चुनावको दुई दिनअघि सुर्खेतमा यसरी मारिएका थिए एमाले उम्मेदवार ऋषिप्रसाद शर्मा

चुनावको दुई दिनअघि सुर्खेतमा यसरी मारिएका थिए एमाले उम्मेदवार ऋषिप्रसाद शर्मा

A+ A A-

मंसिर ४ मा हुने प्रतिनिधिसभा र प्रदेशसभाको चुनावका लागि सबै उम्मेदवार आ–आफ्नो चुनावी क्षेत्रमा ब्यस्त छन् । आफ्नो पक्षमा भोट ल्याउन विभिन्न आश्वासनसहित घरदैलो गर्न नेताहरू चुनावी क्षेत्र पुगेका हुन् ।

यसअघिको चुनावभन्दा मंसिरमा हुन लागेको चुनाव शान्तिपूर्ण हुने सुरक्षा निकायहरूको विश्लेषण छ । २०७४ को चुनावमा नेत्रविक्रम चन्द ‘विप्लव’ नेतृत्वको नेकपाले चुनाव बिथोल्न ठाउँठाउँमा बम विस्फोट गराएको थियो । तर, कुनै मानवीय क्षति भने भएन ।

चुनावपछि विप्लव समूहमाथि सरकारले राजनीतिक प्रतिबन्धसमेत लगाएको थियो । विप्लव तत्कालीन केपी शर्मा ओली नेतृत्वको सरकारसँग तीनबुँदे सहमति गरेर हाल शान्तिपूर्ण राजनीतिमा आइसकेका छन् ।

२०६४ को पहिलो संविधानसभाको चुनावमा भने थुप्रै उम्मेदवारलक्षित आक्रमण नै भएको थियो । दाङ क्षेत्र नम्बर १ को चुनावी प्रचारका क्रममा माओवादी र नेपाली कांग्रेसका कार्यकर्ताबीच झडप हुँदा प्रहरीको गोली लागेर माओवादी पार्टीका नौ जना कार्यकर्ताको ज्यान गएको थियो ।

कांग्रेसका नेता एवं पूर्वगृहमन्त्री खुमबहादुर खड्काको निर्वाचन क्षेत्रमा सो घटना भएको थियो । त्यो बेला प्रहरीले गोली नचलाएको भए पूर्वगृहमन्त्री खड्काकाे हत्या गर्ने गरी माओवादी कार्यकर्ता आएकाे दाबी सुरक्षा निकायको थियो ।

उसो त द्वन्द्वपछि पहिलो चुनावमा माओवादी सहभागी भएका कारण अरू क्षेत्रका उम्मेदवारले पनि असुरक्षा महसुस गरेका थिए । त्यसैका कारण २०६४ सालको चुनावमा अधिकांश उम्मेदवारहरूलाई सरकारले सुरक्षाको व्यवस्था गरेको थियो ।

सुर्खेतमा भने सरकारले उम्मेदवारको सुरक्षाका लागि खटाएको पीएसओले नै गोली हानेर उम्मेदवारको हत्या गरे । चुनावको दुई दिनअघि संविधानसभा सदस्यका लागि उम्मेदवार बनेका नेकपा एमालेका नेता ऋषिप्रसाद शर्माको हत्या भएको थियो ।

यसरी भएको थियो हत्या ?

नेकपा एमाले भेरी अञ्चल समन्वय कमिटीका तत्कालीन सदस्य ऋषिप्रसाद शर्मा सुर्खेत क्षेत्र नं. १ बाट संविधानसभा सदस्यको उम्मेदवार बनेका थिए । संविधानसभाकाे पहिलाे चुनाव २८ चैत २०६४ मा थियो । त्यसैको प्रचारका लागि उनी क्षेत्र नम्बर १ का विभिन्न ठाउँमा घरदैलो अभियानमा सक्रिय थिए ।

सोही क्रममा शर्मा २६ चैतको साँझ सुर्खेतकाे साविक मैनतडा– ८, लोदेमा पुग्दा उनीमाथि गोली प्रहार भयो । उनीमाथि शर्माकै सुरक्षाका लागि खटिएका पीएसओले गोली प्रहार गरेका थिए । २४ चैतमा एमाले सुर्खेतले मेहलकुनामा चुनावी आमसभा गरेको थियो । सो सभामा शर्मालगायत एमाले नेताहरूले सम्बोधन गरे । २५ चैतमा सुर्खेतको सिम्तामा एमालेले अन्तिम चुनावी सभा गरेको थियो । उक्त सभामा शर्माले आफूमाथि सुरक्षा खतरा रहेको संकेत गरेका थिए ।

२६ चैतको बिहान शर्मा मेहलकुना निर्वाचन परिचालनको कार्यालयमा राजनीतिक भेटघाटमा थिए । चुनावको मौन अवधि सुरु भएका कारण शर्मा व्यक्तिगत भेटघाटमा ब्यस्त भए । बेलुकीपख व्यक्तिगत भेटघाट सकेर छिन्चुहुँदै मेहलकुना बस्ने गरेर फर्किंदा मैनतडाको लोदेमा उनीमाथि गोली प्रहार भएको थियो ।

एमाले र कांग्रेस उम्मेदवार लालबहादुर घलेका कार्यकर्ताबीच झडप हुँदा शर्मामाथि गोली प्रहार भएको थियो । माओवादीतर्फबाट खड्कबहादुर घर्ती उम्मेदवार बनेका थिए । शर्मालाई एमाले कार्यकर्ताले स्कर्टिङ गरिरहेकै बेला शर्माकै गाडीमा सवार उनकै सुरक्षागार्ड मोतिलाल विकले उनीमाथि गोली प्रहार गरेका थिए । गाडीका चालक दीपक ओली थिए । उनीसमेत एमाले कार्यकर्ता नै हुन् । तर, सुरक्षागार्ड विकले शर्मामाथि किन गोली प्रहार गरे, त्यो अहिले पनि रहस्यकै विषय छ ।

शर्माको हत्यापछि राेकिएकाे चुनाव ७ वैशाखमा भएको थियो । ७ वैशाखको चुनावमा एमालेले शर्माकी श्रीमती कमला शर्मालाई उम्मेदवार बनाएको थियो । सो चुनाव उनले जितिन् ।

जिल्ला अदालत सुर्खेतले हत्या अभियोगमा विकलाई सर्वस्वहरणसहित कैद सजायको फैसला सुनाएको थियो । हाल विक कैद जीवन भुक्तान गरिरहेका छन् । तर, एमाले सुर्खेतले भने शर्माको हत्या नियोजित भएको आरोप लगाउँदै आएको छ । खासगरी कांग्रेस उपसभापति पूर्णबहादुर खड्कामाथि हत्याकाे आराेप लगाउँदै शर्मापत्नी कमलाले संसद्‌मै खड्कामाथि चप्पल प्रहार गरेकी थिइन् । खड्काले साे आराेप निराधार र कपाेलकल्पितभन्दै खण्डन गर्दै आएका छन् ।

४ मंसिरको चुनावका लागि सुर्खेत १ मा एमाले उम्मेदवार ध्रुव शाही उक्त हत्याकाण्ड राजनीतिक षड्यन्त्रकै उपज भएको बताउँछन् । ‘हामीले अदातलको फैसला मान्नैपर्छ । अदालतले शर्माकै अंगरक्षकको संलग्नता देखाएर कैद सजाय तोकिसकेको छ । तर, अंगरक्षकले किन गोली चलाए ? त्यो आशंकाको विषय हो,’ शाहीले भने ।

प्रकाशित मिति: मंगलबार, कात्तिक १५, २०७९ ११:१८