प्रतिगमनको विपक्षमा एमालेका इमानदार कार्यकर्ताले पनि मलाई भोट हाल्छन् : रेखा शर्मा

प्रतिगमनको विपक्षमा एमालेका इमानदार कार्यकर्ताले पनि मलाई भोट हाल्छन् : रेखा शर्मा

A+ A A-

दाङ क्षेत्र नं २ मा एमाले महासचिव शंकर पोखरेल र सत्ता गठबन्धनबाट माओवादीकी रेखा शर्मा चुनावी प्रतिस्पर्धामा छन् । एमाले अध्यक्ष केपी शर्मा वलीको विश्वासपात्र र पार्टीको भावी नेतृत्वकर्ता पोखरेल र माओवादी अध्यक्ष पुष्पकमल दाहाल प्रचण्डकी विश्वासपात्र शर्माबीचको प्रतिस्पर्धा दुवै पार्टीका लागि प्रतिष्ठाको विषय बनेको छ । २०७४ मा यो क्षेत्रबाट माओवादी केन्द्रका कृष्णबहादुर महरा विजयी भएका थिए ।

२०७० सालको दोस्रो संविधानसभामा समानुपातिकतर्फबाट सभासद् बनेकी शर्मा २०७२ मा सामान्य प्रशासनमन्त्रीसमेत बेनेकी थिइन् । २०७४ सालमा पनि उनी समानुपातिकबाटै सांसद बनिन् ।

दाङ– २ मा घोराही उपमहानगरपालिकाका १६, १७, १८ र १९ नम्बर वडा र बंगलाचुली गाउँपालिका पर्छन् । यो निर्वाचन क्षेत्रमा सत्ता गठबन्धनका वडाध्यक्ष उम्मेदवारहरूको मत जोड्दा कुल ३६ हजार १ सय ४६ छ । नेकपा एमालेका वडाध्यक्ष उम्मेदवारहरूको पनि ३३ हजार ५ सय ९३ मत छ ।

माओवादीकी स्थायी कमिटी सदस्य रहेकी शर्मासँग चुनावी तयारीबारे शिलापत्रका लागि दिपेन्द्र अधिकारीले गरेको कुराकानी:

प्रतिपक्षी उम्मेदवार त हेभिवेट हुनुहुन्छ । उहाँलाई हराउने तयारी कस्तो छ ?

कसैले कसैलाई हराउनेभन्दा पनि निर्वाचनमा सहभागी हुने, प्रतिस्पर्धा गर्ने र प्रतिस्पर्धाबाट विजयी हुने कुरा हो । तपाईंको कुरामा म सहमत छैन । वेटका कुरामा म सहमत छैन । हेभिवेट केलाई भन्ने हो ? चुनावका एजेन्डा, विषयवस्तु र प्रतिबद्धताका आधारमा चुनाव लड्ने र जित्ने कुरा हो । जनताको विश्वास प्राप्त गर्ने कुरा हो । जनमत प्राप्त गर्ने कुरामा कसैलाई हराउने भन्दा पनि संविधान, लोकतन्त्र, गणतन्त्रको रक्षा गर्ने शक्तिले जित्नुपर्छ, प्रतिगमनले हार्नुपर्छ ।

सुरुवातमा माओवादीका साथीहरू एमालेमा प्रवेश गरेकाले कमजोर भएका थियौँ । अहिले हाम्रा मान्छे फर्किने त छँदैछ । एमालेका कार्यकर्ता पनि हाम्रो पार्टीमा प्रवेश गरेका छन् ।

विशेष योजनाभन्दा पनि जनतासँग नजिक छौँ । एजेन्डाहरू सार्वजनिक गरेका छौँ । गठबन्धन हुँदा पनि उम्मेदवारको कुरा आउँछ । गणतन्त्र प्राप्तिको आन्दोलनमा, संविधान र कानुन निर्माणको प्रक्रियामा, दाङको विकास निर्माण र समृद्धिको कुरामा मेरो नकारात्मक भूमिका छैन, सकारात्मक नै छ ।

गठबन्धन भैरहँदा मत क्रस गर्ने शंका छ । बलियो गठबन्धन बनाउने योजना के–के छ ?

गठबन्धन बलियो बनाउने आधार त केका लागि गठबन्धन भन्ने नै आधार हो । त्यो उद्देश्यप्रति प्रतिबद्ध भयो भने गठबन्धन त बलियो छँदैछ नि । हिजोको स्थानीय तहको चुनाव हेरेर आशंका गर्ने ठाउँ पनि छ । हिजो मतपत्रमा भएको जटिलता कैयन् कुराहरू पहिलो अभ्यासमा थियो । बदरको संख्या जोड्ने हो भने हामीले जितेको चुनाव हो । १० हजार मत बदर छ, ५ हजार मतले हारेको छ । प्राविधिक रूपले हारेको चुनाव हो । अहिले जटिलता छैन । हिजो मतदाता शिक्षामा पुर्‍याउन नसकेको ध्यानलाई अहिले करेक्सन गरिसकेका छन् । गठबन्धनका दलभित्र हिजोको भन्दा धेरै एकता छ । सबैले के बुझेका छन् भने स्थानीय तहको चुनाव र प्रतिनिधिसभाको चुनाव फरक हो । यो संविधान र कानुन बनाउन र बदल्न सक्ने नेतृत्व चयन गर्ने चुनाव हो । त्यस कारण संविधान र गणतन्त्रका पक्षधरले जित्नुपर्छ भन्ने कुरामा विमति छैन । गठबन्धनको एकता र बल त्यसैको तागतमा अड्किएको छ ।

यो क्षेत्र तपाईंको जन्मस्थान पनि रहेछ । सशस्त्र द्वन्द्वमा माओवादीबाट पीडित भएको कांग्रेसको मत रहेछ । जन्मस्थान भएकाले अलि सहज रहेको बुझाइ पनि रहेछ । द्वन्द्वको समयका क्रियाकलापले असर पार्ला नि । घोराहीको कोर सिटी र बंगलाचुली क्षेत्रमा मत ट्रन्सफर गर्न गाह्रो छ कि छैन ?

बंगलाचुलीमा काठमाडौं र घोराहीबाट हेर्दा खस्किएको देखिन्छ । तर, हामले भर्खरै सो क्षेत्रमा कार्यक्रम गरेका छौँ । हिजोभन्दा राम्रो भएर आउँछ भन्नेमा ढुक्क छौँ । सुरुवातमा माओवादीका साथीहरू एमालेमा प्रवेश गरेकाले कमजोर भएका थियौँ । अहिले हाम्रा मान्छे फर्किने त छँदैछ । एमालेका कार्यकर्ता पनि हाम्रो पार्टीमा प्रवेश गरेका छन् ।

घोराही कोर सिटीमा द्वन्द्वको प्रभावको कुरा छ । हिजो हामी सबै पीडित थियौँ । राज्य र माओवादीबाट पीडित छन् । त्यो समयको कुरा थियो । तर, त्यो सबै पीडा सहेर आज यहाँसम्म आइपुग्यौँ । समाजलाई सधैँ द्वन्द्वमा लाने होइन । मेलमिलपले अघि बढाउनुपर्छ । यहाँ कसैले भाँडभैलो गर्न खोज्दैछन् । कांग्रेसका परिवारलाई भेटेर 'माओवादीलाई किन भोट हाल्ने हिजो द्वन्द्वमा विस्थापित गरेका छन्, हिजो दु:ख दिएका छन्' भन्ने माओवादीहरू नै भित्र गएरचाहिँ 'उनीहरू बुर्जुवा हुन्, टाउकोको मूल्य तोक्ने कांग्रेसहरू हुन्, तिमीहरू हामीसँग मिल्नुपर्छ' भन्ने खुरापाती चलिरहेको छ । त्यो त थाहा भएकै कुरा हो, त्यसबाट कोही प्रभावित छैनन् ।

द्वन्द्वमा हामी सबैले दु:ख पायौँ । म पनि श्रीमान्‌सहित एक वर्ष आर्मीको हिरासतमा बसेर शारीरिक मानसिक पीडा खपेर आएकी हुँ । त्यो बेला यहीँका नेता गृहमन्त्री हुनुहुन्थ्यो । मैले त्यो सम्झेर पुग्छ ? पुग्दैन नि । गणतन्त्र प्राप्तिको आन्दोलनमा मेरो योगदान थियो । अरुले पनि त्यसरी बुझ्नुहुन्छ भन्ने अपेक्षा छ । जहाँसम्म विस्थापित भएर आएकाहरूसँग छलफल गरिरहेका छौँ । मासमा त्यस्तो छैन ।

एमालेभित्र पनि गुटको प्रभाव र प्रतिस्पर्धा छ । यसले तपाईंको चुनावी माहौलमा कतिको प्रभाव पार्छ ?

जित निस्कनुपर्छ । नजित्ने कारण नै छैन । जनताको मन जित्ने एजेन्डा छन् । दाङको समृद्धि र विकासका लागि प्रतिबद्ध छौँ । गठबन्धनको भोट मात्र जोड्ने हो भने पनि हामी अगाडि छौँ । चुनाव जित्न अंकगणितले मात्र हुँदैन ।

उहाँहरूभित्र गुट छ, द्वन्द्व छ भनेर हामीले हेरेका छैनौँ । हामी हाम्रै तयारीमा छौँ । मलाई विश्वास छ कि एमालेभित्र थुप्रै इमानदार कार्यकर्ता पनि हुनुहुन्छ । जो हिजो पार्टी विभाजन हुँदा एकताको पक्षमा हुनुहुन्थ्यो । पछिल्लोपटक आउँदा संसद् विघटनको विपक्षमा हुनुहुन्थ्यो । हाम्रो संविधानको रक्षाको पक्षमा हुनुनुहुन्थ्यो । उहाँहरूले पनि मलाई मतदान गर्नुहुन्छ । मेरो अपिल र आग्रह पनि छ ।

संविधान जोगाउने, संसद् विघटनको विरोध गर्ने र संसद् पुनर्स्थापना गर्ने सवालमा हस्ताक्षर गर्दा हामी एक ठाउँमा थियौँ । प्रतिगमनको पक्षमा उभिनेभन्दा प्रतिगमनविरुद्धमा दृढ भएर उभिने पक्षमा उहाँहरूलाई मतदान गर्न सहज हुन्छ । मतदान गर्दा उहाँहरूले सोच्नुहुन्छ ।

जित निस्कनेमा ढुक्क हुनुहुन्छ ?

जित निस्कनुपर्छ । नजित्ने कारण नै छैन । जनताको मन जित्ने एजेन्डा छन् । दाङको समृद्धि र विकासका लागि प्रतिबद्ध छौँ । गठबन्धनको भोट मात्र जोड्ने हो भने पनि हामी अगाडि छौँ । चुनाव जित्न अंकगणितले मात्र हुँदैन । मतदाता शिक्षा कत्तिको पुग्छ, पुर्‍याउन सकिन्छ कि सकिँदैन ? कति मतदाताकहाँ पुग्न सकिन्छ । अजेन्डाका बारेमा कतिलाई बुझाउन सकिन्छ ? आफ्नो ठाउँमा मिहिनेत गरिरहेका छौँ । विजयी हुने कुरामा विश्वस्त छौँ ।

प्रकाशित मिति: बुधबार, कात्तिक ३०, २०७९ ०६:२४