गभर्नर अधिकारीको दाबी- राष्ट्र बैंकको कठोर नीतिका कारण अर्थतन्त्रमा सुधार आइरहेको छ

गभर्नर अधिकारीको दाबी- राष्ट्र बैंकको कठोर नीतिका कारण अर्थतन्त्रमा सुधार आइरहेको छ

A+ A A-

नेपाल राष्ट्र बैंकका गभर्नर महाप्रसाद अधिकारीले राष्ट्र बैंकको कठोर नीतिका कारण नै अर्थतन्त्रमा सुधार आइरहेको दाबी गरेका छन् ।

बुधबार नेपाल बैंक लिमिटेडको ८६औँ वार्षिकोत्सव समारोहलाई सम्बोधन गर्दै उनले अर्थतन्त्र खस्किरहेको बेलामा सकरार र राष्ट्र बैंकले लिएका कठोर निर्णयबाट नै अर्थतन्त्र सुधारोन्मुख रहेको बताए ।

अप्रिय लाग्ने तर अर्थतन्त्र सुधारका लागि अत्यावश्यक नीतिगत निर्णय नगरेको भए अर्थतन्त्रमा सुधारको संकेत नदेखिने अधिकारीको दाबी थियो । विगतमा गरिएको नीतिगत निर्णयहरू अर्थतन्त्रलाई सुधार गर्न र स्थायित्वका लागि भएको उनको भनाइ थियो ।

राष्ट्र बैंकले लिएको नीतिले सकारात्मक रूपमा काम गरेको र सुधारोन्मुख अर्थतन्त्रले त्यसलाई पुष्टि गरेको उनको भनाइ थियो । लामो समयदेखि बाह्य क्षेत्रमा धेरै पीडादायी स्थितिमा रहेको भए पनि चालु आर्थिक वर्षको तीन महिनाको तथ्यले वर्तमान आर्थिक स्थिति सन्तोषजनक देखाएको उनले बताए ।

असोज मसान्तसम्म आइपुग्दा भुक्तानी सन्तुलन १४ महिनापछि सकारात्मक बनेको उनको भनाइ थियो । गभर्नर अधिकारीले असोज मसान्तसम्म भुक्तानी सन्तुलन १२ अर्बले बढेको बताए । अर्थतन्त्रलाई अहिलेको अवस्थामा ल्याउन आयात प्रतिबन्ध लगाउनेलगायत धेरै नीति लिनुपरेको उनको भनाइ थियो ।

आर्थिक वर्ष २०७९/८० को असोजसम्ममा आयत र निर्यात दुवै घटेको उनले बताए । असोजसम्ममा आयात ३५.७ प्रतिशत र निर्यात १६.२ प्रतिशतले घटेको उनले जानकारी दिए ।

‘बाह्य क्षेत्रमा निकै हामीलाई पीडाजनक स्थिति थियो । तीन महिनाको डेटाहरू आइराख्दा हाम्रो ब्यालेन्स एण्ड पेमेन्ट १२ अर्बले पोजिटिभ देखिएको छ । यो हाम्रो लागि करिब १४ महिनापछि राम्रो हो,’ अधिकारीले भने, ‘बीचमा हामीले धेरै अप्रिय खालका पोलिसीगत निर्णयहरू पनि लियौँ । इन्पुटका कुराहरु भए । ती सबै समग्र अर्थतन्त्रलाई कसरी हुन्छ स्थायित्व दिनु थियो । अर्थतन्त्र बिग्रिए अर्थतन्त्रभित्र बसेर काम गर्नेहरूलाई केही न केही असर पर्छ । त्यो असर अलि जटिल हुन्छ । नेपाल राष्ट्र बैंकले लिएको पोलिसीले सकारात्मक रूपमा काम गरेको कुरा अहिलेको रिजल्टबाट देखिएको छ । अर्थतन्त्रलाई सही ट्रयाकमा लैजाने आशामा छौँ ।’

प्रकाशित मिति: बुधबार, कात्तिक ३०, २०७९ १७:४०