दाङ २: रेखालाई कांग्रेसको मत ट्रान्सफर नहुने डर, शंकरलाई स्वतन्त्रको भर

A+ A A-

सत्ता गठबन्धनबाट दाङ क्षेत्र नम्बर २ मा प्रतिनिधिसभा सदस्य उम्मेदवार माओवादी केन्द्रकी नेतृ रेखा शर्माले आफूले चुनाव जित्ने दाबी पेस गर्दै भनिन्- गठबन्धन नै मेरो जित्ने पहिलो आधार हो । स्थानीय तहको चुनावमा कांग्रेस र माओवादी केन्द्रबीच गठबन्धन भए पनि घोराही उपमहानगरपालिकाको मेयर र उपमेयर दुवै एमालेले जितेको थियो । तर, स्थानीय तहको चुनावमा मत बदर हुँदा सत्ता गठबन्धनले चुनाव हारेको भन्दै प्रतिनिधिसभा सदस्य उम्मेदवार शर्माले यसपटक त्यही श्रृंखला नदोहोरिने बताउँछिन् ।

'स्थानीय तहको चुनावको मतपरिणाम हेर्दा केही आशंका गर्ने ठाउँ छन् । तर, त्यतिबेलाको जस्तो मतपत्रमा अहिले जटिलता छैन । त्यसैले मैले चुनाव जित्छु,' शर्माले शिलापत्रसँग भनिन् । घोराही उपमहानगरपालिकाको प्रमुख/उपप्रमुखको हारबारे प्रष्टीकरण दिँदै भनिन्, ‘बदर मतको संख्या जोड्ने हो भने हामीले जितेको चुनाव हो । १० हजार मत बदर छ, ५ हजार मतले हामीले हारेको छ । त्यसैले प्राविधिक रूपले मात्रै चुनाव हारेका हौँ ।’

सत्ता गठबन्धनकी शर्मासँग एमाले महासचिव शंकर पोखरेल चुनावी मैदानमा छन् । चुनावी प्रचारमा रहेका महासचिव पोखरेलले गठबन्धनको राजनीतिक बाटो गलत रहेकाले आफूले चुनाव जित्ने दाबी गरे । ‘उम्मेदवारको कारण भन्दा पनि राजनीतिक कारणले को कति सेफ हुन्छ भन्ने मुख्य विषय हो । व्यक्तिगत रूपमा म कुनै टिप्पणी गर्न चाहन्नँ । उहाँहरूको राजनीति गलत बाटोमा छ । विकास र समृद्धिको बाधक उहाँहरू हो । नीतिगत मान्यता जनताका बीचमा लिएर जाने कुरामा अन्योल छ,’ उनले भने, ‘चुनाव भनेको पार्टीको नीति र नेतृत्वलाई स्थापित गर्ने एउटा पद्धति हो । जब नीतिमै अन्योल छ भने त्यसले राष्ट्रको नेतृत्व गर्न सक्दैन ।’

दाङ २ मा जनमतका हिसाबले एमाले पहिलो, कांग्रेस दोस्रो र माओवादी केन्द्र तेस्रो दल हो । कांग्रेस र एमालेको मत लगभग बराबरीकै अवस्था छ । तर, गठबन्धन हुँदा भने कांग्रेसको मत सोचेजस्तो ट्रान्सफर हुन सकेको छैन । गठबन्धन हुँदा पनि स्थानीय तहको चुनावमा पार्टीभित्रको आन्तरिक विवादकै कारण कांग्रेसकै उम्मेदवारले जित निकाल्न सकेका छैनन् । यसले के देखाउँछ भने मा‌ओवादी केन्द्रका उम्मेदवारलाई दाङ २ बाट कांग्रेसको पूरै भोट ट्रान्सफर हुँदैन । कांग्रेसको मत माओवादीका उम्मेदवारलाई ट्रान्सफर नहुँदा माओवादी केन्द्रका उम्मेदवारलाई यसपटक पनि भारी पर्न सक्छ ।

२०७४ सालको चुनावमा समानुपातिकतर्फ एमालेले २२ हजार ८ सय ६९ मत र कांग्रेसले २२ हजार ९२ मत ल्याउँदा माओवादी केन्द्रले १७ हजार ५ सय ८४ मत पाएको थियो । अघिल्लो चुनावमा एमाले र माओवादी केन्द्रबीच गठबन्धन हुँदा माओवादी केन्द्रका कृष्णबहादुर महरा १० हजारभन्दा बढीको मतान्तरले विजयी भएका थिए ।

तर, यसपटक कांग्रेस र माओवादी केन्द्रबीच गठबन्धन भएको छ । त्यसैले मतका हिसाबले सत्ता गठबन्धन एमालेभन्दा केही अगाडि छ । राष्ट्रिय स्वतन्त्र पार्टीबाट इन्जिनियर विशाल अधिकारी उम्मेदवार छन् । स्वतन्त्र पार्टीका अधिकारीले युवाको मत तान्ने देखिएको छ । यसले मा‌ओवादीकी शर्मा र एमालेका पोखरेलबीचको प्रतिस्पर्धालाई थप रोचक बनाउनेछ । ‍घण्टी चुनाव चिह्न लिएर मैदान उत्रिएका अधिकारीले कांग्रेसको भोट तान्ने खतरा बढी छ । प्रतिनिधिसभामा कांग्रेसको उम्मेदवार नभएकाले पनि कांग्रेसी कार्यकर्ताको रोजाइ घण्टी बन्न सक्ने विश्लेषण भइरहेको छ ।

माओवादी पीडित कांग्रेसीहरूले माओवादीको चिह्नमा भोट हाल्न नमान्ने र एमालेलाई पनि नदिने भएकाले उक्त भोट स्वतन्त्र पार्टीतिर जाने सक्ने सम्भावना बढी देखिएको छ । स्वतन्त्र पार्टीका अधिकारीले कांग्रेससँगै युवा पुस्ताको भोट ताने सत्ता गठबन्धनकी उम्मेदवार शर्मालाई चुनाव जित्न गाह्रो पर्ने देखिन्छ । पहिलो पटक प्रत्यक्ष चुनावमा होमिएकी शर्माको छवि बेदाग छ । तर, उनलाई गठबन्धनभित्रै दल कांग्रेसको भोट जोगाउने चुनौती उत्तिकै छ ।

एमाले महासचिव पोखरेललाई राष्ट्रिय नेताको छवी र लुम्बिनी प्रदेशको राजधानी दाङ ल्याएको जसले केही हदसम्म फाइदा हुने देखिन्छ । घोराही उपमहानगरपालिकाको मेयरमा चौधरी समुदायका नरुलाल चौधरी निर्वाचित भएकाले पनि थारूको मत एमालेले तान्न सक्ने देखिएको छ । यस क्षेत्रमा थारूहरूको मत निर्णायक हुने देखिन्छ । थारूको मत तान्न एमालेले घोराहीका मेयर नरुलाललाई खटाएको छ । यसले पनि चुनावी नजितामा केही हदसम्म फरक पार्नेछ ।

सँगैसँगै कांग्रेस नेता खुमबहादुर खड्काको निधनपछि राष्ट्रियस्तरमा प्रभाव जमाउन सक्ने नेताको अभाव दाङ्गालीलाई खड्केको छ । खड्कापछि उपल्लो पदमा पुगेका नेता हुन् पोखरेल । २०७० सालको दोस्रो संविधानसभामा समानुपातिकतर्फबाट सभासद् बनेकी शर्मा २०७२ मा सामान्य प्रशासनमन्त्री बेनेकी थिइन् । २०७४ सालमा पनि उनी समानुपातिकतर्फबाट नै सांसद बनिन् । पोखरेल २०५१ सालमा पहिलोपटक दाङ-३ बाट चुनाव जितेका थिए । त्यसपछिका २०५६ र २०७० को चुनावमा भने पोखरेल पराजित भए । २०७४ मा प्रदेशसभा सदस्य जितेर पोखरेल लुम्बिनी प्रदेशको संस्थापक मुख्यमन्त्री भए ।

गठबन्धनबाट प्रदेशसभातर्फ दाङ २ 'क' मा कांग्रेसका राजु खनाल र 'ख' मा प्रचण्डविक्रम न्यौपाने उम्मेदवार छन् । एमालेबाट २ 'क' बलिभद्र राना र 'ख' मा गिरिराज केसी उम्मेदवार छन् । पत्रकार महासंघ अगाडि भेटिएका नागरिक अगुवा केबी मसालले एक स्थानीयलाई भन्दै थिए, ‘आज कता छ चुनावी अभियान ? जित्ने त हो क्यारे !’ उनले यसोभन्दा ती युवा मौन थिए । उनी एमालेका शुभेच्छुक रहेछन् ।

सँगै भेटिएका नरेश आचार्य भने कांग्रेस शुभेच्छुक रहेछन् । कांग्रेस कार्यकर्ताले पूर्ण रूपमा गठबन्धनलाई गर्ने सहयोग/असहयोगले नजितामा फरक पार्ने आचार्य बताउँछन् । ‘कांग्रेस मतदाताले के गर्छन् भन्ने छ । पोखरेलेको राष्ट्रिय व्यक्तित्वले पनि काम गर्छ,’ उनले भने । द्वन्द्वकालीन घटनाले कांग्रेसको सबै मत माओवादीलाई जानेमा शंका रहेको उनले बताए ।

एमालेका पोखरेलले कांग्रेसको मत तान्न धेरै जोड गरिरहेका छन् । पोखरेल प्रदेश 'ख' मा कांग्रेसका उम्मेदवारलाई सघाएर कांग्रेसको भोट आफूतिर तान्ने रणनीतिमा रहेको गठबन्धनकै कार्यकर्ता बताउँछन् । दक्षिणी भेगमा माओवादीका स्थानीय नेताहरूलाई पार्टी प्रवेश गराएको एमालेले बंगलाचुलीमा बढी ध्यान केन्द्रित गरेको छ । ‘पहिले हामी त्यहाँ (बंगलाचुली) मा कमजोर थियौँ । बराबरीमा ल्याउने हाम्रो प्रयास हो,’ पोखरेलले शिलापत्रसँग भने ।

लुम्बिनी प्रदेशको राजधानी दाङ ल्याएको जस पोखरेललाई छ । रुपन्देही र दाङको द्वन्द्वको फाइदा पनि पोखरेललाई छ । बुटवलमा एमाले उपाध्यक्ष विष्णु पौडेल र कांग्रेस नेता बालकृष्ण खाँणले राजधानी बुटवल सार्ने बताइरहेका छन् । तर, यसले पोखरेललाई भने फाइदा गर्ने एमाले कार्यकर्ताको बुझाइ छ । ‘राजधानीका विषयमा उहाँहरूले त्यसो बोल्नु भनेको महासचिव पोखरेललाई झन् फाइदा हुनु हो,’ प्रदेश 'क' का एमाले उम्मेदवार रानाले भने ।

घोराही उपमहानगरपालिका १, २, ३ र ५ बाहेकका सबै वडा, बंगलाचुली गाउँपालिका र तुलसीपुर उपमहानगरपालिकाका १६, १७, १८ र १९ नम्बर वडा पर्छन् । वडाध्यक्षका उम्मेदवारहरूले पाएको मतलाई आधार मान्ने हो भने एमालेले ३३ हजार ५९३ मत पाएको छ । कांग्रेसले २३ हजार तीन सय एक, माओवादी केन्द्रले १० हजार चार सय ७८ र नेकपा एकीकृत समाजवादीले दुई हजार ९४२ मत पाएको छ । स्थानीय तहको मतलाई आधार मान्दा गठबन्धनको मत ३६ हजार सात सय २१ मत छ भने एमालेको ३३ हजार ५९३ मत छ ।

यी पनि पढ्नुस् :

प्रतिगमनको विपक्षमा एमालेका इमानदार कार्यकर्ताले पनि मलाई भोट हाल्छन् : रेखा शर्मा

राष्ट्रको नेतृत्व गर्न नसक्ने गठबन्धनले राष्ट्रिय राजनीतिको नेतृत्व गर्छ भन्ने प्रश्नै आउँदैन: शंकर पोखरेल

चुनावी मुद्दा मात्र बन्छ दाङको विमानस्थल, प्रायः रद्द हुन्छ नेपाल एयरलाइन्सको उडान

प्रकाशित मिति: बिहीबार, मंसिर १, २०७९ १२:५८