प्रतिष्ठित अन्तर्राष्ट्रिय अवार्ड जितेका क्रिकेटर आशिफ शेख बने 'शिलापत्र वर्षखेलाडी २०७९'

प्रतिष्ठित अन्तर्राष्ट्रिय अवार्ड जितेका क्रिकेटर आशिफ शेख बने 'शिलापत्र वर्षखेलाडी २०७९'

A+ A A-

क्रिकेटर आशिफ शेख ‘शिलापत्र वर्षखेलाडी २०७९’ चयन भएका छन् । विधा विज्ञको रायमा मनोनयन र पाठकहरूको मतका आधारमा नेपाली क्रिकेटका नियमित सदस्य २१ वर्षीय आशिफलाई ‘वर्षखेलाडी’ चुनिएको हो । उदीयमान यी खेलाडीले यसअघि कुनै नेपाली क्रिकेटरले जित्न नसकेको प्रतिष्ठित अन्तर्राष्ट्रिय अवार्ड यसै वर्ष जितेका छन् । मनोनयनमा परेका ७ खेलाडीमध्ये पर्साका शेखलाई वर्षखेलाडी २०७९ बनाउन कुल ५१ दशमलव १ प्रतिशतले मत हालेका छन् । सर्वेक्षणमा सातै प्रदेशका १० हजार ४ सय ३४ सर्वसाधारण सहभागी भएका थिए ।

यसैगरी, वर्षखेलाडी विधाअन्तर्गत 'समाचार निर्माता २०७९' मा क्रमशः नेपालको राष्ट्रिय क्रिकेट टिम, नेपालको पब्जी टिम 'द रिअल सोल्जर्स', फुटबलर अञ्जन विष्ट र भलिबल खेलाडी प्रतिभा माली चुनिएका छन् । राष्ट्रिय क्रिकेट टिमका कप्तान रोहितकुमार पौडेललाई वर्षव्यक्ति सूचीमै राखिएकाले खेल विधातर्फ राष्ट्रिय टिमलाई मनोनयनमा राखिएको थिएन । तर, ऐतिहासिक उपलब्धि हासिल गरेको नेपालको राष्ट्रिय क्रिकेट टिमलाई हाम्रा पाठकहरूको सुझावमा समेटेका छाैँ । मनोनयन र छनोट प्रक्रियाको विस्तृत विवरण शिलापत्रले केही दिनमा सार्वजनिक गर्नेछ ।

०००

आशिफ शेख नेपाली क्रिकेटका विकेटकिपर ब्याटर हुन् । राष्ट्रिय टाेलीका नियमित सदस्य आशिफ टिमका लागि एक खम्बा हुन् । यो वर्ष आशिफकै उत्कृष्ट प्रदर्शनमा नेपालले कठिन खेलमा पनि जित हात पारेको छ ।

कौशल र ‘स्पोर्ट्सम्यानसिप’ ले उनी नेपालमा मात्रै होइन, अन्तर्राष्ट्रियस्तरमै चर्चामा छन् । २१ वर्षीय आशिफ नेपालका उदीयमान खेलाडी हुन्, जसले यसै वर्ष दुई वटा प्रतिष्ठित अन्तर्राष्ट्रिय अवार्डसमेत जिते । यसअघि यस्ताे अवार्ड कुनै नेपाली क्रिकेटरले जित्न सकेका थिएनन् ।

२०७९ चैतमा आशिफले क्रिस्टोफर मार्टिन जेन्किन्स स्पिरिट अफ क्रिकेट अवार्ड जिते । गत माघ १२ मा उनले आईसीसीबाट स्पिरिट अफ क्रिकेट अवार्ड जितेका थिए । आशिफले टी-२० अन्तर्राष्ट्रिय क्रिकेटमा स्पोर्ट्सम्यानसिप देखाएको भन्दै उनलाई सम्मानसहित अवार्ड दिइएको हो ।

गत वर्ष नेपाल र आयरल्यान्डबीच खेलको दौरानमा एन्डी म्याकब्राइन र बलर कमलसिंह ऐरी ठोकिँदा एन्डी पिचमा लड्न पुगेका थिए । जसका कारण उनी रनआउट हुन सक्थे । तर, आशिफले उनलाई रनआउट गराएनन् । उनको उक्त निर्णयमा आईसीसी मात्रै होइन, सबै नतमस्तक बने ।

२०७९ मै उनले एकदिवसीय अन्तर्राष्ट्रिय क्रिकेटमा पहिलो शतक बनाए । पपुवा न्युगिनीविरुद्ध विश्वकप लिग-२ मा १ सय १० रन बनाउँदै पहिलोपटक ओडीआईमा शतक बनाएका थिए ।

यसै वर्ष उनले ओडीआईमा सात अर्धशतक पनि बनाएका छन् । एकदिवसीय अन्तर्राष्ट्रिय क्रिकेटमा ३५ खेलबाट १०७३ रन बनाउँदा आठ अर्धशतक र एक शतक उनले बनाए । त्यस्तै, टी-२० अन्तर्राष्ट्रिय क्रिकेटमा शेखले २० खेलबाट ४ सय ६८ रन बनाउँदा दुई पटक अर्धशतक पूरा गरेका छन् ।

यूएईविरुद्धको निर्णायक खेलमा उत्कृष्ट प्रदर्शन गरेका आशिफलाई मधेश सरकारले २ लाख रुपैयाँ र वीरगञ्ज महानगरपालिकाले मोटरसाइकल उपहार दिने घाेषणा गरेका छन् ।

सम्बन्धित समाचार

प्रकाशित मिति: सोमबार, चैत २७, २०७९ १४:१३