तनहुँमा पाँच वर्षमा चितुवाको आक्रमणबाट १४ बालबालिकाको मृत्यु

सांकेतिक तस्वीर ।

A+ A A-

तनहुँमा पछिल्लो पाँच वर्षमा चितुवाको आक्रमणबाट १४ जना बालबालिकाको मृत्यु भएको छ ।

२०७४ फागुन ९ गतेदेखि हालसम्म पाँच वर्षको अवधिमा जिल्लाका विभिन्न स्थानमा भएको चितुवा आक्रमणमा परी १० बालक र चार बालिकाको मृत्यु भएको हो ।

चितुवाको आक्रमणबाट बन्दीपुर गाउँपालिका-५ की सुप्रीति थापा, बन्दीपुर-१ का सुप्रिम थापा, बन्दीपुर-३ की डिना चेपाङ, व्यास नगरपालिका-१२ छिर्कनका अभिनव कुँवर र भानु नगरपालिका-३ का विशाल श्रेष्ठको मृत्यु भएको छ ।

यसैगरी, भानु-४ की रञ्जिता लम्साल, भानु-२ की पुष्पा अधिकारी, सोही वडाका अमृत गुरुङ, ऋतिक रोका, भानु-१ का कुशल बानियाँ, शुक्लागण्डकी नगरपालिका-३ का रविन नेपाली, आँबुखैरेनी नगरपालिका-१ का पुजन सिञ्जाली, बन्दीपुर-४ का इसाक सुनार र शुक्लागण्डकी-२ नारन रानाको मृत्यु भएको सहायक वन अधिकृत राजकुमार श्रेष्ठले जानकारी दिए ।

चितुवाको आक्रमणबाट डेढ वर्षदेखि ११ वर्षसम्मका बालबालिकाको ज्यान गएको श्रेष्ठले बताए । यस आर्थिक वर्षमा चार घटनामा दुई बालबालिकाको मृत्यु भएको छ भने तीन जना घाइते भएको उनले बताए । त्यसैगरी, चालु आर्थिक वर्षमा वन्यजन्तुबाट ४२ घटनामा ७७ पशुधन क्षति भएका छन् । त्यसमा बाख्रा ६९, बङ्गुर पाँच, गाई एक, पाडो एक र सुँगुर एक क्षति भएका छन् ।

त्यसैगरी, चार रतुवा मृग, एक अजिङ्गरको उद्धार गरिएको छ भने तीन चितुवा र एक निरबिरालो मृतावस्थामा फेला परेको डिभिजन वन कार्यालयका प्रमुख कोमलप्रसाद काफ्लेले जानकारी दिए । प्रत्येक पालिकामा पानीको पोखरी निर्माणकार्यलाई प्राथमिकता दिएसँगै विगतका वर्षका तुलनामा वन्यजन्तुबाट मानवीय क्षतिमा कमी ल्याउन सकिएको उनले बताए ।

खोला खोल्सीमा रहेका सबै पानी बस्तीमा लैजाँदा प्यास मेटाउन वन्यजन्तु बस्तीमा पस्दा मानवीय क्षति हुने गरेकाले पोखरी निर्माणकार्यलाई तीव्रता दिइएको उनले बताए ।

प्रकाशित मिति: शुक्रबार, फागुन १९, २०७९ १७:३०