तीन महिनादेखि तलब नपाएका केएमसीका डाक्टरलाई घर चलाउन सकस, सञ्चालक शर्मा मन्त्री बन्ने दौडमा

तीन महिनादेखि तलब नपाएका केएमसीका डाक्टरलाई घर चलाउन सकस, सञ्चालक शर्मा मन्त्री बन्ने दौडमा

A+ A A-

काठमाडौं मेडिकल कलेज (केएमसी)ले चिकित्सकलाई तीन महिनादेखि तलब दिएको छैन । मेडिकल कलेजमा कार्यरत कार्यालय सहयोगीदेखि प्राध्यापक चिकित्सकसम्मले तीन महिनाको तलब नपाएका हुन् । मेडिकल कलेजमा करिब १२ सय कर्मचारी कार्यरत रहेको बताइन्छ । मेडिकल कलेजको आर्थिक अवस्था सामान्य हुँदा पनि तलब नपाएको भन्दै कार्यरत चिकित्सक, नर्स तथा कर्मचारी रुष्ट बनेका छन् ।

उनीहरूले व्यवस्थापनसमक्ष गुनासो पनि गरिसकेका छन् । तर, केएमसी व्यवस्थापन पक्षले भने कर्मचारीहरूको गुनासो सुनवाइ गरेको छैन । केएमसी दुई वर्षअघि सुनिल शर्माले खरिद गरेका हुन् । अहिले मोरड ३ बाट निर्वाचित सांसदसमेत रहेका शर्माले कलेज व्यवस्थापनकाे जिम्मा लिएपछि कर्मचारीको सेवासुविधामा समस्या आउन थालेको कर्मचारीहरू बताउँछन् ।

शिलापत्रको सम्पर्कमा आएका एक चिकित्सकले चार महिनादेखि तलब नपाएकोले कामप्रति मनोवैज्ञानिक असर पर्न थालेको बताए । ती चिकित्सकले भने, ‘तीन महिना भयो, तलब आएको छैन । अब फागुन पनि सकिन थाल्यो । तलब आउने कुनै सुरसार छैन । यस्तो मनस्थितिले कति दिन काम गर्न सकिन्छ होला तपाईं आफै सोच्नुस् ।’

कलेजले कर्मचारीलाई तलब नदिनुको कारण बताएको छैन । ती चिकित्सकका अनुसार बिरामीको फ्लो हेर्दा अस्पतालले आम्दानी नगरेको भन्ने अवस्था पनि छैन । उनले भने,‘अस्पतालमा आम्दानी कम छ भन्ने हो भने पनि वार्षिक प्रतिवेदनमा अस्पताल फाइदामा भएको भन्ने देखाएको छ । अस्पताल फाइदामा छ भन्दै प्रतिवेदन सार्वजनिक गरे पनि हामीले तलब पाएका छैनौँ ।’

कलेजले गएको कात्तिक महिनाको तलब पनि पुसमा मात्र दिएको थियो । शिलापत्रसँग कुरा गर्दै प्रशासनका एक कर्मचारीले भेन, ‘हामी जहिले जाँदा पनि उहाँहरू अब आउनु पर्ने हो भन्दै कुरालाई बेवास्ता गरिरहनु भएको छ । एक महिनाअगाडि कुरा गर्न गएका थियौँ । उहाँहरूले एक महिनाको समय दिनुभयो । तर त्यो समय पनि पार भइसक्यो ।’

चिकित्सकभन्दा पनि अस्पालमा कार्यरत सहयोगीहरू धेरै मर्कामा परेको उनले बताए । उनले भने, ‘अझ हामीलाई भन्दा पनि ‘लोअर लेभल’का स्टाफहरूलाई धेरै गाह्रो हुन्छ । कतिको घर भाडा तिरेर बस्नु पर्ने हो । काममा आउनका लागि पनि त खर्च चाहियो, त्यो पनि छैन कतिसँग ।’

उनका अनुसार तलबले घर खर्च चलाउनु पर्ने हुन्छ । कतिको परिवार त्यही तलबको भरमा बाँचिरहेको हुन सक्छ ।उनले भने,‘हाम्रो पनि इएमआई हुन्छ । गाडीको लोन तिर्नुपर्ने हुन्छ । घरको लोन तिर्नुपर्ने हुन्छ । हाम्रो तलब आएको छैन भनेर बैंकले हामीलाई छुट दिँदैन ।’ समयमै तलब नआउँदा विभिन्न किसिमका समस्या उत्पन्न हुने उनी बताउँछन् ।
डाक्टरलाई छैन, अन्य ठाउँ काम गर्ने छुट

केएमसीमा कार्यरत चिकित्सकले अन्यत्र अभ्यास गर्न पाउँदैनन् । बिहान ५ बजेदेखि साँझ ६ बजेसम्म केएमसीमै काम गर्दै आएका छन् । चिकित्सकहरूका अनुसार कलेजसँगको सम्झौतापत्रमा केएमसीबाहेक अन्य ठाउँमा काम गर्न नपाइने उल्लेख गरिएको छ ।

काम गरेको ठाउँबाट समयमा तलब पनि नआउने र अन्य ठाउँमा पनि काम गर्न नपाउने भएपछि आफूहरू मारमा परेको चिकित्सकहरूको भनाइ छ । कलेजले नियमित रूपमा तलब नदिएपछि धेरै कर्मचारीहरू त्यहीँ काम गर्ने या छोडेर अन्य ठाउँमा काम सुरु गर्ने दुविधामा छन् ।

चिकित्सकहरूले भने अस्पताल व्यवस्थापनको नियतमै प्रश्न उठाएका छन् । सत्तारुढ कांग्रेसको सांसद भएकाले शर्माले राजनीतिक पहुँचको आधारमा व्यवस्थापनमा ध्यान नदिएको कर्मचारीहरू चर्चा गर्न थालेका छन् । एक कर्मचारीले भने, उहाँहरूले पैसा जग्गामा खर्च गरिरहनु भएको छ । विभिन्न पूर्वाधारहरूमा खर्च गरिरहनु भएको छ । आफ्ना लागि पैसा खर्च गरिरहनु भएको छ । तर हामीलाई तलब दिन भने आनाकानी गरिरहनु भएको छ ।’

ती चिकित्कसले भने, 'बिरामी हेर्दा मलाई एक खालको सन्तुष्टि मिल्छ । म यही कुरामा रमाउँछु । तर मैले रमाइलो मानेर मात्रै मेरो घरको चुलाे बल्छ र ? मैले रमाइलो मात्रै मानेर हुँदैन । प्यासनले मात्रै खाना पुग्दैन ।’

कलेज प्रशासनको व्यवहारले कर्मचारीहरू भने दिक्क भइसकेका छन् । उनी भन्छन्,‘यस्तो कुराले अस्पताललाई नै असर गर्छ । कर्मचारी डिमोटिभेट भइसकेपछि प्रोफेसर लगायतले छोड्दै गएको अवस्था छ । यो कुरा उहाँहरूले सोच्नुपर्ने हो, कुनै पनि संस्थामा कर्मचारी खुसी छैन भने संस्था कसरी फस्टाउन सक्छ ?’

केही चिकित्सक भने देश नै छोड्नेसम्मको विचारमा पुगेका छन् । शिलापत्रसँगको कुराकानीमा ती चिकित्सकले भने, 'केएमसी छोडर अर्को ठाउँ जाँदा त्यहाँ पनि त्यस्तै समस्या नहोला भन्न सकिँदैन, त्यसैले मैले देश नै छोड्ने विकल्प खोज्न थालेको छु । '

नोबेलमा छैन समस्या

काठमाडौं मेडिकल कलेजका सञ्चालक सुनिल शर्मा विराटनगरस्थित नोबेल मेडिकल कलेजका पनि सञ्चालक हुन् । एउटै सञ्चालक भएका दुई फरक फरक मेडिकल कलेजमा कर्मचारीहरूको सेवा सुविधा भने आर्कषक नै मानिन्छ । यद्यपि, केएमसीले भोग्दै आएको समस्या नोबेलले अहिलेसम्म भोग्नु परेको छैन ।

तर, चिकित्सकहरूको विश्लेषणमा केएमसीलाई नोबेल जस्तै चलाउन खोज्दा शर्माको योजना ‘फेल’ भएको पनि हुन सक्ने विश्लेषण पनि भइरहेको छ । उनीहरूको विश्लेषणमा विराटनगर र काठमाडौंमा दुई फरक ठाउँमा रहेका मेडिकल कलेजलाई एउटै फर्मूला प्रयोग गरेर चलाउन खोज्दा केएमसीमा सफल नभएपछि केएमसीलाई बेवास्ता गरिएको हुन सक्छ ।

हुन त, प्रतिनिधिसभाको चुनावमा होमिएसँगै शर्माले आमाको नाममा काठमाडौं मेडिकल कलेज र बुवाको नाममा नोबेल मेडिकल कलेजको सञ्चालन गरेका छन् ।

मन्त्रीका लागि लबिङ

कर्मचारीलाई तलब नदिदएका शर्मा भने नयाँ गठबन्धन बनेसँगै स्वास्थ्य तथा जनसंख्या मन्त्री बन्नका लागि लबिङमा छन् । नेकपा माओवादी केन्द्रका अध्यक्ष पुष्पकमल दाहालको नेतृत्वमा कांग्रेससहितका आठदलीय नयाँ गठबन्धन बनेसँगै उनी अहिले शिक्षा वा स्वास्थ्य मध्ये एउटा मन्त्रालय आफूले लिनका लागि लबिङ गरिरहेका छन् ।

कांग्रेसभित्र शेखर कोइराला समूहको नेताका रूपमा चिनिने शर्मा कुनै बेलामा माओवादीमा पनि आबद्ध थिए । माओवादी नेता वर्षमान पुननिकट मानिने शर्मा आर्थिक विवादकै कारण माओावदी छोडेर कांग्रेसमा लागेका हुन् । शर्माले चलाएको नोबेल मेडिकल कलेजमा पनि लफडा भने भइरहेको हुन्छ । उक्त कलेजले मिर्गौला प्रत्यारोपणका लागि अनुमति लिएको विषय पनि विवादमा परेको थियो । एमाले नेता तथा पूर्व स्वास्थ्यमन्त्री भानुभक्त ढकाललाई पराजित गरेका शर्माले ढकालले सम्हालेकै मन्त्रालय ताकेका हुन् । केएमसीको विषयमा कुराकानी गर्नका लागि पटक–पटक सम्पर्क गर्न खोज्दा पनि शर्मा सम्पर्कमा आउन चाहेनन् ।

प्रकाशित मिति: सोमबार, फागुन २२, २०७९ ०६:२३