नेपाली क्रिकेट टिमले अहम् सपना पूरा गरेकाे वर्ष

A+ A A-

वर्ष २०७९ मा नेपाली क्रिकेट टिमले अन्तर्राष्ट्रिय जगतको ध्यान तान्याे । एकपछि अर्को खेलमा जादुमयी प्रदर्शन गर्दै नेपाल विश्वकप छनोटसम्मको यात्रा तय गर्न सफल बन्याे ।

२ चैत टीयू क्रिकेट मैदानमा नेपाली क्रिकेट खेलाडीले आफूलाई साबित गरिदिए, हामी कमजोर छैनौँ । यूएईले दिएको ३ सय ११ रनको चुनौतीमा डीएल मेथडबाट ९ रनको जित निकाल्दै नेपाल विश्वकप छनोटमा पुग्न सफल भयो । यो क्षण अहिले पनि नेपाली समर्थकसामु ताजै छ ।

घरीघरी टप्ल्याकटुप्लुक गर्दै छिट्याइरहेको पानी । धुम्मिदै उघ्रिँदै गरेको मौसम । लाग्थ्यो, यूएईलाई नै मौसमले पनि साथ दिइरहेको छ । तर, गुल्सन झाले त्यो ४२औँ ओभरमा बनाएको २० रनले सम्भव भएको थियाे जित । अझै सम्झिँदा पनि सबै गदगद हुने पल ।

यूएईविरुद्धको जितपछि मन्द मुस्कानमा देखिएका मुख्य प्रशिक्षक मोन्टी देसाईले भनेका थिए, ‘हामीले राम्रो खेल्यौँ । क्रिकेट समर्थकलाई धेरैधेरै धन्यवाद । यसरी नै साथ र समर्थन गर्दै जानुहोला ।’

हुन पनि उनी नेपाली टिमको मुख्य प्रशिक्षक भएको एक महिना नबित्दै नेपालले सनसनीपूर्ण प्रदर्शन गर्‍याे ।

लिग टु सुरु हुँदा विश्वकप छनोटमा पुग्ने नेपालको लक्ष्य थियो । तर, बिस्तारै खेलहरू हार्दै जाँदा नेपालले अन्तिम तीनवटा सिरिज बाँकी हुँदा एकदिवसीय अन्तर्राष्ट्रिय मान्यता जोगाउने मात्रै लक्ष्य बनायो । तर, १२ खेलमध्ये ११ खेलमा जित निकाल्दै नेपालले सिधै विश्वकप छनोटमै आफ्नो स्थान सुरक्षित गर्‍याे । विगतको नतिजा र नेपाली टिमको प्रदर्शनलाई नियाल्दा यो असम्भवजस्तै थियो । तर, सम्भव भयो ।

खेलाडीले एकाएक जादुमयी प्रदर्शन गरे । टिममा रहेका सबै खेलाडीले संकटको बेला नेपाललाई हारबाट बचाए । प्रत्येक खेलमा प्रत्येक फरक-फरक खेलाडी खेल विजेताका रूपमा उदाए । जसले गर्दा १२ मध्ये ११ खेलमा नेपालको जित सम्भव बन्यो ।

नेपाली क्रिकेट टिमका कप्तान भन्छन्, ‘पहिलो हाम्रो लक्ष्य एकदिवसीय मान्यता पाउने थियो । तर, खेल्दै जाँदा विश्वकप छनोटमै प्रवेश गरेका छौँ । एउटा सपना थियो । त्यो पूरा भयो ।’

टीयू क्रिकेट मैदानमा नेपालले आठ खेलमध्ये आठै खेल जित्यो । जहाँ स्कटल्यान्ड र नामिबिया तथा यूएई र पपुवा न्युगिनीबीचको दुवै सिरिज क्लीन स्वीप गरेको थियो । दुबईमा भएको सिरिजमा भने नेपालले चार खेलमध्ये तीन खेलमा जित निकालेको थियो ।

त्यसअघि भएको लिग टुका सिरिजहरूमा नेपालको प्रदर्शन बिर्सन लायक नै रह्यो । विश्वकप छनोटमा अब नेपालले टेस्ट राष्ट्रसँगै क्रिकेट खेल्नेछ ।

२०७९ मंसिरमा टीयू क्रिकेट मैदानमा यूएईसँग नेपालले तीन खेलको एकदिवसीय अन्तर्राष्ट्रिय सिरिज खेलेको थियो । जहाँ नेपालले सिरिज २–१ ले जित्न सफल भयो । पहिलो खेलमा ८४ रनले हारेको नेपालले त्यसपछि दोस्रो खेलमा तीन र तेस्रो खेलमा ६ विकेटले यूएईलाई पराजित गरेको थियो ।

२०७९ वैशाखमा नेपालले टेस्ट राष्ट्र जिम्बाब्बे ए टिमसँग टीयू क्रिकेट मैदानमा टी–२० र एकदिवसीय सिरिज खेल्यो । तर, यो आईसीसीको अफिसियल थिएन । टी–२० मा नेपालले सिरिज गुमाए पनि एकदिवसीयमा भने नेपालले जिम्बाब्बेविरुद्ध २–१ ले सिरिज जितेको थियो ।

२०७९ भदौमा नेपालले केन्यासँगको टी–२० अन्तर्राष्ट्रिय सिरिज खेल्यो । पाँच खेलको त्यो सिरिज घरेलु टिम केन्याविरुद्ध नेपालले ३–२ ले जितेको थियो । पहिलो खेलमा पाँच विकेटले जित निकालेको नेपालले दोस्रो खेलमा केन्यासँग १८ रनको हार ब्यहोरेको थियो । सन्दीप लामिछानेको कप्तानीमा रहेको नेपालले तेस्रो खेलमा चार विकेटको जित निकाल्यो तर चौथो खेलमा सात रनले हारेको थियो । अन्तिम खेलमा केन्यालाई ३१ रनले हराउँदै नेपालले सिरिज आफ्नो पक्षमा पारेको थियो ।

समग्रतालाई हेर्दा नेपाली क्रिकेट उपलब्धिमूलक नै रह्यो । तर, भदौमै तत्कालीन कप्तान सन्दीप लामिछानेविरुद्ध गौशाला प्रहरी वृत्तमा एक नाबालिकाले बलात्कारको उजुरी दिएपछि अन्तर्राष्ट्रिय रूपमै नेपाली क्रिकेट बदनाम पनि हुन पुग्यो ।

यो वर्ष व्यक्तिगत रूपमा हेर्ने हो भने नेपाली खेलाडीले उच्चस्तरीय प्रदर्शन गरे । यो कुरामा दुई मत रहेन । खासगरी वर्षको अन्त्यतिर लिग टुमा नेपाली क्रिकेटरको प्रदर्शन प्रशंसनीय रह्यो ।

प्रकाशित मिति: सोमबार, चैत २७, २०७९ १४:११