२८ वर्ष पुरानो आफ्नो फोटो बुझेपछि भावुक भएकी राष्ट्रपतिले भनिन्- यसले मलाई पुराना दिनमा फर्काइदियो

२८ वर्ष पुरानो आफ्नो फोटो बुझेपछि भावुक भएकी राष्ट्रपतिले भनिन्- यसले मलाई पुराना दिनमा फर्काइदियो

राष्ट्रपति विद्यादेवी भण्डारीलाई तस्वीर हस्तान्तर गर्दै विकास रौनियार । साथमा विकासकी पत्नी चलचित्र निर्देशक सम्झना उप्रेती । तस्वीर : सुनिल बज्राचार्य/राष्ट्रपति कार्यालय

A+ A A-

फोटो पत्रकार विकास रौनियारलाई ९ साउन दिउँसो राष्ट्रपति कार्यालयबाट फोन आयो । अनि राष्ट्रपति विद्या भण्डारीले बोलाएको खबर पाए । खासमा उनले दुई महिनाअघि नै भेट्ने प्रयास गरे पनि राष्ट्रपतिबाट समय पाएका थिएनन् । उतैबाट कल आएपछि रौनियार ढिला नगरी तयार भए । र, १८x२४ साइजमा धुलाइएको तस्वीरलाई फ्रेममा हालेर उनी शीतल निवासतिर लागे । साथमा फिल्म निर्देशकसमेत रहेकी उनकी पत्नी सम्झना पनि थिइन् ।

राष्ट्रपति भण्डारीलाई रौनियार त्यही तस्वीर उपहारस्वरूप दिन खोजिरहेका थिए, जुन उनले तीन दशकअघि खिचेका हुन् । तस्वीरमा ३३ वर्षीया नेतृ भण्डारी ठूलो मासको अगाडि उभिएकी छन् । फोटो २०५० साल अन्तिमतिरको हो । पति मदन भण्डारीको निधनपछि काठमाडौं १ मा भएको उपचुनावमा कांग्रेसका तत्कालीन सभापति कृष्णप्रसाद भट्टराईविरुद्ध एमालेले मदनपत्नी विद्यालाई उठाएको थियो । त्यही बेला सिफलमा भएको चुनावी सभालाई सम्बोधन गरेर आफ्नो सिटमा फर्किरहेकी भण्डारीलाई विकासले आफ्नो मेनोल्टा एसआरटी १०१ क्यामेरामा कैद गरेका थिए ।

उक्त तस्वीर अघिल्लो शनिबार शिलापत्रको फोटोकार स्तम्भमा पनि छापिएको थियो । स्तम्भका लागि कुरा गर्दै रौनियारले राष्ट्रपति भण्डारीलाई आफूले फोटो उपहारमा दिन चाहेको बताएका थिए । विकासले भनेका थिए, ‘भेटको अवसर मिलेमा म उहाँलाई यो फोटो फ्रेमिङ गरेर दिनेछु ।’

त्यसको दुई दिनलगत्तै राष्ट्रपतिले बोलाएपछि रौनियारले शीतलनिवास पुगेर फोटो हस्तान्तरण गरेका हुन् । ‘मैले पहिल्यैदेखि भेट्न खोजेको थिएँ तर समय पाइरहेको थिइनँ । तर, साउन ९ गते आफ्ना सहयोगीमार्फत एक्कासि फोन गरेर राष्ट्रपतिले बोलाउनुभयो, म छक्क परेँ’, रौनियारले भने, ‘अन्ततः मैले उहाँलाई तस्वीर दिएँ ।’

भावुक भइन् राष्ट्रपति

रौनियारले राष्ट्रपतिलाई तस्वीर बुझाए । धन्यवाद दिँदै राष्ट्रपति भण्डारी भावुक भएकाे उनले सुनाए । त्यो फोटो यस्तो सन्दर्भमा खिचिएको थियो, जतिबेला उनले आफ्ना पति मदन भण्डारी गुमाएको केही महिना मात्रै भएको थियो ।

रौनियारले तस्वीर आफूले २०५२/०५३ सालतिर खिचेको बताए । तर, भण्डारीले तत्कालै उनलाई सच्याइदिइन्, ‘तपाईंले भुल्नुभएछ, यो तस्वीर त २०५० सालमा भएको उपचुनावको हो ।’

तस्वीरले आफूलाई २९ वर्ष पुराना दिनतिर फर्काइदिएकाे प्रतिक्रिया राष्ट्रपति भण्डारीले दिइन् । अनि केही बेर त्याे सन्दर्भका कुरा गरिन् । भण्डारीले त्यो समयमा आफूसित जोडिएका अरु तस्वीरहरू भए उपलब्ध गराइदिन आग्रह पनि गरिन् । व्यस्त समयका बाबजुद आफूसँग भण्डारीले २२ मिनेट भलाकुसारी गरेको रौनियारले बताए । 'कुराकानीका क्रममा राष्ट्रपतिले सम्झनासित नेपाली सिनेक्षेत्रको अवस्थाबारे पनि चासो राख्नुभयो', रौनियारले भने ।

जनताकी छाेरी विद्या नाराबीच खिचिएकाे तस्वीर

३ जेठ २०५० मा दास ढुङ्गा दुर्घटनामा परी एमाले नेता मदन भण्डारीको निधन भएको थियो । त्यसलगत्तै काठमाडौं निर्वाचन क्षेत्र नम्बर १ मा उपचुनाव भयो । कांग्रेसका उम्मेदवार थिए, पूर्वप्रधानमन्त्री एवं पार्टी सभापति कृष्णप्रसाद भट्टराई । एमालेले मदनपत्नी विद्यालाई उठाएको थियो । त्यो बेलासम्म विद्या अखिल नेपाल महिला संघको राजनीतिमा सक्रिय थिइन् । पति बितेपछि उनी मूल राजनीतिमा सक्रिय भइन् ।

शोकलाई शक्तिमा बदल्न एमालेले त्यो बेला ‘जनताकी छोरी विद्या भण्डारी’ नारासहित चुनावी अभियान चलाएको थियो । यस क्रममा काठमाडौंमा आमसभाहरू गरिँदै थिए । उपनिर्वाचनलक्षित आमसभा सिफलमा पनि भएको थियो । जसमा त्यतिबेलाका युवानेताहरू माधव नेपाल, प्रदीप नेपाल, मनमोहन अधिकारीलगायत सहभागी थिए ।

आमसभामा भाषण गरी आफ्नो सोफामा फर्किने बेलामा रौनियारले विद्याकाे फाेटाे मञ्चपछाडिबाट खिचेका थिए । सोही तस्वीर उनले तीन दशकपछि विद्यालाई बुझाए, जो अहिले दोस्रो कार्यकाल राष्ट्रपति बनेर देशको अभिभावकीय भूमिकामा छिन् ।

’म आफैँलाई पनि यो तस्वीर निकै मनपर्छ । सामान्यतः हामी अगाडिबाट खिच्छौँ । पछाडिबाट खिच्दा मास देखिए पनि अनुहार देखाउने मुमेन्ट पाइँदैन’, रौनियारले भने, ‘यो तस्वीर मैले स्टेजको पछाडिबाट खिचे पनि मास र वक्ताको मुहार प्रस्ट देखिन्छ । यसको कम्पोजिसन मलाई मनपर्छ ।’ उपचुनावमा तत्कालीन कांग्रेस सभापति एवं पूर्वप्रधानमन्त्री भट्टराईलाई विद्याले पराजित गरेकी थिइन् ।

सम्बन्धित समाचार