प्रदेश १ मा एमालेका कार्की बन्लान् मुख्यमन्त्री ?

A+ A A-

एमालेको समर्थनमा माओवादी केन्द्रका अध्यक्ष पुष्पकमल दाहाल ‘प्रचण्ड’ प्रधानमन्त्री बन्ने निश्चित भएसँगै प्रदेश १ सरकार गठनको समीकरणको चित्र पनि लगभग देखिएको छ ।

९३ सदस्यीय प्रदेशसभामा सरकार निर्माणको लागि बहुमत जुटाउन ४७ सांसद आवश्यक पर्छन् । एमालेसँग ४० सांसद छन् । राप्रपाका ६ जना सांसदले यसअघि नै प्रदेश सरकारमा एमालेलाई सघाउने सङ्केत दिएको थियो । त्यसैले राप्रपासँग एमाले ढुक्क थियो ।

तर, एमालेले अझै थप एक सांसदको खोजीमा थियो । जुन जसपाले पूर्ति गर्न सक्थ्यो । चुनावमा सँगै भएको जसपा भने कांग्रेस नेतृत्वको सरकारमा सहभागी हुने सङ्केत दिएपछि एमालेभित्र सरकार गठनलाई लिएर अन्योल थियो ।

एक सांसद मात्र रहेको जसपा कांग्रेस-माओवादी-एसको गठबन्धनमा ढल्किएपछि भने एमालेले प्रदेश १ मा सरकार बनाउने सम्भावना कमजोर बनेको थियो । अब भने माओवादीसँग समेत सहकार्य गर्ने भएपछि एमाले नेतृत्वमा सरकार बन्ने निश्चित जस्तै देखिएको छ ।

समीकरणमा माओवादीसहित जसपा समेतको इन्ट्री भएपछि सरकार बन्ने 'सिन' स्पष्ट देखिएको हो । यद्यपि, प्रदेश १ सरकारको नेतृत्व कसले गर्ने भन्ने विषयको टुङ्गो केन्द्रमा एमाले–माओवादीको केन्द्रीय नेतृत्वले गर्ने सहमति भएको छ ।

'केन्द्रीय स्तरबाटै प्रदेशको नेतृत्वको विषय टुङ्गो लाग्छ,' सरकार कसको नेतृत्वमा बन्छ त भन्ने शिलापत्रको प्रश्नमा एमालेका प्रदेश सांसद रेवतीरमण भण्डारीले भने, ‘अब, प्रदेश १ मा एमाले ठूलो पार्टी हो । त्यो पनि बहुमत नजिकको त्यसैले सरकार बनाउँदा एमालेकै नेतृत्वमा बन्छ ।'

प्रदेश १ मा सबैभन्दा ठूलो दल रहेको एमालेसँग ४० सांसद छन् । माओवादी केन्द्रसँग १३, राप्रपासँग ६ र जसपासँग १ सांसद छन् । सबै सांसदको सङ्ख्या जोड्दा ६० पुग्छ । ९३ जनाको प्रदेशसभामा बहुमतका लागि ४७ जना भए पुग्छ ।

उता, नेपाली कांग्रेससँग २९ र नेकपा एससँग ४ जना सांसद गरी ३३ जना रहेका छन् । नेकपा एस केन्द्रीय स्तरमा सरकारमा सहभागी नभएकोले प्रदेश १ सरकारमा पनि उसको सहभागिता स्पष्ट भइसकेको छैन ।

एमाले नेता हिक्मत कार्की मुख्यमन्त्री बन्ने सम्भावना उच्च

आइतबार मात्र नेकपा एमालेले प्रदेश १ संसदीय दलको नेतामा हिक्मतकुमार कार्की सर्वसम्मत निर्वाचित भएका छन् । आइतबार बसेको संसदीय दलको बैठकले तिलकुमार नेम्वाङ र रेवतीरमण भण्डारीको समर्थनमा कार्की दलको नेता चयन भएका थिए ।

एमाले अध्यक्ष केपी ओली निर्वाचित भएको झापा क्षेत्र नम्बर १ अन्तर्गतको प्रदेशसभा क्षेत्र नम्बर १ बाट कार्की निर्वाचित भएका थिए ।

शेरधन राई मुख्यमन्त्री हुँदा आन्तरिक मामिला तथा कानुन मन्त्रालय कार्कीले सम्हालेका थिए । एमालेले प्रदेश १ को मुख्यमन्त्री पाउने माओवादीसँग सहमति भए उनै कार्की मुख्यमन्त्री हुने देखिएको छ ।

प्रकाशित मिति: आइतबार, पुस १०, २०७९ १८:१४