केएमसीमा पढेका डाक्टरलाई आफैँले जम्मा गरेको पैसा फिर्ता लिन सकस

A+ A A-

एमबीबीएसमा नाम निस्केपछि धनुषाका सुमन (नाम परिर्वतन) काठमाडौं आए । काठमाडौं विश्वविद्यालयले उनका लागि काठमाडौं मेडिकल कलेज (केएमसी) तोकिदिएको थियो । सोहीअनुसार सुमन सन् २०१५ को अगस्टमा केएमसीमा भर्ना भए ।

एमबीबीएस पढ्नका लागि भर्ना हुँदै गर्दा ‘सेक्युरिटी डिपोजिट’ का रूपमा ३ लाख रुपैयाँ सुमनले केएमसीलाई बुझाए । जुन पैसा ‘रिफण्डेबल’ हुने गर्छ । सुमनले पढाइ सकेपछि इन्टर्न सुरु गरे । एक वर्ष उनले केएमसीमा इन्टर्नसिप गरे । र, गएको मंसिर पहिलो हप्ता सुमनका अगाडि डाक्टर थपेर कलेजबाट बिदा भए । कलेजबाट बिदा भएलगत्तै भर्ना हुँदा डिपोजिट गरेको ३ लाख रुपैयाँ उनले हात लाग्ने आशा गरेका थिए । तर, त्यसो भएन । कलेजले उनलाई हाल आफूसँग पैसा नभएका कारण एक महिनापछि पैसा फिर्ता गर्ने भन्दै बिदा दियो ।

‘एक महिनापछि दिन्छौँ भन्नुभएको थियो । म फेरि गएँ । त्यसबेला पनि फेरि एक महिनापछि भन्नुभयो । अर्को महिना सुरु भयो, कुरा गर्दा हामीसँग पैसा छैन, अर्को महिना दिन्छौँ भन्नुहुन्छ । हरेकपटक उही बहाना बनाइरहनुभएको छ’, डा. सुमनले भने ।

हाल उनी धनुषाकै एक अस्पतालमा काम गरिरहेका छन् । कलेजसँग पैसा फिर्ता लिनका लागि उनी बारम्बार काठमाडौं आउन सक्दैनन् । उनी फोन गर्छन् । कहिले फोन उठ्दैन, उठिहाले पनि चित्तबुझ्दो जवाफ आउँदैन । कलेजले आफूलाई पैसा नदिएर झुलाइरहेको उनी बताउँछन् ।

उनी भन्छन्, ‘हामीसँग फण्ड छैन भन्नुहुन्छ । त्यो हाम्रो समस्या होइन नि । हामीले फिर्ता हुने गरी पैसा जम्मा गरेका थियौँ । हाम्रो इन्टर्नसिप पूरा हुनेबित्तिकै उहाँहरूले उक्त पैसा फिर्ता गर्नुपर्ने हो ।’ उनले इन्टर्नसिप सकेको करिब चार महिना भइसकेको छ । पैसा फिर्ता पाउने अत्तोपत्तो छैन । तर, नामको अल्फाबेटअनुसार आफूहरूले उनीहरूको रकम फिर्ता गरिरहेको मेडिकल कलेजका प्रधानाध्यापक डा. रतिन्द्र श्रेष्ठले बताए ।

उनले भने, ‘हामीभन्दा अगाडिको प्रशासनले डिपोजिट गरेको उनीहरूको रकम चलाएछ । अहिले हामीले ग्रूप बनाएर नामको अल्फाबेटअनुसार रकम फिर्ता गरिरहेका छौँ ।’ श्रेष्ठका अनुसार विद्यार्थी भर्ना हुँदा कलेजले डिपोजिटको नाममा मनलाग्दी रकम उठाएको थियो । उनले भने, ‘पहिलो प्रशासन कसैबाट ३ लाख, कसैबाट ५ लाख गरी मनलाग्दी रकम उठाएर प्रयोग गरेछ । त्यो भार अहिले हामीले उठाउनुपरेको छ ।’

विद्यार्थीहरूको डिपोजिट रकम ठूलो मात्रामा भएका कारण उनीहरूको पैसा कलेजले बिस्तारै तिर्ने बताए । डा. सुमनजस्तै आफ्नै पैसा फिर्ता लिनका लागि कलेजलाई हारगुहार गरिरहेका छन्, अर्का डा. सरोज (नाम परिर्वतन) पनि । ‘हामीले एमबीबीएस पढ्दै गर्दा शुल्क बुझाउने बेला केही गरी ढिला भयो भने १२ प्रतिशत ब्याज तिर्नुपर्थ्यो । कलेजले भनेको दिन भन्दा एक दिन ढिलो हुँदा पनि हामीले १२ प्रतिशत ब्याज तिर्नुपरेको थियो’, डा. सरोजले भने ।

तर, अहिले विद्यार्थीको पैसा फिर्ता गर्दा कलेजले आफ्नो जिम्मेवारीबाट मुख फेरेको उनी बताउँछन् । ‘हामी आफ्नो पैसा माग्न जाँदा पैसा छैन भन्नुहुन्छ । यस्तो हो भने कलेज किन चलाउने ?’, डा. सुमन भन्छन्, ‘हाम्रो पनि त काम हुन्छ । सधैँ पैसा माग्न जान सम्भव पनि हुँदैन । काम गर्‍यो, हतार–हतार कामबाट निस्केर पैसा माग्न जानुपर्ने स्थिति छ ।’

त्यसो त डिपोजिट गरेको रकम मात्र नभएर कलेजले आफू इन्टर्नसिप गर्दैगर्दा कलेजले लिने गरेको तलबसमेत आफूहरूले नपाएको अर्को डा. सबिन (नाम परिर्वतण) बताउँछन् ।

उनी भन्छन्, ‘इन्टर्नसिपमा दुई महिनाको तलब पनि दिएको छैन । तलबको कुरा के गर्नु, आफैँले डिपोजिट गरेको पैसासमेत पाउन मुस्किल भइरहेको छ । कलेजसँग नहुनु हाम्रो समस्था होइन । एक दिन ढिलो हुँदा पनि हामीबाट कलेजले १२ प्रतिशत ब्याज लिएको थियो । हाम्रो पैसाको पनि त ब्याज आउनुपर्‍यो नि ।’

विद्यार्थीले डिपोजिट गरेको उक्त रकम कलेजले चलाउन पाउँदैन । रकम माग्दै गर्दा अर्को, अर्को महिना भन्दै आफूहरूलाई कलेजले झुलाउने काम गरिरहेको आरोप विद्यार्थीले लगाएका छन् । विद्यार्थीले भर्ना हुँदा रकम अनिवार्य डिपोजिट गर्नुपर्ने भन्ने हुँदैन । या मेडिकल कलेजअनुसार फरकफरक हुन सक्छ ।

विद्यार्थी बिदा भएर जाँदा उक्त रकम उनीहरूलाई फिर्ता गर्नुपर्ने भएका कारण नयाँ व्यवस्थापन भित्रिएसँगै डिपोजिट रकम कम गरेको डा. श्रेष्ठले बताए । उनले भने, ‘विद्यार्थी जाँदा उनीहरूलाई फिर्ता गर्नुपर्छ । त्यत्रो पैसा किन उठाउनु भनेर हामीले दुई वर्षदेखि २५ हजार मात्र डिपोजिट गर्न लगाएका छौँ ।’

विद्यार्थीहरू भने प्रशासनसँग राम्रो सम्बन्ध भएका कतिले रकम फिर्ता पाएको उनीहरूले बताए । उनीहरूका अनुसार लिङ्क भएकाहरूले पैसा फिर्ता पाएका छन् । कतिले ३ लाख नै पाएका छन् । कतिले डेढ लाख पाएका छन् । कतिले पाएकै छैनन् ।

‘नपाउने भित्र हामी पनि पर्छौं’, डा. सबिनले भने, ‘हामीभन्दा अगाडिको ब्याचमा अर्को एडमिनिस्ट्रेसन थियो । उनीहरूले समयमै पैसा पिर्ता पाएका थिए । अहिले नयाँ आउनुभएको छ । उहाँहरू आएपछि सबै कुरा परिर्वतन भएको छ ।’

दुई वर्षअगाडि विराटनगरस्थित नोबेल मेडिकल कलेजका सञ्चालक सुनील शर्माले केएमसी किनेका थिए । शर्माको केएमसीमा प्रवेशपछि पुरानो व्यवस्थापनका अधिकांश व्यवस्थापक र उच्च तहका कर्मचारीहरूले राजीनामा दिएका थिए । त्यसो त कलेजले कलेजमा कार्यरत कर्मचारीहरूलाई मंसिर महिनादेखि तलब दिन सकेको छैन । कलेजले लामो समयदेखि तलब नदिएको भन्दै कर्मचारीहरू आन्दोलित छन् ।

याे पनि :

तीन महिनादेखि तलब नपाएका केएमसीका डाक्टरलाई घर चलाउन सकस, सञ्चालक शर्मा मन्त्री बन्ने दौडमा

प्रकाशित मिति: सोमबार, फागुन २९, २०७९ ०६:४७