मतदान सकिएपछि देउवाको वक्तव्य– लोकतन्त्रप्रतिको अगाध र अविचलित आस्था अभिव्यक्त भयो

मतदान सकिएपछि देउवाको वक्तव्य– लोकतन्त्रप्रतिको अगाध र अविचलित आस्था अभिव्यक्त भयो

A+ A A-

प्रधानमन्त्री तथा नेपाली कांग्रेसका सभापति शेरबहादुर देउवाले देशभर उत्साहजनक रूपमा मतदान सम्पन्न भएको भन्दै लोकतन्त्र र गणतन्त्रप्रति अगाध र अविचलित आस्था अभिव्यक्त भएको बताएका छन् ।

आइतबार साँझ एक वक्तव्य जारी गर्दै देउवाले भनेका छन्, ‘यो आमनिर्वाचनमा तपाईंहरूले आफ्नो नागरिक अधिकारको प्रयोग गरिरहँदा दशकौँदेखिको लोकतन्त्रप्रतिको साधना र समर्पण फेरि एकपटक उजागर भएको छ । मतदानमा भएको यो उत्साहपूर्ण सहभागिताले नेपाली नागरिकका मनमा रहेको लोकतन्त्रप्रतिको अगाध र अविचलित आस्था अभिव्यक्त भएको छ ।’

उनले आवधिक निर्वाचन लोकतन्त्रको अनिवार्य सर्त रहेको भन्दै यो निर्वाचनबाट आउने परिणामले मुलुकलाई स्वाधीन, स्वाभिमानी र समुन्नत बनाउँदै लोकतान्त्रिक संस्कार र संस्कृतिमा आधारित समतामूलक समाज निर्माणमा सहयोग गर्ने विश्वास व्यक्त गरेका छन् ।

उनले भनेका छन्, ‘निर्वाचनमा अत्यन्त उत्साह, संयम र धैर्यका साथ सरिक भई अमूल्य मत खसाल्नु भएकोमा सम्पूर्ण दिदीबहिनी तथा दाजुभाइप्रति हार्दिक आभार एवं कृतज्ञता व्यक्त गर्दछु । निर्वाचनमा तपाईंहरूको सक्रियता र उत्साहपूर्ण सहभागिताका साथ अमूल्य मत खसाल्नुभएकोमा सरकार र राजनीतिक दलहरूलाई थप प्रेरणा दिएको छ । साथै, संघीय लोकतान्त्रिक गणतन्त्रलाई सुदृढ र संस्थागत गर्न ठूलो योगदान पुर्‍याएको छ ।’

देउवाले शान्तिपूर्ण र भयरहित वातावरणमा निष्पक्ष र धाँधलीरहित निर्वाचन गराउन सफल भएकोमा निर्वाचन आयोगलाई विशेष धन्यवाद दिएका छन् । उनले निर्वाचन सफल गराउन अहोरात्र खटिएका राष्ट्रसेवक कर्मचारी र सुरक्षा निकायलाई पनि धन्यवाद दिएका छन् ।