बालुवाटारमा सत्ता गठबन्धनकाे बैठक जारी, जसपा अनुपस्थित

A+ A A-

४ मंसिरको चुनावका लागि सिट र निर्वाचन क्षेत्रको बाँडफाँटमा सहमति खोज्न सत्ता गठबन्धनको बैठक अहिले प्रधानमन्त्री निवास बालुवाटारमा बसिरहेको छ । सत्ता गठबन्धनको बैठकमा जनता समाजवादी पार्टी जसपा भने अनुपस्थित भएको छ ।

जसपा सत्ता गठबन्धन छाडेर प्रमुख विपक्षी दल नेकपा एमालेसँग तालमेलको प्रयासमा छ । एमाले नेताहरूले आजै एमाले–जसपा तालमेलको सहमतिमा हस्ताक्षर हुने दाबी गररिहेका छन् ।

जसपाले एमालेसँग चुनावी तालमेलका लागि हात बढाएपछि सत्तारुढ पाँचदलीय गठबन्धन भत्किने सम्भावना बढेर गएको छ । बिहीबार प्रधानमन्त्री निवास बालुवाटारमा सत्ता गठबन्धनको बैठक छोडेर जसपा अध्यक्ष उपेन्द्र यादव एमाले अध्यक्ष केपी शर्मा ओलीलाई भेट्न पुगेका थिए । यादव बालुवाटारबाट निस्केपछि गठबन्धन बैठक बिनानिष्कर्ष टुंगिएको थियो ।

मिल्दैछन् ओली-यादवका हात, सत्ता गठबन्धन भत्किने सम्भावना प्रवल

स्रोतका अनुसार एमाले र जसपाको चुनावी तालमेल निष्कर्षनजिक पुगेको छ । २२ वटा क्षेत्रमा एमालेले जसपालाई सघाउने मोटामोटी सहमति जुटेको छ । सत्ता गठबन्धनले भने जसपालाई बढीमा १५ सिट दिन सकिने गरी छलफल गरेको थियो ।

जसपाले यसमा असन्तुष्टि जनाउँदै सम्मानजनक सिट नपाए गठबन्धनबाट अलग हुने घोषणा यसअघि नै गरेको थियो ।जसपा र एमालेका शीर्ष नेताहरू तालमेलको सहमतिलाई अन्तिम रूप दिन आज पनि बैठक बस्दैछन् । एमाले–जसपा तालमेलको सम्भावना बढेर गएपछि सत्ता गठबन्धनका नेताहरू अलमलमा परेका छन् ।

४ मंसिरमा हुने प्रतिनिधि र प्रदेशसभा निर्वाचनको प्रत्यक्ष निर्वाचन प्रणालीतर्फ उम्मेदवारको मनोनयन पत्र दर्ता गर्न दुई दिन मात्र बाँकी छ । निर्वाचन आयोगले तय गरेको निर्वाचन कार्यक्रमअनुसार यही असोज २३ गते उम्मेदवारको मनोनयन पत्र दर्ता र मनोनयन पत्रको सूची प्रकाशन गर्ने कार्यक्रम छ ।

असोज २४ गते उम्मेदवारको विरोधमा उजुरी दिने तथा असोज २४ देखि २५ गतेसम्म मनोनयनपत्र र उजुरीमाथि जाँचबुझ गरी निर्णय गर्ने तालिका छ । यस्तै असोज २५ गते उम्मेदवारको नामावली प्रकाशन गर्ने र असोज २६ गते उम्मेदवारको नाम फिर्ता लिने तथा उम्मेदवारको अन्तिम नामावली प्रकाशन गर्ने एवम् उम्मेदवारलाई निर्वाचन चिह्न प्रदान गर्ने गरी तोकिएको छ ।

समानुपातिक निर्वाचन प्रणालीतर्फ यही असोज २० गतेदेखि २२ गते ३ बजेसम्म उम्मेदवारी फिर्ता लिएको कारणबाट रिक्त हुने स्थानमा सोही समूहले अर्को उम्मेदवारको मनोनयन गरी सम्बन्धित राजनीतिक दलले आयोगमा पेस गर्ने निर्वाचन कार्यक्रम छ ।

यस्तै असोज २२ गते उम्मेदवारको बन्दसूचीको सूचना प्रकाशन गर्ने, असोज २३ गतेदेखि २९ गतेसम्म बन्दसूचीमा नाम समावेश भएका उम्मेदवारको योग्यतासम्बन्धी दाबी विरोधको निवेदन दिने, असोज ३० गते दाबी विरोधको निवेदनमाथि जाँचबुझ र निर्णय लिने, कात्तिक ८ गते बन्दसूचीबाट उम्मेदवारको नाम हटेको सूचना प्रकाशन गर्ने तथा कात्तिक ९ गते उम्मेदवारको बन्दसूची अन्तिम रूपमा प्रकाशन गर्ने कार्यक्रम छ ।

प्रकाशित मिति: शुक्रबार, असोज २१, २०७९ १०:५०