धनुषा २: चुनावी मैदानमा तीन पूर्वमन्त्री, कसले मार्ला बाजी ?

A+ A A-

सत्तारुढ गठबन्धनबाटै दुई जनाले उम्मेदवारी दिएपछि धनुषा क्षेत्र नम्बर २ को चुनावी भिडन्त रोचक बनेको छ । अझ उम्मेदवारमध्ये तीन जना पूर्वमन्त्री हुन् ।

सत्तारुढ गठबन्धनबाट कांग्रेसका पूर्वमन्त्री रामकृष्ण यादव र सत्तारुढ गठबन्धनबाटै नेकपा एकीकृत समाजवादीका नेता तथा पूर्वमन्त्री रामचन्द्र झा चुनावी मैदानमा उत्रिएका छन् । अन्य क्षेत्रमा एमाले–जसपाबीच गठबन्धन भए पनि यो क्षेत्रमा भने दुवै दल स्वस्थ प्रतिस्पर्धामा उत्रिएका छन् । जसपाबाट गंगाराम यादव र एमालेबाट पूर्वमन्त्री उमाशंकर अरगरियाले उम्मेदवारी दिएका छन् ।

सत्ता गठबन्धनका अधिकारिक उम्मेदवार भने कांग्रेसका रामकृष्ण यादव हुन् । सत्ता गठबन्धनबाट धनुषा २ को प्रदेश 'क' मा लोसपाबाट सञ्जय साह र 'ख' मा माओवादी केन्द्रबाट श्यामसुन्दर यादव उम्मेदवार छन् । यसैगरी नेकपा एसले प्रतिनिधिसभामा झा तथा प्रदेशसभा सदस्यमा 'क' बाट शैलेन्द्र यादव र 'ख' बाट रामनारायण साहलाई उम्मेदवार बनाएको छ । सो क्षेत्रमा आफ्नो पार्टीले कसैसँग गठबन्धन नगरेको झाले बताउँदै आएका छन् ।

चुनावको मुखमा लोसपा छोडर एमाले प्रवेश गरेका उमाशंकर अरगरिया र टिकटकै लागि एमाले परित्याग गरी जसपा छिरेका गंगाराम यादव एक्लाएक्लै चुनावी मैदानमा उत्रेका छन् । एमालेबाट प्रदेशसभाको 'क' बाट लखन दास र 'ख' बाट सञ्जीव झाले उम्मेदवारी दिएका छन् भने जसपाबाट 'क' मा शैलेन्द्र यादव र 'ख' बाट रामअशिष यादव चुनावी मैदानमा छन् ।

जसपाबाट प्रदेशमा उम्मेदवार बनेका यादवद्वय २०७४ सालको चुनावमा प्रदेशसभा सदस्यमा निर्वाचत भएका थिए । उनीहरू दुवै तत्कालीन संघीय समाजवादी फोरमबाट प्रदेशमा र प्रतिनिधिसभामा उमंशकर अरगरिया निर्वाचित भएका थिए । अरगरिया यो पटक एमालेबाट उम्मेदवार बनेका छन् ।

स्थानीय तहको मतपरिणामलाई आधारमा मान्ने हो भने यो क्षेत्रमा कांग्रेस अगाडि छ । दोस्रोमा एमाले र तेस्रोमा जसपा देखिएको छ । यो क्षेत्रमा कांग्रेसका यादवलाई लोसपा र माओवादी केन्द्रको समर्थन छ ।

एकीकृत समाजवादीबाट उम्मेदवार बनेका झा २०७० र २०७४ सालको चुनावमा पराजित भएका थिए । त्यसअघि भने उनी दुईवटा निर्वाचनमा यही क्षेत्रबाटै झा निर्वाचित भएका थिए । यसपटक उनले जनताले आफूलाई सहानुभूतिको मत पाउने आशा राखेका छन् ।

कांग्रेसबाट उम्मेदवार बनेका यादव दुई पटक मन्त्री र एक पटक सार्वजनिक लेखा समितिका सभापतिमा भएका नेता हुन् । यादव २०७४ सालको निर्वाचनमा तत्कालीन संघीय समाजवादी फोरमका अरगरियासँग पराजित भएका थिए ।यादवले मन्त्री हुँदा आफूले क्षेत्रमा गरेको विकास र गठबन्धनको सहयोगमा चुनाव जित्ने दाबी गरेका छन् ।

२०७४ सालको निर्वाचनमा विजयी भएका एमालेका अरगरिया भने फेरि राम्रो मतान्तरका साथ निर्वाचित हुने विश्वासमा छन् । 'अघिल्लो पटक पार्टीको संगठन नै नहुँदा पनि जनताले जिताए,' अरगरियाले भने, ‘यसपालि पार्टीको राम्रो संगठन छ । पटक-पटक मन्त्री भएकाहरूले भन्दा बढी काम गरेको छु । जनताले त्यसको मूल्यांकन गरेर मतदान गर्छन् ।’

तर, एमालेका पुराना नेता गंगाराम यादव जसपाबाट उम्मेदवार भएकाले मत बाँडिने सम्भावना पनि उतिकै छ । जसपाका उम्मेदवार यादवले भने जनताले विश्वास गरेर यसपटक आफूलाई जिताउने बताउँछन् ।

२०७४ सालको निर्वाचनमा अरगरियाले ३२ हजार ४४ मत पाउँदा रामचन्द्र झाले १८ हजार ७१५ र रामकृष्ण यादवले १५ हजार ४४२ मत पाएका थिए ।

प्रकाशित मिति: शुक्रबार, असोज २८, २०७९ १५:२२