रविको रणनीति : प्रचण्ड सरकारको आयु हेरेर सरकारमा जाने/नजाने निर्णय लिने

A+ A A-

राष्ट्रिय स्वतन्त्र पार्टी (रास्वपा) सरकारमा जाने वा प्रतिपक्षमा बस्ने भन्नेमा अलमलमा छ । तर, प्रचण्ड सरकारको आयु हेरेर सरकारमा जाने/नजाने निर्णय लिने तयारी रास्वपाको छ । रास्वपाले निर्णय गर्न भोलि (शुक्रबार) केन्द्रिय समिति र संसदीय दलको संयुक्त बैठक डाकेको छ ।

‘सरकारमा जाने नजाने/निर्णय भोलि गर्छौं,’ रास्वपाका प्रवक्ता डा. मुकुल ढकालले भने । निर्णय गर्नुअघि सभापति रवि लामिछानेले सत्तारुढ दल र प्रतिपक्षी दलका नेताहरूसँग छलफल गरेका छन् ।

कांग्रेस सभापति शेरबहादुर देउवा, एमाले अध्यक्ष केपी ओली, जनमत पार्टीका अध्यक्ष सीके राउतसँग सभापति लामिछानेले छलफल गरेका छन् । गृहसहितको मन्त्रालय पाए सरकारमा जाने मनस्थिति बनाए पनि सरकारको आयुबारे रास्वपा झस्किएको छ । प्रचण्ड नेतृत्वको सरकार लामो समय नजाने संकेत पाएपछि सरकारमा जाने वा नजाने भन्नेमा रास्वपा अलमलमा परेको हो । लामो समय यो सरकार नजाने हो भने सरकारमा जानुको औचित्य नहुने रास्वपाको निष्कर्ष छ ।

यद्यपि, सरकारमा जान रास्वपाका चार सर्त छन् । पहिलो सर्त १० पुसमा भएको सहमतिअनुसार गृहसहितको मन्त्रालयमा छ । दोस्रोमा नीति तथा कार्यक्रम पुनः लेख्नुपर्ने माग छ । तेस्रोमा सरकार स्थिर हुनुपर्ने र चौथोमा सरकारमा सहभागी हुँदा हस्तक्षेप हुन नहुने स्वायत्त भएर काम गर्न दिनुपर्ने सर्त रास्वपाको छ ।

सर्त पूरा गर्न प्रधानमन्त्री पुष्पकमल दाहाल प्रचण्ड तयार रहेको रास्वपाका नेताहरूको दाबी छ । ‘सरकार स्थिर हुन्छ कि हुँदैन हेरिरहेका छौँ,’ प्रवक्ता डा. ढकालले भने ।

रास्वपाले सरकारमा जाने वा प्रतिपक्षमा बस्ने निर्णय २२ वैशाखमा गर्ने

‘प्रधानमन्त्रीको कार्ड’

अहिलेको सत्ता गठबनधन भत्काउन एमालेले रास्वपा सभापति लामिछानेलाई प्रधानमन्त्रीको कार्ड फ्याँकिरहेको चर्चा पनि चलिरहेको छ । तर, रास्वपाका प्रवक्ता ढकाल एमालेबाट औपचारिक प्रस्ताव नआएको बताउँछन् । ‘प्रधानमन्त्रीमा कसैले प्रस्ताव गरेको छैन,’ प्रवक्ता ढकालले भने ।

तर, सत्तारुढ गठबन्धनभित्रै रास्वपाले पनि सरकारको नेतृत्व गर्ने विषयमा छलफल भने चलेको छ । १० सिट रहेको एकीकृत समाजवादीका अध्यक्ष माधव नेपाल प्रधानमन्त्री बन्ने हो भने २१ सिट रहेको रास्वपाले सरकारको नेतृत्व किन नगर्ने भन्ने प्रश्न उठेको हो । ‘प्रधानमन्त्री प्रचण्डसँगको छलफलमा यो विषय उठेको थियो,’ रास्वपाका एक नेताले भने ।

सम्बन्धित समाचार

प्रकाशित मिति: बिहीबार, वैशाख २१, २०८० २०:००