देउवाविरुद्ध किन सधैँ चुनाव लड्छन् ‘मम्याल बाजे' ? यस्ताे छ राेचक घटना

A+ A A-

‘मुलै बाँचुन्ज्यालसम्म एक भोट आएलै शेरबहादुर देउवासित चुनाव लड्डे हुँ । उइलाई निर्विरोध जित्त दिन्या हैन । (म बाँचुञ्जेलसम्म शेरबहादुर देउवाविरुद्ध उम्मेदवारी दिने हो । उहाँलाई निर्विरोध कहिल्यै जित्न दिने हैन) यो भनाइ एक ८१ वर्षीय वृद्धको हो ।

ती वृद्ध हुन्– डडेल्धुराको अमरगढी नगरपालिका निवासी कर्णसिंह रावल उर्फ ‘मम्याल बाजे’ । पुर्ख्याैली गाउँ नवदुर्गा गाउँपालिकाको ‘मम्या’ भन्ने स्थानमा भएकाले आफ्नाे नाम ‘मम्याल’ रहन गएको उनी बताउँछन् । उमेरले पाको भएकाले अचेल सबै उनलाई ‘मम्याल बाजे’ भनेर बोलाउँछन् ।

तिनै ‘मम्याल बाजे’ प्रधानमन्त्री शेरबहादुर देउवाविरुद्ध सधैँ उम्मेदवारी दिन्छन् । २०५६ सालमा पहिलाेपटक देउवाविरुद्ध चुनाव लडेका उनले १ सय ९८ मत पाएका थिए । हालसम्म चारपटक उनले देउवाविरुद्ध स्वतन्त्र उम्मेदवारी दिइसकेका छन् । यसपटक पनि कर्णसिंह रावलले उम्मेदवारी दिएका छन् । एक मत आए पनि खुसी रहने बताउँदै आएका उनी प्रचारप्रसार गर्दैनन् । ‘मलाई जिल्लाभरि चिन्छन् । त्यसैले प्रचारप्रसार गर्दिनँ’, चुनाव चिह्न सूर्यमुखी फूल अंकित ब्याच लगाएर घाम तापिरहेका उनले भने ।

किन उनले सधैँ देउवाविरुद्ध उम्मेदवारी दिन्छन् त ? यो सबैको चासोको विषय बनेको छ । याे रहस्य थाहा पाउन २०४८ सालतिर फर्किनुपर्ने हुन्छ । त्यतिबेला शेरबहादुर देउवा पहिलोपटक डडेल्धुराबाट चुनाव लडेका थिए । त्यतिबेला कर्णसिंह रावल जिल्ला मालपोत कार्यालयमा कार्यालय सहयोगीको रूपमा कार्यरत थिए । कार्यालयले चुनावको बेला उनलाई भित्री मधेसको जोगबुढामा खटाएको थियो ।

‘त्यहाँ देउवालाई सहयोग गर्न मैलै एक सयभन्दा बढी भोट दिलाएको थिएँ । त्यसपछि उनी जितेर गृहमन्त्री बनेका हुन्’, रावल विगत सम्झिँदै भन्छन्, ‘मैले आफ्नै मान्छे सम्झेर आफन्तलाई मत हाल्न लगाएको थिएँ ।’

चुनावपछि शेरबहादुर देउवा विजयी भएर गृहमन्त्री भएका थिए । तर, एकाएक २०४९ सालमा कर्णसिंह रावलको सरुवाको पत्र आयो । उनलाई बैतडी जिल्लामा सरुवा गरिएको थियो । उनलाई भने जिल्लामै बस्ने इच्छा थियो ।

‘त्यसपछि म भारतको बाटो हुँदै देउवा भेट्न काठमाडौं गए । मैलै सुरुमा जिल्लामै बस्ने इच्छासहित एक ओझा थरका गृहसचिवलाई गुहारे । उनले उक्त कुरा तत्कालीन गृहमन्त्री देउवालाई भनेका रहेछन्’, रावल भन्छन्, ‘तर देउवाले ‘हुँदैन । कहाँ हुन्छ ? आफ्नो मान्छे राखिसकेका छौँ, उसलाई बैतडी पठाऊ’ भनेछन् ।’

त्यही बेला नै रावलले एक मत आए पनि देउवाविरुद्ध चुनाव लड्ने अठाेट लिएका थिए । तर, पछि डडेल्धुराकै ती गृहसचिवले सरुवा स्थगित गरी जिल्लामै काम गर्ने पत्र बनाइदिएको मम्याल बाजे बताउँछन् । ‘आफ्नो मान्छे भनेको त काम लागेन । बरु मैले जसको जुठा भाँडा माझेको थिएँ, उसैले सहयोग गर्‍याे’, रावलले भने ।

जिल्लामै ३० वर्ष मालपोत कार्यालयमा काम गरेपछि उनी २०५४ सालमा सेवानिवृत्त भए । त्यसको २ वर्षपछि २०५६ सालमा उनी पहिलोपटक शेरबहादुर देउवाविरुद्ध चुनाव लडेका थिए । त्यतिबेला १ सय ९८ मत पाएका रावलले पछिल्लोपटक २०७४ सालमा भएको प्रतिनिधिसभाको निर्वाचनमा २ सय ८० मत पाएका थिए ।

यसपटक निर्वाचित भए सबै स्थानीय तहमा विकास गर्ने उनको चुनावी एजेन्डा छ । ‘मलाई एक छाक खानेगरी मत दिएर जिताए जिल्लावासीलाई २ छाक खाने बनाउँछु । देउवा जसरी बजेट खाने नेता बन्दैन’, उनले भने ।

डडेल्धुरामा कर्णसिंह रावलजस्तै गुल्मीका सागर ढकाल पनि प्रतिनिधिसभाका लागि स्वतन्त्र उम्मेदवार छन् । उनलाई चिन्नुहुन्छ भन्ने प्रश्नमा रावल भन्छन्, ‘चिन्छु नि । त्यो मान्छे फटाहा हो । उसले देउवालाई फूलको माला किन हाल्नुपरेकाे ?'

प्रकाशित मिति: सोमबार, कात्तिक २१, २०७९ १३:५६