उपचुनावकी उम्मेदवार विद्या भण्डारी र फुटुङ गाउँका भोटर (तीन दशक पुराना दुई चुनावी तस्वीर)

उपचुनावकी उम्मेदवार विद्या भण्डारी र फुटुङ गाउँका भोटर (तीन दशक पुराना दुई चुनावी तस्वीर)

A+ A A-

वरिष्ठ फाेटाे पत्रकार विकास राैनियारले आफ्नो क्यामेरामा नेपालका केही ऐतिहासिक घटना र दृश्यलाई कैद गरिभ्याएका छन् । हाम्रा लागि इतिहास बनिसकेका छन्– तीन दशक पुराना चुनाव, उपचुनाव, आन्दोलन, जनजीवन इत्यादि । २०७९ सम्म आइपुग्दा राजनीतिक परिवर्तनका साथ हामी नयाँखाले चुनावी माहौलमा आइपुगेका छौँ । गत वैशाखमै स्थानीय तह चुनाव सकाएर देश प्रदेश र प्रतिनिधिसभा चुनावतिर अघि बढेकाे छ । यसै सन्दर्भमा हामीले पुराना केही चुनावी तस्वीरकाे चर्चा गर्न लागेका हाैँ । राैनियारले खिचेका थुप्रै तस्वीरमध्ये यहाँ दुई तस्वीर हामी तपाईंलाई देखाउँदैछौँ ।

तस्वीर १

याे तस्वीरमा देखिएकी महिला नेतृ अहिले हाम्राे देशकी राष्ट्रपति छिन् । हाे, उनी अरु कोही नभएर हालकी राष्ट्रपति विद्यादेवी भण्डारी हुन् ।

उनी एमाले नेता स्व. मदन भण्डारीकी पत्नी पनि हुन् । ३ जेठ २०५० मा दास ढुङ्गा दुर्घटनामा मदन भण्डारीको निधन भएकाे थियाे । त्यसलगत्तै भएको उपचुनावमा एमालेले नेपाली कांग्रेसका तत्कालीन सभापति कृष्णप्रसाद भट्टराईविरुद्ध काठमाडौं निर्वाचन क्षेत्र नम्बर १ मा विद्या भण्डारीलाई उठायाे । पतिको निधनअघि विद्या अखिल नेपाल महिला संघको राजनीतिमा सक्रिय थिइन् । मदन भण्डारी बितेपछि उनी राजनीतिको मूलप्रवाहमा आइन् ।

शोकलाई शक्तिमा बदल्न एमालेले त्यो बेला ‘जनताकी छोरी विद्या भण्डारी’ नारासहित चुनावी अभियान चलाएकाे थियो । यस क्रममा काठमाडाैंमा आमसभाहरू गरिँदै थिए । उपनिर्वाचनलक्षित आमसभा सिफलमा पनि भएको थियो । जसमा त्यतिबेलाका युवानेताहरू माधव नेपाल, प्रदीप नेपाल, मनमोहन अधिकारीलगायत सहभागी थिए । आमसभामा भाषण गरी आफ्नो सोफामा फर्किने बेलामा रौनियारले विद्यालाई मञ्चपछाडिबाट क्यामेरामा कैद गरेका थिए ।

सम्बन्धित समाचार

तीन दशकअघि विकास रौनियारले खिचेका दुई तस्वीर (भिडियाेसहित)

त्यो बेला कान्तिपुरमा चन्द्रशेखर कार्की र विकास रौनियार गरी दुई जना फोटो पत्रकार थिए । कार्कीले कांग्रेस बिटमा फोटो खिच्थे भने रौनियारले एमाले बिट हेर्थे । एमालेको आमसभा पछ्याउने क्रममा उनले विद्या भण्डारीको उक्त फोटो खिचेका थिए ।

'म आफैँलाई पनि यो तस्वीर निकै मनपर्छ । सामान्यतः हामी अगाडिबाट खिच्छौँ । पछाडिबाट खिच्दा मास देखिए पनि अनुहार देखाउने मुमेन्ट पाइँदैन’, केहीअघि शिलापत्रकाे फाेटाेकार स्तम्भका लागि कुरा गर्दै रौनियारले भने, ‘यो तस्वीर मैले स्टेजको पछाडिबाट खिचे पनि मास र वक्ताको मुहार प्रस्ट देखिन्छ । यसको कम्पोजिसन मलाई मनपर्छ ।’ उपचुनावमा कांग्रेस सभापति एवं पूर्वप्रधानमन्त्री भट्टराईलाई विद्याले पराजित गरिदिएकी थिइन् ।

यो तस्वीर रौनियारले राष्ट्रपति भण्डारीलाई उपहारस्वरूप दिने चाहना व्यक्त गरेका थिए । शिलापत्रमा फाेटाे प्रकाशित भएकै साता रौनियारलाई शीतल निवास बोलाएर भण्डारीले आफ्नो तस्वीर बुझिन् र धन्यवाद पनि दिइन् ।

२८ वर्ष पुरानो आफ्नो फोटो बुझेपछि भावुक भएकी राष्ट्रपतिले भनिन्- यसले मलाई पुराना दिनमा फर्काइदियो

राैनियारले विभिन्न ठाउँहरू घुमेर अन्य तस्वीरहरू पनि खिचेका छन् । यस क्रममा उनले ३२ वर्षअघि खिचेको एक तस्वीर हामीलाई उपलब्ध गराएका छन् ।

याे तस्वीर २०४७ सालकाे संसदीय चुनावकाे हाे । तस्वीरमा काठमाडौंको उत्तरी भेग तारकेश्वर नगरपालिकामा रहेकाे फुटुङ गाउँमा मतदान गर्न लाइन लागेका मतदातालाई देख्न सकिन्छ । त्यो बेलासम्म फुटुङ गाउँ विकटप्राय: थियो ।

तपाईंका लागि यो भिडियो पनि..