटक लाग्यो प्रतिरोध गरूँ, तर हरेक पटक सोचेँ, म जिम्मेवारी लिएर बसेको छु, एउटा सीमा छ ।’

आफू जिम्मेवारीमा भएकाले प्रतिरोध गरेका थापाले सँगै त्यसको पनि सीमा हुन्छ भन्न भने छुटाएनन् । सोहीकारण अब उनी प्रतिरोध गर्ने मुडमा रहेको बुझ्न सकिन्छ ।

अब पनि नसुध्रिए कांग्रेस सकिन्छ : गगन थापा

उनले आफूले राखेका कतिपय विषयले प्रवेश नै नपाउँदा प्रतिरोध गर्न मन लागे पनि रोकिएको बताए । ‘अडान राखेँ, लडेँ, साथीहरूलाई सम्झाएँ । तर, अब त अति भयो,’ उनले थपेका छन् ।

अहिले थापा आत्म मूल्याङ्कनमा छन् । गरेका कामले पार्टीलाई पारेको प्रभाव र कार्यकर्तामा पारेको परिवर्तनको आशाबारे समीक्षामा छन् उनी । अति भयो भनेर बोलेका महामन्त्रीले कस्तो कदम चाल्नान् चासोको विषय बनेको छ ।

पार्टी विधानले महामन्त्रीलाई केन्द्रीय कार्यालय हेर्ने जिम्मा बाहेक विशेषाधिकार दिएको छैन । नीति महाधिवशेनको गर्ने तयारीमा रहेको कांग्रेसको पदाधिकारीकालाई कति अधिकार दिने सभापतिको अधिकार कति खोस्ने भन्ने विषयमा थापा राम्रोसँग जानकार छन् । डेढ वर्षको अवधिमा सामुहिक नेतृत्वमा अधिकार नहुँदा कस्तो असर पर्छ भन्ने ज्ञान भएका थापाले कस्तो नीतिको प्रस्ताव गर्छन, अधिकारको बारेमा कस्तो प्रस्ताव गर्छन् सो प्रस्ताव परित हुन्छ कि हुदैँन त्यसले पनि महामन्त्रिको शक्ति परीक्षण हुनेछ । किनकी कांग्रेस विधि मान्ने पार्टी होइन । दुई–दुई महिनामा बस्नुपर्ने केन्द्रीय समिति बैठक गत वर्षको साउन २ गते बसेदेखि बस्न सकेको छैन ।

१४ औँ महाधिवेशन पछि महामन्त्रीको कार्यभार ग्रहण गरेपछि थापाले भनेका थिए, ‘विधानको पालना गराउनु पहिलो चुनौती हुनेछ । तर त्यो एकदमै गाह्रो काम हो । विधान मान्ने प्रयास गर्छु ।’ उनले गरेको प्रयास खेर गएको दखिन्छ ।

पार्टीका हरेक गतिविधि गुण दोषको जवाफ दिनेठाउँमा छन् महामन्त्री थापा । अहिले तेस्रो पुस्तका कांग्रेस नेताहरू पार्टी नेतृत्वलाई सच्चिन र पार्टी रुपान्तरण गर्ने अभियानमा छन् । उनीहरूले महामन्त्रीलाई पनि आफ्नो अभियानमा जोडिन आह्वान गरेका छन् ।

रुपान्तरण नभए कांग्रेस सकिन्छ : गगन थापा

महामन्त्रीले पार्टीभित्र माग पूरा गराउन, आफ्ना एजेन्डा लागू गराउन नसके वैकल्पिक बाटो अपनाउन अभियानमा आबद्ध नेताहरूको माग छ । नेताहरूले महामन्त्रीलाई अनशन र धर्ना बस्न सुझाव दिएका छन् । तेस्रो पुस्ताले उठाएको प्रश्नको जवाफ पनि महामन्त्री थापाले दिनुपर्नेछ ।

देउवासँगै गगन-विश्वसँग असन्तुष्ट रहेको तेस्रो पुस्ता कांग्रेस सुधार्न के गर्दैछ ?

महामन्त्रीको हैसियतमा पार्टी सभापतिलाई पत्र काट्ने र जानकारी माग्नेबाहेक अन्य कुराको दबाब दिन सक्ने अवस्था महामन्त्रीसँग छैन । पार्टी सुधारको लागि एजेन्डा सार्वजनिक रूपमा राखेर पार्टी बैठकमा सभपतिलाई दबाब दिने बाटो छ । सुधारको अपेक्षा गरेका कार्यकर्ताको भावना सम्बोधन गर्दै नेतृत्वले परिवर्तनको पक्षमा काम गरेको छ भन्ने सन्देश दिनुपर्ने दबाबमा महामन्त्री थापा छन् ।