मेक्‍स नेपालको कमोडिटी ठगी प्रकरण : ५ अर्ब बढीको अवैधानिक कारोबार, संगठित अपराधमा मुद्दा

मेक्‍स नेपालको कमोडिटी ठगी प्रकरण : ५ अर्ब बढीको अवैधानिक कारोबार, संगठित अपराधमा मुद्दा

A+ A A-

नेपालमा कानुनत: अवैध मानिएको कमोडिटी कारोबारको नाममा ठगी धन्दा चलाएकाे आराेपमा मेक्‍स नेपालका सीईओसहित ४ जना उपर संगठित अपराध ऐन २०७० अन्तर्गत मुद्दा प्रकिया अघि बढाइएको छ । विशेष प्रविधि अपनाई गरिने अपराधबाट पीडितको संरक्षण गर्न यो ऐन आकर्षित हुने गरेको छ ।

लगानीकर्तालाई लोभ र भ्रममा पारी नयाँ प्रविधिको प्रयोग गरेर मेक्‍स नेपाललगायतका संस्थाले हजारौँ नेपालीलाई ठगी गरेको उजुरीपछि अहिले मेक्स नेपालका सीईओसहित ४ जना थुनामा रहेका छन् ।

२८ दिनदेखि थुनामा रहेका उनीहरूलाई अनुसन्धानकै क्रममा ६० दिनसम्म थुनामा राख्ने सुविधा रहेको अनुसन्धानमा संलग प्रहरी अधिकारीले जानकारी गराएका छन् ।

हालसम्मको अनुसन्धानमा उनीहरूले ६ वटा बैंकबाट ५ अर्ब रुपैयाँभन्दा बढीको अवैधानिक कारोबार गरेको पाइएको छ । संगठित अपराध ऐनको दफा ५८ अनुसार मुद्दा चलाउनका लागि हदम्याद लाग्दैन भने दफा ४१ अनुसार मुद्दाको अभियुक्‍तले प्रमाण लोप वा नष्ट गर्न सक्ने वा त्यस्तो अभियुक्त फरार हुन सक्ने मनासिब कारण भएमा थुनामा राखी मुद्दाको पुर्पक्ष गर्ने आदशे दिन सक्‍ने व्यवस्था गरिएको छ ।

ठूलो रकमको चलखेल गरेको भन्दै एचसीसी सेग्रगेटकाे नाममा रहेका विभिन्न बैंकका खाता रोक्का गरिएको छ । सजिलै करोडपति बन्न सकिने लोभ देखाएर सर्वसाधारणलाई झुक्‍याई अवैधानिक कमोडिटी कारोबार गरिएको विषयमा अहिले अनुसन्धान जारी राखिएको छ ।

महानगरीय प्रहरी परिसरले टेकु नेपाल राष्ट्र बैंक, नेपाल धितोपत्र पत्र बोर्ड, विगतमा लगानी गरेका पीडित तथा विज्ञहरूको सहयोगमा अनुसन्धान गर्दै थप प्रमाण जुटाउन केन्द्रित छ ।

प्रहरीले स्पेल इन्भेस्टमेन्ट प्रालि र ट्रेडिङ क्लबका सञ्चालक सुनील श्रेष्ठ, उनकी पत्नी कञ्चन श्रेष्ठ, मर्कन्टाइल एक्सचेन्ज नेपाल लिमिटेड (मेक्स) का प्रमुख कार्यकारी अधिकृत जितेश सुरेन्द्रण र सो कम्पनीका प्रवक्ता नरेन्द्र भट्टलाई प्रकाउ गरी मुद्दा प्रकिया अघि बढाएको छ ।

साइप्रसबाट सफ्टवेयर सञ्चालन गरेर अवैध कारोबार गरेको समेत देखिएको छ । सर्वसाधारणलाई विश्वासमा ल्याउनका लागि मेक्स नेपालले वैधानिक कारोबार भएको र यसको नियमन धितोपत्र बोर्डले गर्ने, कारोबारमा अन्तर बैंक आवद्धता रहेको तथा कानुनअनुसार नै राजस्व काट्ने गरिएको दाबी गर्दै आएकाे थियो ।

यस्तो ठगीका लागि मेक्‍स नेपालले शेयर मार्केट तालिमको प्रचार सुरु गरेको थियो । कमोडिटी क्लबमा सञ्चालक सुनील श्रेष्ठले कमोडिटी कारोबारबाट अमेरिका, जापान, युरोपमा बस्ने तथा रोजगारी गरी कमाउने नेपालीले भन्दा बढी कमाइ हुन्छ, धितोपत्र बोर्डको दुई हाँगा भएको र एउटाले नेप्सेसम्बन्धी र अर्कोले कमोडिटी मार्केट हेर्ने गरेको भन्दै भ्रम सिर्जना गरेकाे पीडितहरूको गुनासो छ । जसका लागि २०७४ मा जारी गरिएको वस्तु विनिमय बजारसम्बन्धी ऐन देखाइएको थियाे ।

उनीहरूले सुनियोजित रूपमा लगानी बढाउने वातवरण बनाउनका लागि सुरूवातमा ह्वाट्स एप ग्रुप बनाएर किन्न भनेको बस्तु किनेपछि किनेको केही समयमा मूल्य बढ्‍ने र बेच्न भनेको बस्तु बेचेको केही समयमा मूल्य घट्ने गरी व्यवस्था मिलाउने गरेका थिए । तर, लगानी बढ्दै जाँदा ठिक उल्टो हुने गरेको गुनासो पीडितहरूको छ ।

यसरी दिनदिनै लगानी बढ्दै जाने र मूल्य घट्दै जाने भएपछि लगानीकर्ताहरू धितोपत्र बोर्डमा पुगेका थिए । अवैधानिक भएको थाहा पाएपछि उनीहरूमा प्रहरीकोमा उजुरी गर्न पुगेका थिए । याे कमाेडिटी मार्केटका नाममा कति ठगी यकिन नभए पनि कम्तिमा पाँच अर्ब रुपैयाँ बराबरकाे अवैध काराेबार भएकाे प्रहरीकाे प्रारम्भिक अनुसन्धानले देखाएकाे छ ।

सम्बन्धित समाचार

प्रकाशित मिति: शुक्रबार, पुस २९, २०७९ १७:४४