पोखरा महानगरका १९० जना कर्मचारीले तीन महिनादेखि पाएनन् तलब

A+ A A-

पोखरा महानगरपालिकाको स्वास्थ्य महाशाखाअन्तर्गत कार्यरत करिब एक सय ९० जना कर्मचारीले तीन महिनादेखि तलब पाएका छैनन् । अर्थ मन्त्रालयले दरबन्दीका कर्मचारीलाई सशर्त अनुदानमार्फत् पैसा पठाएर तलब भुक्तानी गर्दै आएको थियो ।

करिब एक सय ४० जनाको दरबन्दी रहेकोमा अन्य कार्यालयबाट काज सरुवा मिलाएर आएकाले पनि यहीँबाट तलब खाने र भएकाको स्तरवृद्धि भएर सेवा सुविधा बढ्दा तलब अपुग भएको हो । स्वास्थ्य महाशाखाका कर्मचारीकाअनुसार दरबन्दीभन्दा ५० जना जति बढी अहिले कार्यरत छन् । उनीहरूको तलब जुन पालिकामा नियुक्ति छ त्यहीँ जान्छ । तर, काज मिलाएर आएपछि पोखरा महानगरपालिकाले सशर्तमा पाएको बजेटबाटै तलब बुझ्दा एक सय ९० जनाको गत फागुनदेखिको तलब भुक्तानी हुन नसकेको हो ।

तीन महिनादेखि तलब नपाउँदा कोठाभाडा तिर्न नसक्ने, बालबच्चालाई भर्ना गर्नसम्मको समस्या आफूहरूले भोग्नुपरेको पोखरा–२१ स्थित निर्मलपोखरी स्वास्थ्यचौकीमा कार्यरत पिताम्बर लामिछानेले बताए । ‘सबैभन्दा ठूलो समस्या भाडामा बस्नेलाई छ । बच्चाको विद्यालयमा शुल्क तिर्न समस्या भयो भन्ने साथी पनि हुनुहुन्छ,’ उनले सुनाए ।

महानगरपालिका अन्तर्गतका स्वास्थ्य संस्थामा तीन सय २७ जना कर्मचारी छन् । तीमध्ये १ सय ९ जना करारका हुन् । महानगरपालिका अन्तर्गतका करारका कर्मचारीको तलब भने रोकिएको छैन । सशर्त अनुदानमा आएको पैसा सकिएर तलब खुवाउन पैसा नभएको भन्दै महानगरपालिकाले संघ सरकारको अर्थ मन्त्रालयसँग बजेट मागेको थियो ।

यो पनि : नीतिगत बठ्याइँ: स्वास्थ्यका हाकिमका छोरालाई जागिर खुवाउन पद सिर्जना

रकमान्तर गरेर आवश्यक तीन करोड रुपैयाँ आएको र अब छिट्टै तलब नपाएका सबैलाई भुक्तानी गरिने महानगरपालिकाका वित्त व्यवस्थापन प्रमुख जयराम पौडेलले बताए । ‘हामीलाई वार्षिक ९ करोड रुपैयाँ आउँथ्यो । त्यो नपुगेपछि मागेकोमा रकमान्तर भएर आएको छ । अब दिन्छौँ,’ पौडेलले भने ।

यो आर्थिक वर्ष समस्या भए पनि आउँदो वर्षलाई सोचेर अहिले नै समस्या समाधान गरिनुपर्ने कर्मचारीको भनाइ छ । ‘पोखरा महानगरपालिकाको स्वास्थ्य महाशाखामा कति कर्मचारी कार्यरत छन्, त्यसको आधारमा तलब विनियोजन भयो भने आउँदो वर्ष समस्या पर्दैन,’ महाशाखाका जनस्वास्थ्य अधिकृत नानीबाबु ढकालले भने ।

भइराखेका कर्मचारीले तीन महिनादेखि तलब नपाइरहँदा यहीबेला महानगरपालिकाले करारमा स्वास्थ्य महाशाखाअन्तर्गत रहने गरी ४७ जना कर्मचारी भर्ना गर्दैछ । यसले महानगरपालिकालाई करिब दुई करोड रुपैयाँ आर्थिक भार थप्दै छ ।