राैतहट २, जहाँ २२ जनालाई जिउँदै इँटाभट्टामा जलाएकाे आरोपमा आलम थुनामा छन्

मोहम्मद आफताव आलम

A+ A A-

४ मंसिर जतिजति नजिकिँदैछ, राजनीतिक माहौल पनि उसैगरी तातिरहेको छ । देशभर राजनीतिक दलका नेताहरूलाई सभा सम्मेलनमा भाषण गर्न भ्याइ-नभ्याइ छ । ४ मंसिरमा हुने प्रतिनिधिसभा र प्रदेशसभाको चुनावका लागि नेताहरू व्यस्त छन् ।

२०६४ सालको पहिलो संविधानसभा चुनावमा अझ योभन्दा बढी राजनीतिक गर्मी बढेको थियो । कारण– नेपालको राजनीतिक इतिहासमै पहिलोपटक हुँदै थियो, संविधानसभा निर्वाचन । माओवादीको १० वर्ष लामो हिंसात्मक विद्राेह शान्तिपूर्ण राजनीतिमा अवतरण भएको थियो । २ सय ४० निर्वाचन क्षेत्रमै चुनावी माहौल तातेको थियो । रौतहट– २ मा राजनीतिक राप अझ बढी थियो ।

यो निर्वाचन क्षेत्रमा नेपाली कांग्रेसबाट उम्मेदवारी दिएका थिए, मोहम्मद आफताव आलमले । निर्वाचन मिति २८ चैत २०६४ तोकिएको थियो । सबै राजनीतिक दल घरदैलो कार्यक्रममा व्यस्त थिए ।

आलम समूहका कार्यकर्ता भने उनकै निर्देशनअनुसार बुथ कब्जा गर्ने रणनीतिमा जुटेकाे आराेप छ । साेही उद्देश्यले २७ चैतमा रौटहटको राजपुर फरहदवाको आलमका कार्यकर्ताहरू एक घरको गोठमा बम बनाउँदै थिए । त्याे मुलतः विपक्षीलाइ तर्साउने र बुथ कब्जा गर्ने तयारी थियाे । तर, त्यहाँ दुःखद घटना भयाे । बम बनाउने क्रममा विस्फोट भयाे । दुई जनाको घटनास्थलमै मृत्यु भयो भने विस्फोटमा २२ जना घाइते भए ।

घटना लुकाउन आफताव आलमलाइ हम्मे पर्‍याे । अपराध लुकाउन उनले बम बनाउँदा घाइते भएका २२ जनालाइ जिउँदै इँटाभट्टाको आगोमा हालेर मारेको आरोप छ । उक्त घटना चुनावको बेला भएका घटनामध्येकै सबैभन्दा बीभत्स मानिन्छ ।

उक्त घटनाबारे त्यो बेला प्रहरीले अनुसन्धान नै गर्न सकेन । केन्द्रमा कांग्रेस नेतृत्वकाे सरकार थियाे । त्यसैले प्रहरी प्रशासनले दबाबमा परेर अनदेखा गरिदियाे । त्याे बीभत्स घटना भएकाे भाेलिपल्ट २८ चैतमा संविधानसभा चुनाव भयो । आलमसँग प्रतिस्पर्धामा माओवादीबाट अशोक जैसवाल र एमालेबाट शैलेन्द्र शाह थिए । उक्त चुनावमा जितेर आलम संविधानसभा सदस्य बनेर संसद् भवन छिरे ।

घटनामा मारिएका अधिकांश व्याक्ति सीमावर्ती भारतीय गाउँका थिए । त्यसैले घटना ओझेलमा पार्ने काेशिस भयाे । तर, उक्त घटनाबारे पीडितका परिवार भने निरन्तर न्यायका लागि लडिरहे । मृतक ओसी अख्तर र त्रिलोकप्रताप सिंहका परिवारले विभिन्न निकायमा आलमविरुद्ध उजुरी दिए ।

प्रहरीले सुरुमा उजुरी नै लिन मानेको थिएन । पछि हुलाकमार्फत पठाएको उजुरी रौतहट प्रहरीले दर्ता गरेको थियो । उजुरी परेको लामो समयसम्म पनि पीडित परिवारले सत्य-तथ्य अनुसन्धानको माग गरिरहे ।

१२ वर्षपछि पक्राउ

आलमलाई पहिलाे संविधानसभा चुनाव भएको १२ वर्षपछि २६ असोज २०७६ मा रौतहट प्रहरीले पक्राउ गर्‍याे । उनी पक्राउ पर्दासमेत सांसद थिए । २०७० को दोस्रो संविधानसभा चुनावमा तत्कालीन जनअधिकार फोरमका मस्ताक आलमसँग पराजित आलम २०७४ को चुनावमा विजयी भएका थिए ।

योबीचमा आलममाथि उजुरी दिने परिवारले कैयौँ मानसिक र भौतिक आक्रमण सहनुपर्‍यो । आलम मन्त्री र दुईपटक सांसद बने । २६ असोज २०७६ यता भने आलम पुर्पक्षका लागि थुनामा छन् । हाल उनलाई ललितपुरस्थित नख्खु कारागारमा राखिएको छ । आलमलाई जिल्ला अदालत रौतहटले २९ कात्तिक २०७६ मा पुर्पक्षका लागि जेल चलान गर्ने आदेश गरेको थियो । रौतहट कारागारमा सुरक्षा चुनौतीका कारण उनलाई नख्खु कारागार स्थानान्तरण गरिएको हो ।

कांग्रेस सांसद हुँदा रवाफका साथ हिँड्ने आलम जेलभित्र रहँदासमेत रवाफका साथ नै बसेका छन् । कारागारका एक कैदीका अनुसार, कारागारभित्र आलमले आफ्नो छुट्टै समूह निर्माण गरेका छन् । दिनभरजसो आफ्नै कोठामा बस्ने आलम बाहिर निस्कनुपर्दा त्यही छुट्टै समूह नै लिएर मात्र निस्कने गरेका छन् । आलमले आफैँले कारागारभित्रकै ६ जनाभन्दा बढी कैदीलाई तलब नै दिएर गार्ड राखेको कैदीहरूको दाबी छ । उनलाई नख्खु कारागारको सीआरसी ब्लक–२ को दोस्रो तल्लामा राखिएको छ ।

याे पनि...

प्रकाशित मिति: मंगलबार, कात्तिक २२, २०७९ ०८:४८