जापानमा पोखराका मेयरलाई र्‍याखर्‍याख्ती: एक वर्षमा के गर्नुभयो ?

A+ A A-

जापान भ्रमणमा रहेका पोखरा महानगरपालिकाका मेयर धनराज आचार्यलाई जापान बस्ने पोखरेलीले र्‍याखर्‍याख पारेका छन् ।

कास्की पोखरा समाज जापानले आइतबार नेपाली नयाँ वर्षको अवसरमा शुभकामना आदानप्रदान कार्यक्रम आयोजना गरेको थियो । मेयर भएको वर्ष दिनसम्म पनि केही काम नगरेको भन्दै पोखरा लेकसाइडका एक जन युवा मेयर आचार्यमाथि खह्रो प्रस्तुत भएका हुन् ।

मेयरसँग भनाभन परेका युवा लेकसाइडका सुरेश लामिछाने हुन् । करिब २ घण्टा चलेको कार्यक्रममा जापानको राजधानी टोकियो बस्ने ३० जना जति पोखरेली सहभागी थिए । सुरुको ५५ मिनेट आयोजकले स्वागत मन्तव्यदेखि समाजबारे जानकारी गरायो । त्यसपछि मेयर आचार्यलाई बोल्न माइक दिइएको थियो । उनले बोल्न सुरू गर्नेबित्तिकै पोखराका सुरेशले आफूसँग प्रश्न भएको बताएका थिए । सवालजवाफ पछि गर्ने भन्दै मेयर आचार्य अघि बढे । उनले आफ्ना योजना र पहल सुनाए ।

मेयर आचार्य बोलेको करिब ३५ मिनेटपछि सुरेशले प्रश्न गरे- मेयर भएको एक वर्षमा के गर्नुभयो ? त्यो भन्नु न ।

मेयर- गरेको कुरा भनिरहेको छु, सुन्नुभएन ? सर, ९ महिनामा सबै रिजल्ट निस्किँदैन ।

सुरेश - म वडा नम्बर ६ लेकसाइडको हो । म नेपाल गएर आएको भर्खर । न सडक, न ट्राफिक राम्रो छ । उहाँ गर्नेछु भन्नुभाछ । एक घण्टा भयो सुनेको ।

मेयरः तपाईं फेवातालसँग सम्बन्धित हुनुहुँदो रहेछ सुन्नुस्...

सुरेश - म त्यहीँ हुर्केको । फेवाताल सफा नै छैन । अस्ति तपाईंहरू जानुभयो, फर्किनुभयो । (एक जना व्यवसायीले सिमसार पुरिरहेको ठाउँ ।)

मेयर- मेरो कुरा सुन्नुस्, म तपाईंलाई कन्भिन्स गराउँछु ।

सुरेश- लामो भयो कार्यक्रम ।

मेयर- म तपाईंसँग वादविवाद गर्न आएकै होइन ।

सुरेश- म पनि वादविवाद गर्न आएको होइन ।

मेयर आचार्यले आफूले फेवातालमा ६५ मिटर मापदण्डभित्र संरचना बन्न नदिएको दाबी गरे । तर, सुरेशको चित्त बुझ्दैन । मेयर आचार्य उनलाई जवाफ दिन्छन्, ‘१० महिनाअघि बनेको कुरा गरेर भएन नि । म आएपछिको कुरा गर्नुस् न । एउटा ठाउँ देखाउनुस् म दाबीका साथ भन्छु ।’

फेवातालमा जाने ढल व्यवस्थापन गर्न ११ अर्बको आयोजनाको सम्झौता गर्न आफू जापान आएको उनले बताएका छन् । आफूले शैक्षिक सुधारमा अभूत पूर्व काम काम गर्न लागेको मेयर आचार्यले सुनाए ।

त्यत्तिकैमा सुरेश भन्छन् - गर्छु-गर्छु मात्र भन्ने ।

मेयर- उज्यालो हुन्छ भन्न पनि भोलि बिहानसम्म पर्खिनपर्छ । गर्वमा रहेको बच्चा जन्मन एक वर्ष लाग्छ यार । म तपाईंसँग वादविवाद गर्दिनँ । बाहिर बस्नुभएको छ । यहाँ बसेर हेरेर, सकारात्मक सोच्दिनुस् । ४ वर्षपछि यो-यो गरेँ भनेर आँखा जुधाएर आफूले गरेको काम देखाउँछु ।

त्यसपछि सुरेशले आफू चार वर्षपछि आउने जवाफ दिए । मेयर आचार्यले हाँस्दै भने- वर्ष-वर्षमा आउनु न ।
त्यसपछि विवाद रोकियो । मेयर आचार्यले सम्बोधन सके ।

अन्तर्राष्ट्रिय सहयोग नियोग (जाइका) को औपचारिक निमन्त्रणमा मेयर आचार्य ७ सदस्यीय टोलीको नेतृत्व गरेर गत वैशाख ८ गते जापान गएका हुन् । जापानमा फोहोर पानी व्यवस्थापन कसरी गरिन्छ, उक्त व्यवस्थापनले जापानका जलाशयहरूको वातावरणीय सुधारका पाटोबारे जानकारी लिने योजनाअनुसार मेयर आचार्य नेतृत्वको टोलीले भेटघाट गरिरहेको छ । साथै फोहोर पानी व्यवस्थापन गर्न के-कस्ता प्रशासनिक र आर्थिक सुधार आवश्यक पर्छ भन्ने जानकारी पनि पोखरेली टोलीले लिएर फर्किने छ ।

टोलीमा खानेपानी तथा ढल निकास विभागका उप-महानिर्देशक श्री रामकुमार श्रेष्ठ, खानेपानी मन्त्रालयकी सहसचिव मीना श्रेष्ठ, महानगरपालिकाका इन्जिनियर विवेककुमार क्षेत्रीलगायत छन् । यो टोली १० दिनलाई जापान गएको हो ।

प्रकाशित मिति: मंगलबार, वैशाख १२, २०८० ११:२३