ज्योतिषले देउवालाई हराउँछौ भनेका छन्, २८ हजार मत ल्याएर चुनाव जित्छु: कर्ण मल्ल

ज्योतिषले देउवालाई हराउँछौ भनेका छन्, २८ हजार मत ल्याएर चुनाव जित्छु: कर्ण मल्ल

A+ A A-

नेपाल विद्यार्थी संघबाट राजनीतिमा ‘इन्ट्री’ गरेका कर्णबहादुर मल्ल डडेल्धुरामा प्रतिनिधिसभा सदस्यको उम्मेदवार छन् । २०४६ सालमा नेविसंघ इकाइ अध्यक्ष रहेका मल्ल २०५३ सालमा नेपाली कांग्रेसको महाधिवेशन प्रतिनिधि भएका थिए । उनी लामो समय प्रधानमन्त्री एवम् कांग्रेस सभापति शेरबहादुर देउवाका विश्वासपात्र मानिन्थे । त्यसैले त २०५९ मा देउवा दोस्रोपटक प्रधानमन्त्री भएपछि मल्लले प्रमुख स्वकीय सचिव भएर काम गर्ने मौका पाएका थिए ।

तर, २०६२ सालमा शेरबहादुर देउवाले मल्ललाई पार्टीबाट साधारण सदस्य नरहने गरी निष्कासन गरेका थिए । तत्कालीन राजदरबारनिकट भएको आरोप लगाउँदै उनी कारबाहीमा परेका थिए । त्यसको केही समयपछि भने उनीमाथिको कारबाही फुकुवा भएको थियो । २०६२-६३ जनआन्दोलनपछि पुनः मल्ल कांग्रेस प्रवेश गरेका थिए । त्यसपछि २०६७ र २०७२ सालमा अधिवेशनमार्फत उनी जिल्ला सभापति भएका थिए । उनी २०७४ सालको प्रदेशसभा निर्वाचनमा क्षेत्र नम्बर ‘ख’ बाट टिकट पाएर विजयी भएका थिए ।

तर, अहिले समय फेरिएको छ । यसपटक मल्ल शेरबहादुर देउवाविरुद्ध उम्मेदवार बनेका छन् । मंसिर ४ मा हुने निर्वाचनमा मल्लले देउवाविरुद्ध प्रतिनिधिसभामा उम्मेदवारी दिएका छन् । गत वर्ष सम्पन्न कांग्रेसको १४औँ महाधिवेशनबाट दुवैको सम्बन्धमा तिक्तता आएको थियो । उनले आफूले पठाएको क्रियाशील सदस्यको नामावली केन्द्रबाट हटाएर आफूखुसी नाम थपिएको आरोप लगाएका थिए । देउवा पक्षले भने मल्लले अधिवेशनमा जित्न जिल्लाबाटै निकटका कार्यकर्ताको नामावली पठाएको आरोप लगाएको थियो ।

अधिवेशनलाई मल्ल पक्षले विधानविपरीत भएको बताएर आन्दोलनसमेत गरेको थियो । तर, कुनै सुनुवाइ नभएपछि उक्त पक्षले विद्रोह गर्‍यो । सो पक्षले हालै सम्पन्न स्थानीय तहको निर्वाचनमा कांग्रेसविरुद्ध नेपाली कांग्रेस (बीपी)बाट उम्मेदवार उठायो । निर्वाचनपछि कर्ण मल्ल कांग्रेस (बीपी)मा प्रवेश गरेर प्रतिनिधिसभाको निर्वाचनमा देउवाविरुद्ध उम्मेदवारी दिए ।

मल्लले अहिले चुनावी प्रचारप्रसारलाई तीव्रता दिइरहेका छन् । आफू जित्नकै लागि चुनाव लडेको बताउने मल्ल मतदाताको पूर्ण समर्थन रहेको बताउँछन् । उनै मल्लसँग शिलापत्रकर्मी आशिष मल्लले गरेको कुराकानीको सम्पादित अंश:

चुनावी तयारी कस्तो छ ?

अहिले मतदाताको घरदैलोमा गइरहेको छु । उहाँहरूको आशीर्वाद लिइरहेको छु ।

तपाईंको उम्मेदवारी किन ?

मैले यहाँको समस्यालाई आफ्ना मुद्दा बनाएर समाधान गर्नसक्छु भन्ने आत्मविश्वासका साथ उम्मेदवारी दिएको हुँ ।

प्रधानमन्त्री शेरबहादुर देउवासँग रहेर धेरे काम गर्नुभयो । उहाँलाई गुरु पनि मान्नुभएको थियो । फेरि राजनीतिमा उहाँले नै ल्याउनुभएको भन्ने छ । तर, अहिले उहाँकै विरुद्धमा लड्नुपर्ने अवस्था कसरी आयो ?

राजनीतिमा उहाँले प्रवेश गराउनु भएको हैन । उहाँको प्रभाव तथा व्यक्तित्वबाट प्रभावित भएर म राजनीतिमा लागेको पक्कै हो । तर, मेरो गुरु किसुनजी हुनुहुन्छ । मैलै शेरबहादुर देउवालाई गुरु कहिल्यै मानिन, अभिभावक मानेको हुँ । उमेरको हिसाबले अहिले पनि अभिभावक मान्छु ।

उहाँको बारेमा मैले जे सुनेको थिएँ, काम गर्दै जाँदा त्यो पाइँन । निकटबाट हेर्दा उनीविपरीत दिशाबाट डडेल्धुराका मतदाताबाट मत लिने र मतबाट प्राप्त शक्तिलाई देश, हिन्दु धर्म, यहाँको समाज, यहाँको परिवेश र मतदाताका खिलापमा लगाइरहेको देखे । त्यसपछि मैले उहाँलाई भनेर नै उहाँसँग विमति राखेर आउँदा उहाँले दोस्रोपटक पार्टीबाट निष्कासन गर्नुभयो । त्यसपछि बीपी कांग्रेसको सदस्य भएर म डडेल्धुराका जनतामाझ आएको हुँ ।

शेरबहादुर देउवा सधैँ सम्मानित हुनुपर्ने र डडेल्धुराका मतदाता सधैँ अपमानित हुनुपर्ने अवस्था छ । उहाँ देशको सबैभन्दा समृद्ध नागरिक र नेताका रूपमा स्थापित हुनुभएको छ । तर, यहाँको जनजीविकाको सवाल छ, जनता पीडामा बाँचिरहेका छन् । त्यसकाण मैले उम्मेदवारी दिएको हुँ ।

स्थानीय तहको मत आकडा हेर्दा गठबन्धनमा आवद्ध दलका उम्मेदवार सबै पालिकामा विजयी भएका छन् । यस्तै तपाईंका पुराना सहकर्मीले पनि साथ छाडेको अवस्थामा तपाईंको जित कसरी हुनसक्छ ?

२०७४ सालमा पनि दुई कम्युनिस्ट पार्टीबीच प्राकृतिक गठबन्धन थियो । तर, डडेल्धुरामा परिणाम विपरीत आयो । झन् अहिले कांग्रेस र माओवादीबीचको गठबन्धन अप्राकृतिक हो । यसले १० प्रतिशत मतदाता पनि बाँधिएका छैनन् । एक यो कारणले म जित नजिक छु ।

अर्को, अहिले हरेक घरमा शेरबहादुर देउवाले हामीलाई ढाँट्यो, देउवा हाम्रो हैन हामी मात्रै उनका लागि प्रयोग भयौँ भन्ने बहस चलिराखेको छ । त्यो बहसको परिणाम पनि यो पटक देउवालाई मत नदिएर सम्मानपूर्वक बिदाइ गर्ने कुरा खुला रूपमा आइरहेको छ । यसबाट थाहा हुन्छ, यहाँका मतदाताले उहाँलाई योपालि विस्थापित गर्ने तयारी गरेका छन् ।

त्यसैगरी मेरा पूर्वसहकर्मी कुनै साथीले छाडेका छैनन् । मैले राजनीतिक रूपमा ल्याएका केही साथी शेरबहादुर देउवाको सत्ता र शक्तिबाट प्रभावित भएर त्यता लागिरहेका छन् । त्योभन्दा २० गुणाभन्दा बढी हिजो अधिवेशनमा भाग लिएका वडा सभापति, जिल्ला कार्यसमितिका साथी, भर्खरै सम्पन्न स्थानीय तहको चुनावमा रुखबाट लडेका धेरै उम्मेदवार मेरो अभियानमा जोडिएका छन् । अनि शेरबहादुर देउवाका ज्योतिषीले उहाँलाई ७ पटक प्रधानमन्त्री हुन्छौ भनेर भनेका छन् रे । मेरो ज्योतिषीले पनि शेरबहादुर देउवालाई हराउँछौ भनेका छन् । मतान्तरबारे मैले गरेको सर्वेक्षणमा पनि २८ हजार ७ सय १ मत करुवा चुनाव चिह्नले पाएर म चुनाव जित्छु ।

ती पुराना सहकर्मीले तपाईंलाई पुनः सहयोग गर्छन् ?

शेरबहादुर देउवा चुनाव जित्ने भए गठबन्धन किन गर्थे ? त्यस्तै मसँग जोडिएका साथीहरूलाई किनेर लैजानुपर्ने अवस्था किन आयो होला । मलाईं छाडेका नेता-कार्यकर्ताको तुलनामा उहाँसँग रहेका दर्जनौँ साथीहरू हरेक दिन मसँग जोडिरहेका छन् । यसले देउवा अब जनताका रहेनन् भन्ने प्रमाणित गर्छ । जनतामा उनको ‘क्रेज’ पनि रहेन, इमेज र विश्वसनीयता पनि रहेन ।

एमालेसँग तालमेलको कुरा भएको छ । स्वयम् अध्यक्ष केपी शर्मा ओलीले भाषण गरेरै तपाईंलाई सहयोग गर्न निर्देशन दिएका छन् । तर, जिल्ला तहका केही नेताले सहयोग नगर्ने कुरा बाहिर आइरहेको छ । त्यो अवस्थामा एमालेबाट सहयोग पाउनेमा ढुक्क हुनुहन्छ ?

नेकपा एमालेका अध्यक्ष ओलीले जिल्लामा आफ्नो उम्मेदवार नदिएर मलाई सहयोग गर्ने बाचा गर्नुभएको छ । अब आफ्ना अध्यक्षले दिएको निर्देशन यहाँका नेतागणले कति कार्यान्वयन गर्नुहुन्छ त्यो उहाँहरूको कुरा हो । तर मलाई विश्वास छ, एमालेजस्तो अनुशासित र व्यवस्थित पार्टीले आफ्नो केन्द्रीय अध्यक्षले गरेको निर्णय कार्यान्वयन गर्नु हुनेछ ।यहाँको परिवेशमा मैलै सुरुदेखि नै प्रदेश निर्वाचन क्षेत्र ‘क’ मा मैले एमालेका पठानसिंहलाई सहयोग गर्छु । ‘ख’ मा चाहिँ मेरो उम्मेदवार डा. तारा जोशी हुनेछन् र एमालेले पनि तारा जोशीलाई समर्थन गर्नुपर्छ भन्ने कुरा मैले अध्यक्ष केपी ओलीसँगको भेटघाटमा गरेको थिएँ । यो कुरा मैलै जिल्ला अध्यक्षलाई पनि भनेको हो । वाचा अनुसार ‘क’ प्रदेशमा पठानसिंह बोहरालाई र ‘ख’ मा तारा जोशीलाई सहयोग गरिरहेको छु ।

तपाईंजस्तै देउवाविरुद्ध गुल्मीबाट आएर सागर ढकालले स्वतन्त्र उम्मेदवारी दिनुभएको छ । उहाँको उम्मेदवारीले तपाईंलाई कुनै असर पर्छ ?

उहाँ पनि नेपाली नागरिक हो । उहाँको उम्मेदवारीप्रति यहाँका राजनीतिक दल विशेषत सत्तारुढ गठबन्धनको तितो टिप्पणी थियो सुरुबाटै । तर, उहाँको उम्मेदवारीलाई आमनागरिकले सहज रूपमा लिनुपर्छ भनेर मैले सार्वजनिक रूपमै भनेको थिएँ । यहाँको राजनीतिकर्मी भएकाले मैलै त्यसलाई आफ्नो कर्तव्यका रूपमा लिएको छु । मैले मेरा आठै जना प्रतिस्पर्धीलाई सम्मान गर्छु । सागर ढकालसँग भएको पटक-पटकको भेटमा मैलै दुवैको लक्ष्य परिवर्तन रहेकाले हामीसँगै उभिनुपर्ने समेत बताएको थिएँ । दुर्भाग्य के हो भने एउटा इन्जिनियर आउँदा डडेल्धुरामा यति चर्चा हुनुपर्ने तर मेरै समर्थनमा रहेका डा. तारा जोशीले भारतको प्रतिष्ठित जवाहरलाल नेहरू विश्वविद्यालयबाट पीएचडी गरेका छन् । हजारौँ इन्जिनियरलाई पढाउन सक्ने उहाँ उम्मेदवार पनि हुनुहुन्छ तर उहाँको चर्चा नहुनु दुःखद कुरा हो ।

चुनाव जितिहाले के काम गर्नुहुन्छ ?

सम्भवत: जिल्लाका ५२ वटै वडामा पुगेको म पहिलो उम्मेदवार हो । केही ठाउँमा त तेस्रो पटक पुगिरहेको छु । भित्रीमधेस क्षेत्रमा पर्ने कसान भन्ने स्थान छ, त्यहाँको बारेमा सम्माननीय प्रधानमन्त्रीलाई पनि थाहा नहोला । कसानजस्तै धेरै बस्ती छन्, जहाँ अहिले पनि बिजुली पुगेको छैन, टेलिफोन टावर टिप्दैन, खानेपानी अभाव छ ।

शेरबहादुर देउवाले ३२ वर्षदेखि जितिरहनु भएको छ तर बिजुली र सञ्चारजस्ता किनेर पाउने सेवाबाट त्यहाँका नागरिक वञ्चित छन् । तर, उहाँले अहिले पनि विभिन्न आश्वासन बाँडिरहनुभएको छ । त्यो कुरा पत्याउने अवस्थामा दुर्गम बस्तीका नागरिक छैनन् । तिनै अधुरा योजनालाई पूर्णता दिन मेरो उम्मेदवारी हो । म पश्चिम सेतीजस्ता ठूला योजनाको आश्वासन दिन्नँ । बाँकी रहेका खानेपानी, सडक, बिजुली, सिँचाइका काम अगाडि बढाएर जिल्लाको सबैभन्दा ठूलो समस्या मदिराजस्ता दुर्व्यसनीको अन्त्य गर्छु ।

यसैगरी डडेल्धुराबाट कञ्चनपुर जाने द्रूतमार्गको काम अगाडि बढाउँछु । त्यस्तै जिल्लाका धार्मिक, पर्यटकीय क्षेत्रलाई व्यवस्थित गरेर पर्यटक भित्र्याउने काम गर्छु । जसले यहाँको बेरोजगारी र गरिबीको अन्त्य गर्न मद्दत गर्नेछ ।

यी पनि पढ्नुस्:

एमालेले मैदान छाडेपछि डडेल्धुरामा देउवालाई चुनौती दिइरहेका उनकै पूर्वपीए

डडेल्धुराबाट किन कहिल्यै हारेनन् देउवा ?

देउवाविरुद्ध किन सधैँ चुनाव लड्छन् ‘मम्याल बाजे' ? यस्ताे छ राेचक घटना

प्रकाशित मिति: बुधबार, कात्तिक ३०, २०७९ १९:२१