केपी ओली भन्छन्– एमालेको एकल बहुमत नआए देशले दुर्भाग्य भोग्नुपर्छ

A+ A A-

नेकपा एमालेका अध्यक्ष केपी शर्मा ओलीले आगामी निर्वाचन एमालेले नजिते देशले दुर्भाग्य भोग्नुपर्ने बताएका छन् ।

बुधबार काठमाडौं क्षेत्र नम्बर १ मा पार्टीका उम्मेदवार किरण पौडेलको प्रचार कार्यक्रमलाई सम्बोधन गर्दै अध्यक्ष ओलीले यसपटक एमालेबाहेकको राष्ट्रिय शक्ति जनताले बनाउनु नहुने बताए ।

उनले आगामी निर्वाचनमा एमालेलाई देशको राष्ट्रिय शक्ति नबनाए देशले दुर्भाग्य खेप्नुपर्ने उल्लेख गरे । ‘यसपल्ट एमालेबाहेक अर्को त्यस्तो राष्ट्रिय शक्ति छैन । देशका लागि राष्ट्रिय शक्ति निर्माण गर्न एकदमै जरुरी छ । अहिले राष्ट्रिय शक्ति बनाइएन र एमालेको एकल बहुमत आएन भने देशले दुर्भाग्य भोग्नुपर्छ,’ ओलीले भने ।

अध्यक्ष ओलीले अहिलेको सत्ता गबठन्धनले नै पुनः देशको नेतृत्व गरेको खण्डमा देशको विकास सम्भव नरहेको जिकिर गरे । उनले गठबन्धन सरकार सर्वोच्च अदालतको परमादेशबाट बनेको भन्दै जाली कीर्ते गरेर बनाइएको सरकारले निरन्तरता पाउनु नहुने बताए । उनले सर्वोच्च अदालतले प्रधानमन्त्री बनाउने हो भने संसद र निर्वाचनको अर्थ के हो ? भन्दै प्रश्नसमेत गरे । अध्यक्ष ओलीले परमादेश जारी गरेसँगै अदालतको अवस्था बेहाल भएको बताए ।

अध्यक्ष ओलीले विकासको मूल फुटाउने कामको नेतृत्व युवा र एमालेले गर्ने भन्दै एमालेको समर्थन गर्न आग्रह गरे । उनले देश बिगार्न नदिन एमालेमा नै भोट हाल्नुको विकल्प नरहेको उल्लेख गर्दै पुर्खाको बलिदानलाई लत्याउनु नहुने बताए ।