शिलापत्र वर्षव्यक्ति २०७९ मा कसले कति मत पाए ? (सर्वेक्षण विधि र विस्तृत नतिजासहित)

शिलापत्र वर्षव्यक्ति २०७९ मा कसले कति मत पाए ? (सर्वेक्षण विधि र विस्तृत नतिजासहित)

A+ A A-

शिलापत्रले साल २०७९ का वर्षव्यक्तिसहित समाचार निर्माता घोषणा गरेको छ । वरिष्ठ नेत्ररोग विशेषज्ञ डा सन्दुक रुइत वर्षव्यक्ति २०७९ घाेषित भएका छन् । नेपालसहित संसारका विभिन्न देश पुगेर आँखाको ज्योति बाँडिरहेका उनले आफूसँगै देशको नाम पनि चम्काइरहेका छन् ।

त्यस्तै, वर्षकलाकारमा गायक तथा संगीतकार तिलकसिंह पेला, वर्षखेलाडीमा क्रिकेटर आशिफ शेख, पाँच/पाँच वटा उत्कृष्ट नाटक, सिनेमा र पुस्तक अनि विभिन्न विधाका समाचार निर्माताहरू घोषित भएका छन् ।

यो साललाई सकारात्मक, नकारात्मक प्रभाव पार्ने, आशा जगाउने वा कुनै पनि रचनात्मक काममार्फत आफ्नो सक्रिय भूमिका स्थापित गरेकाहरूको सूची हामीले न्युजरुममा लामो छलफलपश्चात् तयार पारेका थियौँ । वर्षव्यक्ति ६ जनामध्ये एक जना, वर्षकलाकार १० जनामध्ये एक जना, वर्षखेलाडी १० जनामध्ये एक जना, उत्कृष्ट पाँच/पाँचवटा सिनेमा, नाटक, आख्यान, गैरआख्यान र गजल/कवितालाई पाठकले चुन्न पाउने गरी मनोनयनमा राखिएकाे थियाे । तर, हामीले यसैलाई अन्तिम मानेनौँ ।

हामीले तयार पारेको सूची विधाविज्ञबाट अनुमोदन गरायौँ । यस क्रममा केही नाम थपिए । अनि, अन्तिम बनाइएको सूचीबाट वर्षव्यक्ति र अन्य विधाका पात्र र सिर्जना छान्ने जिम्मा पाठकलाई लगायौँ । अन्तिम नतिजा ‘गुगल फारम’ मा आएका मत विश्लेषणका आधारमा प्रकाशित गरिएको हो । आमपाठकलाई १७ चैतदेखि २६ चैतसम्म आफ्नाे मत दिने समय दिइएकाे थियाे । बितेर जान लागेकाे साल २०७९ को समीक्षाले देशलाई नयाँ दिशा दिन र आगामी वर्ष सुझबुझपूर्ण कदम चाल्न सघाउ पुर्‍याउन सकोस् भन्ने ‘शिलापत्र वर्षान्त’ अभियानको उद्देश्य हो ।

वर्षव्यक्तिको मनोनयनमा डा. रुइतबाहेक धरान उपमहानगरपालिकाका मेयर हर्क साम्पाङ, राष्ट्रिय स्वतन्त्र पार्टीका सभापति रवि लामिछाने, काठमाडौं महानगरपालिकाका मेयर बालेन्द्र शाह, नेपाली राष्ट्रिय टिमका कप्तान रोहितकुमार पौडेल र अभिनेत्री सुरक्षा पन्त थिए । देश, विदेशबाट प्राप्त १० हजार ४ सय ३४ मतमध्ये ५६ दशमलव ६ प्रतिशत उत्तरदाताले डा. रुइत वर्षव्यक्ति बनाउन मत दिएका छन् । उनले जति मत अन्य विधामा समेत कसैले पाएका छैनन् । वर्षव्यक्तिमा सामाजिक सञ्जालमा असाध्यै धेरै मत आएको थियो । तर, गुगल फारमबाहिर आएका मतलाई नतिजामा समावेश गरिएकाे छैन ।

याे पनि..

आँखाको ज्योति बनेर संसारभर चम्किएका डाक्टर रुइत बने शिलापत्र वर्षव्यक्ति

हर्क साम्पाङ

यसैगरी, धरान उपमहानगरपालिकाका मेयर हर्क साम्पाङलाई रुइतपछि दोस्रो बढी मत १३ दशमलव १ प्रतिशत भोट आयो । स्वतन्त्र चुनाव जितेर धरान हाँकिरहेका हर्क वर्तमान राजनीतिकर्मीमध्ये फरक शैलीका पात्र हुन् ।

बालेन शाह

काठमाडौं महानगरपालिकाका मेयर बालेन्द्र शाहलाई ‘वर्षव्यक्ति’ बनाउन १० दशमलव १ प्रतिशतले मत दिए । प्रतिनिधिसभामा देखिएको ‘स्वतन्त्र लहर’लाई बालेन विजयको उपज अनि युवा पुस्तालाई राजनीतिप्रति आकर्षित गरेका पात्रका रूपमा हामीले उनलाई वर्षव्यक्तिको सूचीमा राखेका थियौँ ।

रवि लामिछाने

यस्तै, राष्ट्रिय स्वतन्त्र पार्टीका सभापति रवि लामिछानेको पक्षमा ८ दशमलव ६ प्रतिशतले मत हाले । सञ्चारकर्म छाडेर पार्टी खोलेका लामिछानेले ६ महिनाको छोटो तयारीमा पार्टीलाई संसद्को चौथो शक्ति मात्र बनाएनन्, उपप्रधानमन्त्रीसहित तीन मन्त्रालय लिएर सरकारमा शानदार प्रवेश गरे । तर, विगतमा गरेको हेलचेक्र्याइँका कारण उनले सम्पूर्ण राजनीतिक पदहरू गुमाउनुपर्‍यो ।

रोहितकुमार पाैडेल

कुनै बेला टीयू क्रिकेट मैदानमा पारस खड्काको छक्का र शक्ति गौचनको विकेटमा ताली बजाएर खुसी मनाउने रोहितकुमार पौडेलकै कप्तानीमा नेपाली राष्ट्रिय क्रिकेट टिमले यस वर्ष कीर्तिमानी जित निकाल्दै अगाडिको यात्रा तय गर्‍यो । त्यसैले हामीले पौडेललाई ‘वर्षव्यक्ति’को सूची राख्यौँ । उनलाई कुल मतमध्ये ७ दशमलव ९ प्रतिशतले वर्षव्यक्ति बनाउन चाहे ।

सुरक्षा पन्त

यसैगरी, अभिनेत्री सुरक्षा पन्तलाई २ दशमलव ५ प्रतिशत उत्तरदाताले वर्षव्यक्ति बनाउन मत दिए । उनी प्रतिष्ठित अन्तर्राष्ट्रिय फिल्म फेस्टिबल कान्सको रेड कार्पेटमा पहिलोपल्ट हिँड्ने नेपाली कलाकार हुन् ।

गुगल फारममै राखिएको सिफारिस गर्ने अप्सनबाट उत्तरदाताले वर्षव्यक्तिमा प्रधानमन्त्री पुष्पकमल दाहाल प्रचण्ड, एमाले अध्यक्ष केपी शर्मा ओली, पूर्वराजा ज्ञानेन्द शाह, कांग्रेस महामन्त्री गगन थापा, वैज्ञानिक महावीर पुन, नेपाली क्रिकेट टिमका पूर्वप्रशिक्षक मोन्टी देसाइ, क्रिकेटर ज्ञानेन्द्र मल्ल, नेता भीम रावलको नाममा पनि मत दिएका छन् ।

गजलबाट उदाएका तिलकसिंह पेला

वर्षकलाकारमा तिलकसिंह पेलासहित दीपकराज गिरी, करिश्मा मानन्धर, मिस पबी, मिरुना मगर, अपूर्व क्षितिज, एलिना चौहान, भुवन केसी, प्रदीप खड्का र मल्लिका महतलाई राखिएको थियो ।

याे पनि..

तिलकसिंह पेला बने 'शिलापत्र वर्षकलाकार', जाे भाइरल हुने भागदौडबाट अलग्गै बसे (भिडियोसहित)

यीमध्ये सर्वाधिक २९ दशमलव ६ प्रतिशत मतका साथ गायक तथा संगीतकार पेला वर्षकलाकार चुनिए । दोस्रोमा सबैभन्दा बढी मत अभिनेता प्रदीप खड्काले पाए । २२ दशमलव १ प्रतिशत मत पाएका खड्का वर्ष २०७९ का समाचार निर्माता बने । यसैगरी, ९ दशमलव ८ प्रतिशत मत पाएर अभिनेत्री मिरुना मगर, ५ दशमलव १ प्रतिशत मत पाएर गायिका एलिना चौहान र ४ प्रतिशत मत पाएर कमेडियन अपूर्व क्षितिज समाचार निर्माता घोषित भए ।

वर्षखेलाडीमा आशिफ शेखलाई ५१ प्रतिशत मत

वर्षखेलाडीमा ८ जनालाई मनोनयनमा राखिएको थियो, जसमा क्रिकेटर आशिफ शेख, फुटबलका अञ्जन विष्ट, भलिबलकी प्रतिभा माली र उषा भण्डारी, एथलेटिक्सकी सन्तोषी श्रेष्ठ, पब्जी टिम द रियल सोल्जर्स र नेपाली फुटबल टिमका पूर्वप्रशिक्षक अब्दुल्लाह अल्मुताइरी छन् ।

याे पनि..

प्रतिष्ठित अन्तर्राष्ट्रिय अवार्ड जितेका क्रिकेटर आशिफ शेख बने 'शिलापत्र वर्षखेलाडी २०७९'

यसैगरी, पाठकको सुझावका आधारमा हामीले नेपालको राष्ट्रिय टिमलाई पनि समावेश गरेका थियौँ । यो सूचीबाट आशिफ शेख वर्षखेलाडी चुनिए ।

उनले कुल १० हजार ४ सय ३४ मतको ५१ दशमलव ५ प्रतिशत मत पाए । यसैगरी, नेपालको राष्ट्रिय क्रिकेट टिम, पब्जी टिम द रिअल सोल्जर्स, फुटबलर अञ्जन विष्ट र भलिबलकी प्रतिभा माली समाचार निर्माता २०७९ चुनिए ।

यी हुन् वर्षका पाँच उत्कृष्ट सिनेमा

२०७९ सालभर प्रदर्शितमध्ये १० सिनेमाबाट उत्कृष्ट पाँच छान्ने जिम्मा हामीले पाठकलाई लगाएका थियौँ । कबड्डी ४, चीसो मान्छे, पानी फोटो, प्रकाश, झिँगेदाउ, ऐना झ्यालको पुतली, प्रेम गीत ३, महापुरुष, फूलबारी र छक्का पञ्जा ४ मनोनयनमा थिए । यीमध्ये ५१ दशमलव १ प्रतिशत मतसहित कबड्डी ४, ३५ दशमलव ७ प्रतिशत मतसहित महापुरुष, ३५ दशमलव ६ प्रतिशत मतसहित छक्का पञ्जा ४, २८ प्रतिशत मतसहित प्रकाश र २४ दशमलव ५ प्रतिशत मतसहित ऐना झ्यालको पुतली वर्षसिनेमा चुनिए ।

यीबाहेक अन्यमा १ दशमलव ३ प्रतिशत मत आएको छ । उत्तरदाताले ‘के घर के डेरा’, ‘राधा’, ‘दोख’लगायत नाम पनि सिफारिस गरेका छन् ।

वर्षकै लाेकप्रिय नाटक- यौटा सपनाको अवसान

यौटा सपनाको अवसान, सपना अनेक अनेक, खुवालुङ, पल्पसा क्याफे र विमोक्ष ‘शिलापत्र वर्ष नाटक’ मा चयन हुन सफल भएका छन् ।

यी पाँचबाहेक ‘साथी, साथी आइदेऊ न’, ‘माक्स फर्किए’, ‘ऐया, माया’, ‘साविती’, र ‘दुर्वासा’ पनि मनाेनयनमा परेका थिए । जर्बजस्ती सूचीको संख्या पुर्‍याउन हामीले नचाहेकाले कुनै विधामा १० र कुनैमा ९ नाम मात्रै सिफारिस थिए ।

वर्षनाटक चुनिएकामध्ये ‘यौटा सपनाको अवसान’ले कुल मतको ४१ दशमलव ४ प्रतिशत मत हासिल गरेकाे छ । दोस्रोमा ‘पल्पसा क्याफे’लाई ४१ दशमलव ३ प्रतिशतले मत दिए । यसैगरी, ‘सपना अनेक अनेक’ले २५ दशमलव ४, ‘खुवालुङ ढुङ्गाको बाटो’ले २५ दशमलव ३ र विमोक्षले २३ दशमलव ५ प्रतिशत मत पायो । अन्यमा २ दशमलव ४ प्रतिशत मत परेको छ ।

वर्ष आख्यान बन्याे सुविन भट्टराईकाे इजोरिया

‘शिलापत्र वर्षपुस्तक’का तीन विधा, आख्यान, गैरआख्यान र कवितामा समेत ५/५ पुस्तकका लागि उत्तरदाताले गुगल फारममार्फत अभिमत दिएका छन् । १० चैतभन्दा अगाडि सार्वजनिक पुस्तक मात्रै यसमा सामेल गरिएको छ । त्यसयताका पुस्तकलाई अर्को साल समेट्नेछौँ ।

वर्षपुस्तकको आख्यान विधातर्फ सुविन भट्टराईलिखित ‘इजोरिया’ले सर्वाधिक ४५ दशमलव ९ प्रतिशत मत पायो । दोस्रोमा बुद्धिसागरको ‘एक्लो’ले ३० दशमलव ७ प्रतिशत मत हासिल गर्‍यो । यसैगरी रामलाल जोशीको ‘बा आमा’ (२७.२ प्रतिशत), खगेन्द्र लामिछानेको ‘फुर्के’ (२७ प्रतिशत) र डा. दलिपकुमार मल्लको ‘रुइसे दरबार’ (२३.८ प्रतिशत) वर्षका उत्कृष्ट पुस्तक चयन भए । यसबाहेक १ दशमलव ४ प्रतिशत मत अन्यमा आएको छ ।

आख्यानमा छानिएका उत्कृष्ट पाँचबाहेक हामीले ‘मायाका मसिना अक्षर’, ‘संग्रामबहादुर सार्की’, मध्यान्ह, झुल्के घाम र गोधूली, स्वप्नभूमि र समभोकलाई पनि सिफारिस गरेका थियौँ

गैरआख्यानमा खिमलाल गौतमको पन्ध्रौँ चुलीलाई सर्वाधिक मत

पन्ध्रौँ चुली, पानी घट्ट, सुश्री पारिजात, एक बागी, माधवी ओ माधवी, मेरा नौ दशक, द्वारिका देवी ठकुरानी, कूटनीतिक डायरी, शून्यको मूल्य र पात्रहरूमध्ये उत्कृष्ट पाँच गैरआख्यान छान्ने जिम्मा हामीले पाठकलाई लगाएका थियौँ । यीमध्ये खिमलाल गौतमको ‘पन्ध्रौँ चुली’ले सर्वाधिक ३६ दशमलव ८ मत पायो । दोस्रोमा डा. नवराज केसीको ‘शून्यको मूल्य’लाई ३४ दशमलव ८ प्रतिशत मत मिल्यो ।

यसैगरी, २९ दशमलव ७ प्रतिशत मतसहित गोविन्द गिरीको ‘सुश्री पारिजात’, २६ प्रतिशत मतसहित उज्ज्वल प्रसाईंको ‘एक बागी’ र २५ दशमलव ५ प्रतिशत मतसहित रतन भण्डारीको ‘द्वारिकादेवी ठकुरानी’ वर्षपुस्तक घोषित भएका छन् । गैरआख्यानतर्फ २ दशमल ४ प्रतिशत उत्तरदाताले अन्य पुस्तक पनि सिफारिस गरेका छन् ।

कविता/गजलमा प्रदीप रोदनको मफलर उत्कृष्ट

यसपालि हामीले कविता र गजललाई एकै विधाअन्तर्गत पाठकमाझ राख्यौँ, जसमा उत्तरदाताले उत्साहसाथ मत दिएका छन् । गजल मफलर र कविताहरू यादहरूको सन्दुक, प्वाँख, कामी, भाषाको वकपत्र, काला बादलमा उज्याला पाइला, आधा शिर उचालेर, कैँची र दियोको अन्तिम लप्का र शरदतका पहेँला पातहरूमध्ये उत्कृष्ट पाँच छान्ने जिम्मो पाठकलाई लगायौँ । यसमा सर्वाधिक मत ४७ दशमलव ७ प्रतिशत प्रदीप रोदनको गजल सङ्ग्रह ‘मोफलर’ ले पायो ।

यसैगरी, २७ दशमलव ७ प्रतिशत मतसहित मञ्जुल मितेरीको ‘कामी’ यति नै मतसहिकत दीपा मेवाहाङ राईको ‘यादको सन्दुक’, २४ दशमलव ३ प्रतिशत मतसहित पुरुषोत्तम दाहालको ‘काला बादलमा उज्याला पाइला’ र २४ दशमलव २ प्रतिशत मतसहित नवीन प्राचीनको ‘प्वाँख’ वर्षपुस्तकमा छानिए । यो विधातर्फ उत्तरदाताले ३ प्रतिशत १ प्रतिशत अन्यमा मत दिएका थिए, जसमा ‘बिगनरामको मादल’, ‘जब एउटा मान्छे हराउँछ’, गजल कृति ‘खुडी’लगायतका नाम छन् ।

समाचार निर्माता

विधागतबाहेक हामीले १५ समाचार निर्माता छान्ने जिम्मा पनि पाठकलाई सुम्पेका थियौँ । हाम्रो मनोनयनको आधार थियाे, यो साललाई सकारात्मक, नकारात्मक प्रभाव पार्ने वा समाचारमा छाएका, आशा जगाउने वा कुनै पनि रचनात्मक काममार्फत आफ्नो सक्रिय भूमिका स्थापित गरेकाहरू नै समाचार निर्माता २०७९ को सूचीमा समावेश गरिएका छन् ।

समाचार निर्माता २०७९ मा यी नामहरू मनाेनयन गरिएका थिएः

रामचन्द्र पौडेल (राष्ट्रपति)
राजेन्द्र लिङ्देन (अध्यक्ष, राप्रपा)
घनश्याम भुसाल (नेता, नेकपा एस)
जनार्दन शर्मा (पूर्वअर्थमन्त्री)
डा तोसिमा कार्की (सांसद, रास्वपा)
धुर्मुस र सुन्तली (कलाकार, अभियन्ता)
जगन्नाथ पौडेल (बीपी कांग्रेस)
सागर ढकाल (युवा राजनीतिकर्मी)
सीके राउत (अध्यक्ष, जनमत पार्टी)
रामकुमारी झाँक्री (नेकपा एसकी सचिव)
सिर्जना सिज्जु (सोलो ट्राभलर)
चुङ्बा शेर्पा (वाइल्डलाइफ फोटोग्राफर)
विकास बस्याल (विमान दुर्घटनाका घाइतेको उद्धारकर्ता)
भावना पन्त र सिर्जना रावत (पाइलट र कोपाइलट)
सन्दीप लामिछाने (क्रिकेटर)
पल शाह (अभिनेता)
दिनेश सुनार (पार्कर खेलाडी)
अमन प्रताप अधिकारी (निर्माता, पोइट आइडल)
चोलेन्द्र शमशेर राणा (पूर्वप्रधानन्यायाधीश)
दीपक विष्ट (प्रहरी हवल्दार)
प्रेमप्रसाद आचार्य (आत्मदाह गरेका युवा)
चार्ल्स शोभराज (जेलमुक्त)
डा. स्वर्णिम वाग्ले (नेता, अर्थविद्
प्रदर्शनी कुमारी (प्रथम मधेसी महिला सीडीओ)
रेशम चौधरी

यीमध्ये १५ जना समाचार निर्माता चुनिएका छन्, जसमा रामचन्द्र पौडेल, राजेन्द्र लिङ्देन, तोसिमा कार्की, धुर्मुस र सुन्तली, सागर ढकाल, सीके राउत, चुङ्बा शेर्पा, विकास बस्याल, सन्दीप लामिछाने, पल शाह, दिनेश सुनार, चोलेन्द्रशमशेर राणा, प्रेमप्रसाद आचार्य, स्वर्णिम वाग्ले र रेशम चौधरी छन् ।

समाचार निर्माता २०७९ चुनिएकामध्ये सबैभन्दा बढी मत ३६ प्रतिशत क्रिकेटर लामिछानेले पाएका छन् । उनी बलात्कार अभियोगका कारण साल २०७९ मा सबैभन्दा बढी समाचार बन्ने पात्रमध्ये एक हुन् । समाचार निर्माता बनाउन उत्तरदाताले दोस्रो बढी मत युवा राजनीतिकर्मी सागर ढकाललाई दिएका छन्, उनले ३३ दशमलव ४ मत पाएका छन् ।

samachar nirmata1681399819.jpg

यसैगरी, तेस्रोमा अर्थशास्त्री एवं राजनीतिकर्मी डा. स्वर्णिम वाग्लेले २७ दशमलव ७, राष्ट्रिय स्वतन्त्र पार्टीकी सांसद डा. तोसिमा कार्कीले २७ दशमलव ६ प्रतिशत मत हासिल गरिन् । त्यस्तै, बालिकासँग याैन दुरुपयाेग अभियाेगमा एक वर्ष जेल परेका कलाकार पल शाहले २० दशमलव ६ प्रतिशत मत प्राप्त गरेका छन् ।

शिलापत्रले २०७७ सालदेखि वर्षव्यक्ति, वर्षखेलाडी, समाचार निर्माता र वर्षपुस्तक घोषणा गर्न थालेको हो । वर्षकलाकार, वर्षसिनेमा र वर्षनाटक पछि थप गरिएका विधा हुन् । २०७७ मा नेकपाकाे एकता भंग गर्दै एमाले र माओवादी केन्द्र ब्युँताउने विवादास्पद फैसला गरेका न्यायाधीशद्वय बमकुमार श्रेष्ठ र कुमार रेग्मी वर्षव्यक्ति घोषित भएका थिए भने २०७८ मा विद्यालयमा ‘पढ्दै कमाउँदै’ कार्यक्रमकाे परिकल्पनाकार सुर्खेतका शिक्षक नारायण सिग्देल वर्षव्यक्ति चुनिएका थिए । अहिले साे कार्यक्रमलाई शिक्षा मन्त्रालयले स्वामित्व लिएर देशका झण्डै ४ सय विद्यालयमा लागू गरिसकेकाे छ ।

यसैगरी, २०७७ मा फुटबलर किरण चेम्जोङ, २०७८ मा ओलम्पियन पलेशा गोबर्धन वर्षखेलाडी घोषित भएका थिए भने २०७८ सालमा गायक प्रकाश सपुत ‘वर्षकलाकार’ चयन भएका थिए ।

प्रकाशित मिति: बिहीबार, चैत ३०, २०७९ १९:२२