नेपालको नाममा अभूतपूर्व जित निकाल्ने पब्जी टिम 'द रियल साेल्जर्स'

द रियल सोल्जर्स (डीआरएस) अनलाइन गेमिङ पब्जीको विश्वचर्चित टिम हो । यो टिमले यसै वर्ष वैश्विक प्रतियाेगितामा तहल्का मच्चायो । पब्जी मोबाइल ग्लोबल च्याम्पियनसिप (पीएमजीसी) मा पुस २०७९ मा उपविजेता बनेसँगै डीआरएसको चर्चा चुलियो ।

हुन पनि डीआरएस टिमले विश्वभरिका ४९ टिमलाई पछि पार्दै उपविजेतासहित २ लाख ९२ हजार अमेरिकी डलर पुरस्कार जितेको थियो । पब्जी मोबाइल ग्लोबल च्याम्पियनसिपमा उपविजेता हुँदा डीआरएस गेमिङ टिममा सुविन श्रेष्ठ प्रजापती (रुल्ज), समीर गुरुङ (ग्यान्टे), साहस भण्डारी (किलर वाईटी) र दीपेश गुरुङ (डेल्टा) थिए ।

इन्डोनेसियाको जकार्तामा भएको फाइनलमा १६ टिमबीच १८ चरणमा प्रतिस्पर्धा भएको थियो । यसमा नेपाली टिम डीआरएसले सोचेभन्दा उत्कृष्ट प्रदर्शन मात्र गरेन, उपविजेता नै बनेर फर्कियाे ।

ई-स्पोर्ट्समा नेपालको शून्य लगानी छ । तर, सफलता भने यही क्षेत्रबाट नेपाललाई सबैभन्दा ठूलो मिलेको छ । पुरस्कार राशिकै हिसाबले पनि अहिलेसम्म नेपालका फुटबल, क्रिकेट, भलिबल, पौडी, मार्सल आर्ट्सलगायतका कुनै पनि टिमले यति ठूलो रकम जित्न सकेको थिएन ।

पछिल्लो समयमा नेपालमा पनि ई-स्पोर्ट्सको क्रेज बढ्दो छ । त्यसकै नतिजा हो डीआरएसको सफलता । याे टिमले यसअघि पनि पब्जी मोबाइल प्रो-लिगको दक्षिण एसियाली च्याम्पियनसिपको तेस्रो सिजनको उपाधि जितेको थियो । उक्त प्रतियाेगितामा विजेता बनेको डीआरएसले १० लाख अमेरिकी डलर पाएको थियो भने यसकै लिग चरणमा ७ हजार ५ सय डलर पाएको थियो । सन् २०२० मा संस्था दर्ता भएर नै अघि बढेको डीआरएस गेमिङले ई-स्पोर्ट्समा राम्रो गर्दै अघि बढिरहेको छ ।

शिलापत्रको वर्षान्त अभियानअन्तर्गत खेल विधातर्फ 'समाचार निर्माता २०७९' चुनिएको डीआरएस र खेलाडीहरू हामी हार्दिक बधाई तथा अझै प्रगतिको कामना गर्दछौँ ।

प्रकाशित मिति: सोमबार, चैत २७, २०७९ १४:०४