शेयरबजार र राजनीति दुवैमा अनपेक्षित उतारचढाव, २१ अंकको ह्रास तर कारोबारमा ४० प्रतिशतको वृद्धि

शेयरबजार र राजनीति दुवैमा अनपेक्षित उतारचढाव, २१ अंकको ह्रास तर कारोबारमा ४० प्रतिशतको वृद्धि

A+ A A-

मंगलबार नेपालको राजनीति र शेयरबजारमा निकै उथलपुथल देखियो । शेयर र राजनीति दुवैमा अनपेक्षित उतारचढाव देखियाे ।

आज सरकारले विश्‍वासको मत लिने दिन । दुई दिन अघिसम्म कांग्रेसले खेलेको खेलले कतै सराकारले विश्‍वासको मत नपाउने अवस्था आउँछ कि ? भन्ने आशंका उब्जिएको थियो ।

मंगलबार बिहान १० बजेसम्म पनि कतिपय कुराहरू आशंकामा रहेका थिए । शेयरबजार सधैँ आशंकामै हुन्छ ।सोमबार शेयरबजार उकालो लागेर कारोबार बन्द भएकोमा मंगलबार भने बजारमा सुरूवातबाट नै उतारचढाव देखियो ।

सरकारले विश्वासको मत लिने दिन १२: ४० बजेसम्म शेयर बजार ६१ अंकले उकालो लागेको थियो । तर सरकारलाई विश्‍वासको मत दिने वा नदिने निर्णय पदाधिका बैठकबाट लिन नसकेपछि कांग्रेसले कार्यसम्पादन समितिको बैठक बोलायो। कार्यसम्पादन समितिले सरकारलाई विश्‍वासको मत दिने निर्णय लिएसँगै २५ मिनेटको अवधिमा शेयरबजार उच्‍च अंकले ओरालो लाग्यो ।

२२ सय १५ को आधार सूचकमा दिउँसो २ बजे नेप्से ३१ अंकले ओरालो लाग्यो । यसमा केही लगानीकर्ताको बुझाइ सरकार नै हेरफेर हुने र नीतिगत प्रभाव पर्नेसम्मको भएको देखियो । ‘लामो सयम ठूलो क्षेति व्यहाेरेका लगानीकर्तामा अहिले आशाको त्राण देखिएको थियो । तर कांग्रेसले पनि विश्वासको मत दिने निर्णय गरेपछि लगानीकर्तामा राजनीतिक अस्थिरतामा त परिने होइन भन्ने त्रास उत्‍पन्न भएको देखिन्छ', एक ठूला लगानीकर्ताले शिलापत्रसँग भने ।

सरकारले विश्वास मत पाउने आशामा शेयरबजार बढेको आंकलन गर्ने हो भने कांग्रेसले विश्‍वासको मत दिँदा शेयर सूचक थप उकालो लाग्नुपर्ने हो । तर निर्णय सार्वजनिक भएको केही समयमा नै लगानीकर्तामा अनिश्चिता देखियो । यही समयमा धेरै कारोबार भयो । अर्थात् नाफा बुक गरेर शेयर बिक्रीको चाप बढ्यो ।

तर ३१ अंकको ओरालो भने लामो समय रहेन । बजारमा लगातर उतारचढाव देखियो । २२ सय १५ कै आधार विन्दुमा २ बजेर ८ मिनेट जाँदा बजार २० अंकले उकालो लाग्यो । शेयरबजारमा यसरी उतारढाव भएको थियो कि संसद्मा कुन नेता बोल्दा रुचाइएको छ वा कुन नेता बल्दा रुचाइएन भन्ने देखिन्थ्याे । जस्तै प्रचण्ड बोल्दा बोल्दै घटिरहेकाे बजार उकालो लाग्यो तर देउवा बोलेपछि फेरि १७ अंकको ह्रास भइसकेको थियो ।

दिउँसो २: २७ सम्म बजारमा १७ अंकले ह्रास आएको थियो । २:४४ बज्दा ४ अंकले उकालो लागेको थियो ।

१९ मिनेटपछि १७ अंकले ह्रास आयो । कारोबार बन्द हुने समयमा २१ अंकले ह्रास आएर २१ सय ९० को विन्दुमा अडियो ।

यसदिन कारोबार रकम भने पछिल्लो १५ महिना यताकै उच्च विन्दुमा पुग्यो । नेप्से २१ अंकले ह्रास आउँदा कारोबार भने ४० प्रतिशतले अर्थात् अघिल्लो दिनको तुलनामा २ अर्ब १९ करोड रुपैयाँले बढेर ७ अर्ब ६५ कराेड पुग्यो । पुस १० गतेभन्दा पहिला दैनिक ८४/८५ करोड रुपैयाँको मात्र कारोबार हुने गरेकाे थियाे ।

शेयर लगानीकर्ता छोटेलाल रौनीयार राजनीतिक कारणलेभन्दा लगानीकर्ता नाफा बुक गर्नतर्फ केन्द्रित हुँदा शेयरबजारमा केही ह्रास र उच्च कारोबार भएको बताउँछन् । ‘धेरै लामो समय लगानीकर्ताले गुमाएका थिए । बढेको बजारमा लगानीकर्ता नाफा बुकमा केन्द्रित भएको कारण केही ह्रास आएको हुन सक्छ’, रौनियारले भने ।

प्रकाशित मिति: मंगलबार, पुस २६, २०७९ १५:३०