प्रतिनिधिसभा र प्रदेशसभाको प्रत्यक्षतर्फको १ करोड मतपत्र छपाइ सकियो

A+ A A-

निर्वाचन आयोगले ४ मंसिरमा हुने प्रतिनिधिसभा र प्रदेशसभाको प्रत्यक्षतर्फको हालसम्म १ करोड २८ लाख ४९ हजार ५ सय मतपत्र छपाइ भएको जनाएको छ ।

प्रत्यक्षतर्फ ४ करोड मतपत्र छाप्ने तयारी गरेको आयोगले ३० प्रतिशत मतपत्र छपाइ सकेको हो । जसमा प्रदेशसभातर्फको ६४ लाख ३२ हजार ५ सय र प्रतिनिधिसभातर्फ ६४ लाख १७ हजार छपाइ भएको हो । १ करोड ७९ लाख ८८ हजार ५ सय ७० मतदाताका लागि पहिलो हुने निर्वाचित हुने निर्वाचन प्रणालीका लागि करिब ४ करोड र समानुपातिक निर्वाचन प्रणालीका लागि करिब ४ करोड मतपत्र आवश्यक पर्ने आयोगले जनाएको छ ।

पहिलो हुने निर्वाचित हुने निर्वाचन प्रणालीतर्फ २० जिल्लाको मतपत्र छपाइ सम्पन्न भएको छ । बुधबार प्रतिनिधिसभातर्फ अछाम, डोटी, कैलाली र कञ्चनपुर तथा प्रदेशसभातर्फ डोटी, डडेलधुरा र कैलाली जिल्लाको मतपत्र छपाइ तथा प्याकिङ भइसकेको छ ।

यसअघि सल्यान, डोल्पा, मुगु, जुम्ला, कालीकोट, हुम्ला, जाजरकोट, दैलेख, रुकुम पश्चिम, सुर्खेत, बाजुरा, बझाङ, डोटी, दार्चुला, बैतडी र डडेल्धुरा जिल्लाको मतपत्र छपाइ भएको छ । प्रदेशसभाका लागि पनि सल्यान, डोल्पा, मुगु, जुम्ला, कालीकोट, हुम्ला, जाजरकोट, दैलेख, रुकुम पश्चिम, सुर्खेत, बाजुरा, बझाङ, दार्चुला, बैतडी र अछाम जिल्लाको मतपत्र छपाइ भइसकेको छ ।

आयोगले आजदेखि सुदूरपश्चिम प्रदेशका जिल्लाहरूमा समानुपातिक निर्वाचन प्रणालीतर्फको मतपत्र ढुवानी सुरु गरेको छ । कैलाली, कञ्चनपुर, डोटी, डडेलधुरा, बझाङ, बैतडी, दार्जुलालगायतका जिल्लामा मतपत्र ढुवानी भएको छ । बागमती, मधेस र प्रदेश १ का जिल्लामा भने यसअघि नै मतपत्र ढुवानी भइसकेको छ ।