ओली–लिङ्देन तालमेलले झापाका पाँचै क्षेत्रमा सत्ता गठबन्धनलाई छैन सहज

A+ A A-

ठूला दलहरू कांग्रेस र एमालेले अन्य दलहरूको सहायतामा छुट्टा-छुट्टै गठबन्धन बनाएपछि ४ मंसिर हुने प्रदेश र प्रतिनिधिसभाको चुनाव थप रोचक बन्ने देखिएको छ । कांग्रेस नेतृत्वमा पाँचदलीय गठबन्धन छ भने एमाले नेतृत्वमा अर्काे गठबन्धन छ । स्थानीय तहकाे चुनावका आधारमा देशभर सत्ता गठबन्धन अग्रस्थानमा देखिँदा एमाले अध्यक्ष केपी शर्मा ओलीकाे गृह जिल्ला झापामा भने तस्वीर उल्टाे छ ।

झापामा पाँचदलीय सत्ता गठबन्धनभन्दा एमाले-राप्रपा गठबन्धन बलियाे देखिन्छ । यता मधेस प्रदेशमा सत्तारुढदलसँग गठबन्धन गरेको लोकतान्त्रिक समाजवादी पार्टी र एमालेसँग गठबन्धन गरेको जनता समाजवादी पार्टीले झापामा छुट्टा-छुट्टै उम्मेदवार उठाएका छन् ।

झापाका ५ वटै निर्वाचनमा क्षेत्रमा स्थानीय तहमा वडाअध्यक्षलाई आएको मतको आधारमा एमाले-राप्रपा गठबन्धन अघि देखिन्छ ।

झापा शीर्ष नेताको निर्वाचन क्षेत्र भएको जिल्ला हो । यही जिल्लाका निर्वाचन क्षेत्रबाट नेकपा एमालेका अध्यक्ष केपीशर्मा ओली, राप्रपाका अध्यक्ष राजेन्द्र लिङदेन, कांग्रेसका वर्तमान र पूर्व महामन्त्री क्रमश: विश्‍वप्रकाश शर्मा र कृष्ण प्रसाद सिटौलाको उम्मेदवारी रहेको छ ।

नेताको प्रभाव र जिल्लामा निभाएको भूमिकाका कारण ४ मंसिरकाे चुनावमा ती उम्मेदवारले पाउने मत फरक पर्न सक्छ । तर ५ महिना अगाडि भएकाे स्थानीय तहकाे चुनावमा दलका उम्मेदवारले पाएकाे मतले केही संकेत भने गर्छ । त्यसैले यहाँ स्थानीय तहकाे चुनावमा वडाध्यक्षका उम्मेदवारले पाएकाे मतकाे विश्लेषण गरिएकाे छ । यसकै आधारमा पाँच निर्वाचन क्षेत्र रहेकाे झापामा एमाले-राप्रपाको गठबन्धन सत्तागठबन्धनमाथि बलियो देखिन्छ ।

स्थानीय तहको निर्वाचनमा झापा जिल्लामा सत्ता गठबन्धनमा रहेका कांग्रेस, माओवादी केन्द्र, नेकपा एकीकृत समाजवादी र लोकतान्त्रिक समाजवादी पार्टीका वडाध्यक्षका उम्मेदवारलाई आएको मत एक लाख ६७ हजार रहेको छ । त्यस्तै एमालेका वडाध्यक्षका उम्मेदवारले पाएकाे मत लाख ६१ हजार रहेको छ भने राप्रपाका वडाध्यक्ष उम्मेदवारले ४९ हजारभन्दा बढी मत पाएका थिए ।

झापा ५

झापा ५ मुख्य चासोको निर्वाचन क्षेत्रमध्ये एक हो । यहाँबाट एमाले अध्यक्ष केपी शर्मा ओलीले उम्मेदवारी दिएका छन् भने उनीसँग चुनावी मैदानमा सत्ता गठबन्धनकाे सहयाेगमा कांग्रेस उम्मेदवार खगेन्द्र अधिकारी लगायतका छन् ।

सबैभन्दा पहिले यो निर्वाचन क्षेत्रमा स्थानीय तहका वडाअध्यक्षमा आएको मत हेरौँ

राप्रपा + एमाले ‌‌= ३८ हजार २५
सत्ता गठबन्धन = २४ हजार ६ सय ४३
एमाले एक्लै ‌= ३१ हजार
कांग्रेस एक्लै ‍= १३ हजार ६ सय

अब विजयी वडा अध्यक्ष हेरौँ ।

वडा २१
अन्य १
कांग्रेस ४
एमाले १४
माओवादी/एस २

यो कोर्णबाट पनि ओली बलियो देखिन्छन् । तर, यहाँ अहिलेको मतदाता संख्याका दृष्टिकोणले स्थानीय तहको निर्वाचनमा वडाअध्यक्षमा खसेको सदर मत निकै कम छ । यहाँ १ लाख ५४ हजार बढी मतदाता रहेकोमा वडाअध्यक्षमा सदर मत भने ६७ हजार मात्रै रहेको छ । तर, अघिल्लो निर्वाचनमा जितेका उम्मेदवारका लागि विगतमा गरेको कामको प्रभाव भने जनताले मूल्यांकन गर्न सक्ने हुन्छ । ओलीले निर्वाचन क्षेत्रमा गरेको काम र अथवा गर्न नसकेको कामको प्रभाव पर्नेछ भने राष्ट्रिय रुपमा लिएका निर्णयले पनि अर्थ राख्‍न सक्छ ।

झापा : १

झापा १ मा कांग्रेस, माओवादी केन्द्र, नेकपा एकीकृत समाजवादी र जनमोर्चाको साझा उम्मेदवार कांग्रेस महामन्त्री विश्‍वप्रकाश शर्माले उम्मेदवारी दिएका छन् ।

यता एमाले-राप्रपाको तर्फबाट पूर्व-महान्याधिवक्तासमेत रहेका एमाले नेता अग्निप्रसाद खरेल उम्मेदवार बनेका छन् ।

निर्वाचन आयोगका अनुसार झापा १ मा १ लाख २० हजार ३७५ जना मतदाता रहेका छन् । ३० वैशाखमा भएको स्थानीय तहको निर्वाचनमा यो निर्वाचन क्षेत्र पर्ने वडाहरूका वडाअध्यक्षका लागि करिब ७१ हजार मत खसेको छ । जसमध्ये एमाले र राप्रपाका उम्मेदवारलाई ३७ हजार १५४ मत आएको छ भने सत्ता गठबन्धनका उम्मेदवारलाई २९ हजार ३ सय ७८ मत आएको छ । यो मतको हिसाबले भने शर्मा करिब ८ हजार मत पछि देखिन्छन् ।

त्यस्तै विजयी भएका वडाअध्यक्षको संख्या हेर्ने हो भने पनि यो क्षेत्रमा पर्ने २१ वटा वडामध्ये १३ वटा एमालेले जित्दा कांग्रेसले ६ वटा र माओवादीले एउटा मात्रै जितेको छ ।

शर्माले नेतृत्व गर्ने गठबन्धनका दलमध्ये कांग्रेसको मात्रै २४ हजार ५९ मत रहेको छ भने खरेलले नेतृत्व गर्ने गठबन्धमा एमालेको मात्रै ३१ हजार २३२ मत रहेको छ ।

यद्यपि मतदाता संख्याको हिसावले वडाअध्यक्षमा सदर भएको मत करिब ४५ हजार कम देखिन्छ । यसर्थ बदर मत घटेको र मतदान गर्नेको संख्या बढेको अर्थमा भने फरक नतिजा देखिन पनि सक्छ । त्यस्तै नेता विशेष प्रभाव पनि देखिन सक्छ ।

झापा: २

जम्मा मतदाता = १,३४,०९१
वडाअध्यक्षमा सदर मत = ५१,१८५
एमले-राप्रपा गठबन्धन = २६,२०२
सत्ता गठबन्धन = २३,७०६
एमालेको एकल मत = २२,७२४
माओवादी एकल मत ‍= ८५०

झापा २ मा एमाले र राप्रपाको तर्फबाट एमालेका देवराज घिमिरे उठेका छन् भने सत्ता गठबन्धनको तर्फबाट माओवादी केन्द्रका हरिकुमार राना मगर उम्मेदवार रहेका छन् ।

स्थानीयत तहको वडाअध्यक्षमा आएको सदर मत प्रदेश तथा प्रतिनिधिसभामाको मतदाता संख्या भन्दा ५० प्रतिशत कम देखिन्छ । मतदान गर्ने संख्या वृद्धि भएमा र सदर मत बढ्दा निर्वाचन नतिजा प्रभाव यहाँ पनि पर्ने देखिन्छ ।

त्यस्तै एमालेको मतका हिसावले धेरै अघि देखिए पनि विजयी वडाअध्यक्षको हिसाबले भने कांग्रेस अघि देखिन्छ । यो निर्वाचन क्षेत्रमा पर्ने १६ वटा वडाअध्यक्ष मध्ये ९ वटा कांग्रेसले र ७ वटा एमालेले जितेको छ ।

झापा: ३

झापा ३ मा गठबन्धनको तर्फबाट कांग्रेसले पूर्व महामन्त्री कृष्णप्रसाद सिटौलालाई उठाएको छ । यता राप्रपा र एमालेको तर्फबाट राप्रपाका अध्यक्ष राजेन्द्र लिङ्देन उम्मेदवार रहेका छन् ।

यी दुई गठबन्धनमध्ये राप्रपा-एमालेको गठबन्ध करिब १० हजार मतले अघि देखिन्छ । यो मत स्थानीय तहको वडाअध्यक्षमा आएको सदर मतको हिसाबले हो ।

राप्रपा र एमालेको वडाअध्यक्षमा आएको मत ४२ हजार २ सय ४२ छ भने सत्ता गठबन्धनको ३२ हजार ८ सय ७५ छ । यो मतले सिटौलालाई निकै चुनौती देखिन्छ ।

राप्रपा र कांग्रेसमा आएको एकल मतलाई हेर्ने हो भने कांग्रेस ३ हजार मतले अघि देखिन्छ । कांग्रेसका वडाअध्यक्षले साढे २४ हजार मत ल्याउँदा राप्रपा उम्मेदवारले २१ हजार मत ल्याएका छन् । यहाँ अर्को चाख लाग्दो विषय एकल पार्टीको वडाअध्यक्षमा आएको मतका आधारमा कांग्रेस पहिलो, राप्रपा दोस्रो र एमाले तेस्रो रहेका छन् ।

यता यो निर्वाचन क्षेत्रमा अहिले मतदाता संख्या १ लाख ३१ हजार पुग्दा वडाअध्यक्षमा आएको सदर मत भने ७८ हजार २ सय ६३ मात्रै रहेको छ ।

झापा ४

वडाअध्यक्ष‍ = ३०
कांग्रेस= १३
एमाले = १३
माओवादी= २
अन्य ‍= २

स्थानीय तहमाको निर्वाचनमा वडाअध्यक्षमा विजयी उम्मेदवारको संख्याको हिसाबले सत्ता गठबन्धन अघि देखिन्छ । दुई गठबन्धनको मताअन्तर पनि त्यति फरक नदेखिए पनि अगाडि भने राप्रपा-एमालेकाे गठबन्धन नै रहेकाे छ । राप्रपा-एमालेका वडाअध्यक्षको उम्मेदवारलाई ८१ हजार ७ सय २८ सदर मतमध्ये ३८ हजार ५२ मत आएकाे छ भने सत्ता गठबन्धनलाई ३७ हजार ९४ मत आएको छ ।

यो निर्वाचन क्षेत्रमा एमालेले २०७४ को निर्वाचनमा निर्वाचित एलपी सावा लिम्बुलाई उठाउँदा कांग्रेसले देउकुमार थेवेलाई उठाएको छ ।

यहाँ कांग्रेस र एमालेको एकल मतको आधारमा कांग्रेसभन्दा एमाले ४ हजार मतले अघि देखिन्छ । एमालेको वडाअध्यक्षको मत ३३ हजार रहदाँ कांग्रेसको २९ हजार छ । तर स्थानीय तहमा वडाअध्यक्षमा भएको सदर मत साढे ६७ हजार मात्रै हुँदा अहिलेको मतदाता संख्या १ लाख २३ हजार रहेको छ ।

प्रकाशित मिति: बिहीबार, असोज २७, २०७९ २१:३१