आचारसंहिताविपरीत विरोध खतिवडा र इन्द्र बानियाँले बाँडे पैसा

A+ A A-

सत्ता गठबन्धनबाट मकवानपुरको प्रतिनिधिसभा क्षेत्र नम्बर २ का उम्मेदवार विरोध खतिवडा र प्रदेशसभा सदस्य उम्मेदवार इन्द्रबहादुर बानियाँले १५–१५ हजार रुपैयाँ बाँडेको खुलासा भएको छ ।

नेकपा (एकीकृत समाजवादी)का खतिवडा प्रतिनिधिसभा र नेपाली कांग्रेसका बानियाँ प्रदेशसभा २ को (ख)बाट गठबन्धनका साझा उम्मेदवार छन् । उनीहरू दुवै जनाले आफ्नो निर्वाचन क्षेत्रभित्र पर्ने एउटा क्याम्पसका विद्यार्थीहरूलाई भ्रमणका लागि अग्रिम सहयोग रकम उपलब्ध गराएको खुलेको छ ।

मनहरी बहुमुखी क्याम्पसका विद्यार्थीहरूलाई खतिवडाले १५ हजार र बानियाँले १५ हजार रुपैयाँ उपलब्ध गराएको विद्यार्थीहरूले नै उल्लेख गरेका छन् । क्याम्पसको व्यवस्थापन संकायमा अध्ययनरत विद्यार्थीहरू भारतको दार्जिलिङ, सिक्कमलगायत क्षेत्रमा शैक्षिक अवलोकन भ्रमणका लागि जान लागेका हुन् ।

भ्रमणका लागि सहयोग उठाउने क्रममा खतिवडा र बानियाँले अनुरोध गरेअनुसार रकम दिएको विद्यार्थीहरूले बताएका हुन् । विद्यार्थीहरूले बानियाँ र खतिवडाको फोटो राखेर सामाजिक सञ्जालमा धन्यवाद दिएका छन् ।

नेपाली कांग्रेस मनहरी गाउँपालिका सभापति प्रकाश बर्तौलाको पहलमा खतिवडा र बानियाँले संयुक्त रूपमा मनहरी बहुमुखी क्याम्पसका विद्यार्थीलाई शैक्षिक अवलोकन भ्रमणका लागि नगद ३० हजार रुपैयाँ दिएको विद्यार्थीहरूले बताएका छन् ।

निर्वाचन आचारसंहिताअनुसार कुनै पनि उम्मेदवारले रकम बाँड्न पाउँदैनन् । राजनीतिक दल, उम्मेदवार तथा दलको भ्रातृ संगठनले पालना गर्नुपर्ने आचारणमा कुनै पनि क्लब, सामाजिक संस्था, धार्मिक संस्था, आमा समूह, गैरसरकारी संस्था, आश्रमजस्ता नगद तथा जिन्सी वितरण गर्न, अनुदान तथा आर्थिक सहायता, चन्दा, पुरस्कार दिन वा दिने घोषणा गर्न नहुने व्यवस्था छ । तर, खतिवडा र बानियाँले सत्ताको आडमा रकम बाँडेको आरोप लागेको हो ।

मकवानपुरका मुख्य निर्वाचन अधिकृत ऋषिराम निरौलाले घटनाका सम्बन्धमा निर्वाचन आयोगलाई जानकारी गराउने जानकारी दिए । निर्वाचन आचारसंहिता उल्लंघन गर्ने छुट कसैलाई नभएको भन्दै निरौलाले दोषी देखिए कारबाहीका लागि लेखेर आयोगमा पठाइने बताए ।

उम्मेदवार खतिवडाले आफूले आचारसंहिता उल्लंघन हुने गरी गतिविधि नगरेको बताए । विद्यार्थीहरूले शैक्षिक भ्रमण जाने भनेपछि साथीहरूबाट एक–एक हजार संकलन गरेर सहयोग गरेको खतिवडाले स्वीकारे । उक्त सहयोगलाई भात खाने बेलामा होटलमा पैसा तिरेको भन्दै चुनावी प्रयोजनका लागि नभएको दाबी गरे ।