चुनावी मुद्दा मात्र बन्छ दाङको विमानस्थल, प्रायः रद्द हुन्छ नेपाल एयरलाइन्सको उडान

चुनावी मुद्दा मात्र बन्छ दाङको विमानस्थल, प्रायः रद्द हुन्छ नेपाल एयरलाइन्सको उडान

A+ A A-

'नेता चढेको भए प्लेन बिग्रदैनथ्यो । नेताका छोरा, मामा कोही गएका रहेछन् । त्यसैले फ्लाइट क्यान्सिल भयो,’ तुलसीपुसर ६ का सुजित लामिछाने भुतभुताउँदै शुक्रबार दिउँसाे साँढे १ बजे दाङ एयरपोर्टको टर्मिनल भवनभित्र छिरे । लगेजसहित अटो रिक्सामा चढे । १ बजे तुलसीपुरबाट काठमाडौं उडानको टिकट लिएर एयरपोर्ट पुगेका उनले उडान रद्द भएको सूचना आएपछि अटो बोलाएका रहेछन् ।

‘चुनाव लागेको छ भोट माग्न आउछन् एयरपोर्ट बनाउँछु भन्छन्, अब भोट हालेपछि केही केही छैन ... केही मागेको पनि होइन’, यस्तै निराशा पोखेर लामिछाने अटोमा हुँइकिए ।

‘कसले भन्यो फ्लाइट क्यान्सिल भनेर ? फोन गरन त्याँ ...’ टिकट काटिदिने आफन्तलाई फोन गर्न भन्दै थिइन् अर्की महिला । उनको बहिनी प्रविना परियार काठमाडौंबाट आउने प्लेन हेर्दै आकाशमा नजर डुलाइरहेकी थिइन् ।

‘तुलसीपुसर उपमहानगरका पूर्व प्रममुखले पहिले हप्तामा दुईवटा उडान हुन्थ्यो अहिले हप्तामा ५ वटा उडान हुन्छ भन्छन् नि ?,’ शिलापत्रले जिज्ञासा राख्यो । एयरपोर्टको समस्या सधैँ उस्तै भएकाले थाहा नभएको बताइन् । ‘टिकट काटेर उड्ने समयमा प्लेन आउँदैन भन्छन्, यस्तो त गर्न भएन नि ...’ उनले भनिन् ।

‘भोट माग्न आउछन् हामीलाई भोट हाल्नुस् भन्छन्, चुनाव जित्छन्,’ वडा नं ५ माका बासिन्दा रहेका एक व्यक्ति भन्दै थिए,’ तीन गतेसम्म सबैले जित्छन् । ४ गते एउटाले जित्छन् अनि हराउँछन् ।’

८४ वर्षीय देवदत्त गौतम उपचारका लागि प्लेनमा काठमाडौँ जाने तयारीमा थिए । बसमा यात्रा गर्न कठिन हुने भन्दै उनी आफैँसँग कुरा गर्दै थिए, ‘के गर्ने अब ?' । उनले आफन्तले फर्किन व्यवस्था गर्ने अटो कुरिरहेका थिए ।

एक बजे हुने उडान रद्द भएपछि यात्रुहरू तनावमा थिए । ‘एक बजे फ्लाइट क्यान्सिल भयो । उपचारका लागि जान पनि पाइएन । भोलि फ्लाइट हुन्छ कि हुँदैन भनेर साेध्दा थाहा छैन भन्छन्,’ ती वृद्धका आफन्तले गुनासो गरे ।

बिनोद शाहीकाे एयरपोर्टसँगै घर रहेछ । 'नेताहरूलाई एयरपोर्टकाे स्तर वृद्धि गर्नुपर्छ भन्ने नै छैन । कसरी ठग्ने ? दिमागै त्यहीँ छ,’ कठामाडौं हिँडेका उनी घर फर्किन बाध्य हुँदा निराश थिए । एयरपोर्ट सफा गर्न पैसा खर्च गर्ने प्रशासनको काममा उनले असन्तुष्टि पाेखे । ‘पैसा लगाएर घाँस सफा हुन्छ ? गाउलेलाई दिए रातारात घाँस गायब हुन्छ, उनले भने ।

दाङ एयरपाेर्टमा भेटिएका यात्रुहरू नेपालगञ्ज र भैरहवा एयरपोर्टमा यस्तो हालत नहुने बताउँथे । शुक्रबर बिहान दाङ ३ का एमाले उम्मेदवार कोमल ओलीकाे निवास पुग्दा एयरपोर्ट चलाउनुपर्ने छलफल भइरहेको थियो । उम्मेदवार ओलीको सचिवालय हेरिरहेका उनका भाइ नरेन्द्र ओली भन्दै थिए, ‘एयरपोर्ट गतिलो नहुँदा जनताले सास्ती पाएका छन् । यस्तो हुनु हुँदैन ।’ ओलीको सचिवालयमा व्यस्त एमाले जिल्ला सदस्य जीतबहादुरले भने, ‘एयरपोर्ट गतिलो बनाउने सबैले भन्छन् । हामी कहाँ गर्छौं ? यहाँको जनताले साह्रै दुख पाएका छन् ।’

दाङको चुनावी मुद्दा बनेको छ एयरपोर्ट । सबै उम्मेदवारहरूले ‘मैले जिते एयरपोर्ट चल्छ, बन्छ ग्यारेन्टी भयो’ भन्ने वाचा मतदातासँग गरिरहेका छन् ।

एयरपोर्टको विषयमा एमालेले र आफू तुलसीपुरको नगरप्रमुख हुँदा काम गरेको प्रदेश क का एमाले उम्मेदवार घनश्याम पाण्डेले बताए । ‘अरुले बोले काम गरेनन्, मैले बोले काम गरेँ । गठबन्धनबाट जो उम्मेदवार हुनुहुन्छ उहाँ पटक पटक मन्त्री हुनुभयो,’ कांग्रेस उम्मेदवार दीपक गिरीलाई आरोप लगाउँदै उनले भने, ‘सांसद हुनुभयो । एयरपोर्ट सञ्चालमा उहाँहरूले केही पनि गर्नुभएन । हुन्छ बहादुर मात्र हो ।’

उनले आफूले नगर प्रमुख हुँदा काम गरेको दाबी गरे । ‘२०७४ को चुनावमा मैले भोट माग्ने बेला मलाई मतदान गर्नुस् एयरपोर्ट सञ्चालन एक वर्षभित्र गरेर देखाउँछु भनेँ र गरेँ । कोरोना अघि दैनिक २ वटा उडान हुन्थ्यो । अहिले हप्तामा ५ वटा उडान हुन्छ,’ उनले भने, ‘स्तरोन्नति हुँदैछ । फ्यूल स्टेशन बन्यो । धावनमार्ग विस्तार जरुरी छ । कोरोना नभएको भए, पाइलट एकेडेमीको रुपमा विकास गर्ने योजनामा थियौं । सार्वजनिक निजी साझेदारी मोडलमा काम हुन्थ्यो ।’

२०७४ सालको चुनाव आफूले हार्दा दाङ विकासमा पछि परेको कांग्रेस उम्मेदवार गिरीले बताए । ‘म पाँच वर्ष भइन । संसदमा रहँदा लेखा समितिमा रहेँ । रुपन्देहीको एयरपोर्ट कसरी भयो भन्ने थाहा छ । गाह्रो कुरा छैन,’ उनले भने, ‘ए क्लासको डोमेस्टिक एयरपोर्ट बनाउने हो । नारायणपुरमा नेसनल एयरपोर्ट बनाउन हामीलाई कुनै आपत्ति छैन । स्वागत छ । यो इतिहास बाकेको एयरपोर्ट हो । मेरो अर्जुनदृष्टि बजेट जुटाउने, एयरपोर्ट र अस्पताल हुन्छ ।’

यहाँ नेपाल एयरलाइन्सले मात्र उडान भर्ने गरेको छ । दाङ एयरपोर्ट प्रमुख गणेश अर्याल स्थानीयबाट एयरपोर्ट सञ्चालन गर्न सहयोग पाएको र मन्त्रालबाट स्तारोन्नतिको योजना अघि बढेको बताउँछन् । ‘फ्युल स्टेशन बन्दै छ । चुनावपछि सञ्चालनमा आउँछ होला,’ प्रमुख अर्यालले शिलापत्रसँग भने, ‘काठमाडौंबाट आउँदै फ्युल लिएर आउने बाध्यता हटेपछि यात्रु संख्या बढ्छ ।’

अहिले साप्ताहिक ४ वटा उडान हुने गरेको छ । १५–१५ दिनमा सेड्युल परिवर्तन हुन्छ । ‘नेपाल एयरलाइन्सको दुईवटा ट्विनअटर बि मान थियो, एक बिग्रिएर ग्राउण्डेड भएको छ,’ अर्यालले उडान स्थनगन गरिएको बारे जानकारी दिए । नेपालगञ्ज, रुकुम र दाङ उडान भर्ने भएकाले समस्या आएको हो । तीनपटक एयरपोर्टको क्षेत्रबारे नापनक्शा भए पनि क्षेत्र समेत यकिन नहुँदा स्थानीय रुष्ट छन् ।

प्रकाशित मिति: शनिबार, कात्तिक २६, २०७९ १६:२०