कमोडिटी ठगी प्रकरण: प्रहरीले ६० दिनमा सक्यो अनुसन्धान, ४ अर्ब ठगी गरेको पुष्टि

कमोडिटी ठगी प्रकरण: प्रहरीले ६० दिनमा सक्यो अनुसन्धान, ४ अर्ब ठगी गरेको पुष्टि

A+ A A-

अवैध आर्थिक कारोबार कमोडिटीमार्फत हजारौँ व्यक्तिलाई ठगी गरेको आरोपमा पक्राउ परेकामाथिको अनुसन्धान प्रहरीले सकेको छ । कमोडिटीमार्फत देशभर संगठित रूपमा ठगी धन्दा चलाएको आरोपमा मर्कन्टाइल एक्सचेन्ज नेपाल लिमिटेड (मेक्स) नेपालका सीईओसहित चार जनालाई काठमाडौं प्रहरीले दुई महिनाअघि पक्राउ गरेको थियो ।

उनीहरूमाथि प्रहरीले संगठित अपराध ऐन-२०७० अन्तर्गत मुद्दा चलाएर अनुसन्धान थालेको थियो । काठमाडौं प्रहरीका अनुसार पक्राउ परेका चार जनामाथिको अनुसन्धान करिब ५४ दिनमा सकिएको छ । उनीहरूमाथिको अनुसन्धान सकेर एक-दुई दिनभित्रै सरकारी वलिकको कार्यालयलाई प्रतिवेदन बुझाउने तयारी भइरहेको काठमाडौं प्रहरी परिसरका एसपी सिताराम रिजालले बताए ।

काठमाडौं प्रहरीले मेक्स नेपालका प्रमुख कार्यकारी अधिकृत जितेश सुरेन्द्रन र सो कम्पनीका प्रवक्ता नरेन्द्र भट्ट, स्पेल इन्भेष्टमेन्ट प्रालि र ट्रेडिङ क्लबका सञ्चालक सुनिल श्रेष्ठ र उनकी पत्नी कञ्चन श्रेष्ठलाई पक्राउ गरेको थियो । केही सञ्चालक भने अझै फरार छन् । फरार आरोपीहरू नेपाल बाहिर रहेको आशंका प्रहरीले गरेको छ ।

प्रहरीको अनुसन्धानले मेक्स नेपालका सीईओ जितेश सुरेन्द्रनकै योजनामा लगानीकर्तालाई झुक्याएर करोडौँ रुपैयाँ ठगी गरेको देखाएको छ । प्रहरी अनुसन्धानबाट विभिन्न बैंकमार्फत कमोडिटीको काममा ७ अर्ब ३८ करोड रुपैयाँको कारोबार गरेको खुलेको छ । जसमध्ये ३ अर्ब ३५ करोड रुपैयाँ ठगी गरेको खुलेको अनुसन्धानमा संलग्न प्रहरी अधिकारीको भनाइ छ ।

ठूलो रकम चलखेल गरेको भन्दै एचसीसी सेग्रगेटको नाममा रहेका विभिन्न बैंकका खाता रोक्का गरिएको छ । प्रहरीले उनीहरूमाथि नेपाल राष्ट्र बैंक, नेपाल धितोपत्र बोर्ड, विगतमा लगानी गरेका पीडित तथा विज्ञहरूको सहयोगमा अनुसन्धान गरेको हो ।

प्रहरीको अनुसन्धानले मेक्स नेपालसहितको समूहले साइप्रसबाट सफ्टवेयर सञ्चालन गरेर अवैध कारोबार गरेको खुलाएको थियो । यस्तो ठगीका लागि मेक्स नेपालले शेयर मार्केट तालिमको प्रचार सुरु गरेको थियो । कमोडिटी क्लबका सञ्चालक सुनिल श्रेष्ठले कमोडिटी कारोबारबाट अमेरिका, जापान, युरोपमा बस्ने तथा रोजगारी गरी कमाउने नेपालीले भन्दा बढी कमाइ हुन्छ, धितोपत्र बोर्डको दुई हाँगा भएको र एउटाले नेप्सेसम्बन्धी र अर्कोले कमोडिटी मार्केट हेर्ने गरेको भन्दै भ्रम सिर्जना गरेको पीडितहरूको गुनासो छ ।

जसका लागि २०७४ मा जारी गरिएको वस्तु विनिमय बजारसम्बन्धी ऐन देखाइएको थियो । उनीहरूले सुनियोजित रूपमा लगानी बढाउने वातावरण बनाउन सुरुमा ह्वाट्स एप ग्रुप बनाएर किन्न भनेको वस्तु किनेपछि किनेको केही समयमा मूल्य बढ्ने र बेच्न भनेको वस्तु बेचेको केही समयमा मूल्य घट्ने गरी व्यवस्था मिलाउने गरेका थिए ।

तर, लगानी बढ्दै जाँदा ठीक उल्टो हुने गरेको गुनासो पीडितहरूको थियो । प्रहरीमा कमोडिटीमार्फत ठगी गरेको भन्दै १२ हजार जनाले उजुरी गरेका थिए । कमोडिटी ठगीको अनुसन्धान गर्न काठमाडौं प्रहरीले प्रहरी निरीक्षक कृष्ण गिरीको नेतृत्वमा छुट्टै समिति नै गठन गरेको थियो ।