माओवादी केन्द्रमा टिकट वितरण असन्तुष्टि, आधा दर्जनभन्दा बढी स्थानमा बागी उम्मेदवार

माओवादी केन्द्रमा टिकट वितरण असन्तुष्टि, आधा दर्जनभन्दा बढी स्थानमा बागी उम्मेदवार

A+ A A-

नेकपा माओवादी केन्द्रका उपमहासचिव हरिबोल गजुरेलको टिकट शुक्रबारसम्म फिक्सजस्तै थियो । उनी सिन्धुली क्षेत्र नं. २ बाट चुनाव जित्दै आएका थिए । उनी संसदीय राजनीतिमा सिन्धुलीबाट जित्ने नेतामा पर्छन् ।

उनको विकल्पमा सिन्धुलीबाट पदाधिकारीमा पनि कोही छैनन् । तर, शनिबार राति नै उनको टिकट खोसियो । उनको टिकट खोसिएको उनले आइतबार बिहान मात्र थाहा पाए ।

गजुरेलको ठाउँमा जिल्ला संयोजक राजन दाहालले टिकट पाए । दाहालले आफ्नो टिकट खोसेपछि गजुरेल पार्टी अध्यक्ष पुष्पकमल दाहालदेखि टिकट खोस्ने राजनसँग असन्तुष्ट छन् । ‘मलाई टिकट दिएन । अहिले जिल्लामै छु । जसले टिकट पाए पनि माओवादीले नै पाएको छ । सबै मिलेर जिताउनुपर्छ’, उनले भने । आफू पनि जिताउन लाग्ने गजुरेलले बताए ।

माओवादी केन्द्रकै सचिव सुरेन्द्र कार्कीले पनि अन्तिम समयमा आएर टिकट पाएनन् । २०७४ सालमा झापा क्षेत्र नं. १ मा वाम गठबन्धनबाट चुनाव जितेका थिए । कार्कीले योपटक पनि सोही क्षेत्रबाट चुनाव लड्ने तयारी गरेका थिए । सत्ता गठबन्धनमा जसले जुन क्षेत्र जितेको छ, त्यही क्षेत्र उक्त दललाई दिने सामान्य सहमति भएको पनि थियो । तर, कांग्रेसका महामन्त्री विश्वप्रकाशले पनि उक्त क्षेत्रबाट नै चुनाव लड्ने भएपछि कार्कीलाई टिकट दिइएन ।

अध्यक्ष प्रचण्डले अडान नलिइदिँदा आफूले टिकट नपाएको उनको बुझाइ छ । आफूले पहिला जितेको ठाउँ पनि माओवादी अध्यक्षले बचाउन नसकेको भन्दै कार्की असन्तुष्ट बनेको उनीनिकट नेता बताउँछन् ।

उसो त कार्कीले झापाबाट टिकट नपाए ओखलढुङ्गाबाट टिकट पाउने चर्चा चलेको थियो । तर ओखलढुङगामा पनि भागवण्डामा कांग्रेसको भाग परेको छ ।

प्रचण्डले झापा– २ बाट चुनाव लड्न अफर गरे पनि पहिला जितेको क्षेत्रबाट पाए चुनाव लड्ने, नत्र नलड्ने भनेपछि झापा– २ बाट एमाले छाडेका हरि रानालाई माओवादीले उम्मेदवार बनाएको छ । रानालाई टिकट दिएपछि स्थानीय रूपमा माओवादी कार्यकर्ता पनि त्यति खुसी नरहेको बताइन्छ । यो क्षेत्रबाट माओवादीकी धर्मशिला चापागाईं टिकटको दाबेदार थिइन् ।

रोल्पामा प्रदेशसभामा ‘ख’बाट दीपेन्द्रकुमार पुन मगर (सिजल)ले स्वतन्त्र उम्मेदवारी दिएका छन् । सत्ता गठबन्धनमा भागवण्डा गर्दा रोल्पा संघ र प्रदेश ‘क’ माओवादीको भागमा परेको थियो भने प्रदेश ‘ख’ कांग्रेसका भागमा परेको थियो । तर, माओवादीले सधैँ जित्दै आएको जिल्ला भनेर छोड्न मानेको थिएन । तर अन्तिममा कांग्रेसको भागमा परेपछि माओवादीका नेता पुनले स्वतन्त्र उम्मेदवारी दिएका छन् । नेतृत्वले गरेको भागवण्डा चित्त नबुझेपछि पुनले बागी उम्मेदवारी दिएको बताएका छन् ।

उता दैलेखमा अन्तिम समयमा माओवादी केन्द्रबाट २ नं क्षेत्रको प्रदेश ख बाट टिकट पाएका उपेन्द्र राउतको टिकट खोसियो । माओवादी केन्द्रले उनको टिकट नेकपा एमाले छाडेका नेता योगेन्द्र शाहीलाई दियो । आफ्नो टिकट खोसिएपछि रावत भने असन्तुष्ट बने । उनले आफ्नो टिकट अन्तिम समयमा आएर खोसेपछि सामाजिक सञ्जालमा लेखेका छन्, ‘जालझेल र षड्यन्त्रपूर्ण ढंगले गरिने कुनै पनि निर्णय मान्य हुन सक्दैन ।’

यता मकवानपुर क्षेत्र नम्बर २ (ख) मा गठबन्धनविरुद्ध नेकपा माओवादी केन्द्रका नेताले बागी उम्मेदवारी दर्ता गरेका छन् । सत्ता गठबन्धनमा यो प्रदेशसभा नेपाली कांग्रेसको भागमा परेको हो । जसमा कांग्रेसले बागमती प्रदेशसभापति इन्द्रबहादुर बानियाँले उम्मेदवार बनाएको छ ।

बानियाँविरुद्ध माओवादी मकवानपुरका जिल्ला समन्वय समिति सदस्य तथा माओवादीनिकट चेपाङ राष्ट्रिय मुक्ति मोर्चाका केन्द्रीय महासचिव तथा बागमती प्रदेश अध्यक्ष खुसीराम चेपाङले उम्मेदवारी दिएका हुन् ।

चेपाङले माओवादीको प्रभाव रहेको क्षेत्रमा प्रत्येकपटक कांग्रेसलाई मात्र अवसर दिने तानाशाह स्वभावका पार्टीका केही नेतृत्वको हात रहेको भन्दै स्वतन्त्र उम्मेदवारी दिएको बताए । उनले पार्टीको निर्वाचन क्षेत्र भागवण्डा गरेको चित्त नबुझेकाले बागी उम्मेदवारी दिएको बताएका छन् ।

काठमाडौंका संघमा ३ सिट पाएको नेकपा माओवादी केन्द्रले १० नम्बर क्षेत्रमा बेग्लै उम्मेदवारी दिएको छ । सिट बाँडफाँटमा असन्तुष्टि जनाउँदै काठमाडौं १० मा प्रतिनिधिसभातर्फ निवर्तमान सांसद तथा पोलिटब्युरो सदस्य अञ्जना विसंखे गठबन्धनका साझा उम्मेदवार कांग्रेसका राजन केसीविरुद्ध उम्मेदवारी दर्ता गराएकी छन् । त्यस्तै, प्रदेशतर्फ क मा दिलीप महर्जन र ख मा गणेश कुँवरले उम्मेदवारी दर्ता गराएका छन् ।

भागवण्डामा चित्त नबुझेकाले आफूहरूले उम्मेदवारी दर्ता गराएको माओवादी केन्द्रका काठमाडौं जिल्ला इन्चार्ज कुमार पौडेलले बताए । उनले भने, ‘हामीलाई भागवण्डा मन परेन । त्यही भएर १० नं. क्षेत्रमा संघ र प्रदेशमा उम्मेदवारी दिएका छौँ । उम्मेदवारी नेतृत्वको सल्लाहमा दिएका हौँ । बागी होइनाैँ पार्टीको आधिकारिक उम्मेदवार हुन् ।’

रुपन्देही– १ माओवादी केन्द्रको भागमा परेको थियो । माओवादी केन्द्रले घनश्याम भुसाललाई समर्थन गरेपछि माओवादीभित्रै असन्तुष्टि बढेको छ । शनिबार मात्र एमाले त्यागेका भुसालले सत्ता गठबन्धनको सहयोगमा स्वतन्त्र उम्मेदवारी दर्ता गराएका छन् ।

माओवादीबाट यो क्षेत्रमा लेखनाथ न्यौपाने, मकसुद अली, शिव धवललगायत युवाहरू टिकटको आकांक्षी थिए । पहिले ओनसरी घर्तीलाई उम्मेदवार बनाउन खोजिएको थियो । तर, भुसालले एमालेबाट टिकट नपाएपछि प्रचण्डले उनलाई नै समर्थन गर्ने भन्दै माओवादीका कुनै पनि नेतालाई टिकट दिएनन् ।

भुसालले ‘माओवादीको चुनाव चिह्नबाट लड्दिनँ’ भन्दै स्वतन्त्र उम्मेदवारी दर्ता गराएपछि माओवादीभित्र झन् असन्तुष्टि बढेको छ । पार्टी नेतृत्वले माओवादीमा उम्मेदवारै नभएजस्तो गरी घनश्यामलाई उम्मेदवार बनाउने निर्णय गलत भएको एक स्थानीय नेता बताउँछन् । ती नेताले भने, ‘भुसाललाई भोट हाम्रो चाहिने, चुनाव चिह्नमा लड्न भने लाज मान्ने, अनि कसरी भोट माग्नु ? भोट माग्ने जाँगर नै छैन ।’

कास्की क्षेत्र नम्बर ३ मा माओवादीकी एक कार्यकर्ताले बागी उम्मेदवारी दर्ता गराएकी छन् । पार्टीले गण्डकीका अर्थमन्त्री रामजी बराललाई गठबन्धनको तर्फबाट उम्मेदवार बनाएपछि अनिता भुर्तेलले बागी उम्मेदवारी दिएकी छन् । उनी माओवादीको शहीद परिवारकी सदस्य हुन् ।

उनका बुबा राजविक्रम भुर्तेल र आमा सीता भुर्तेल युद्धकालमा मारिएका थिए । माओवादीमा ठूला नेताहरूदेखि जिल्लास्तरका नेताहरूमा टिकट वितरणलाई लिएर असन्तुष्टि रहेको एक केन्द्रीय सदस्यले बताए ।

प्रकाशित मिति: सोमबार, असोज २४, २०७९ १५:१८