ह्याट्रिकपछि अञ्जन भन्छन्- विगतमा के भयो सम्झिन चाहन्नँ

नेपाल र बंगलादेशबीच मङ्गलबार साँझ दशरथ रङ्गशालामा भएको अन्तरराष्ट्रिय मैत्रीपूर्ण फूटबल खेलमा वंगलादेशलाई तीन गोल गर्न सफल खेलाडी अन्जन विष्ट खेलपछि सेल्फी लिँदै । तस्वीरः रत्न श्रेष्ठ/रासस

A+ A A-

मंगलबार नेपालले अन्तर्राष्ट्रिय मैत्रीपूर्ण फुटबलमा बंगलादेशलाई ३–१ गोलअन्तरले पराजित गर्न सफल भयो । नेपालको जितमा अञ्जन विष्टले ह्याट्रिक गोल गरे । राष्ट्रिय टिमबाट करिअरकै पहिलो ह्याट्रिक गोल गरेका अञ्जन खेलपछि निकै भावुक बने ।

दशरथ रंगशालामा भएको खेलमा नेपाली फुटबल टिमले उत्कृष्ट प्रदर्शन गर्‍यो । सबैको नजरमा अञ्जन परे । आफ्नो फुटबल करिअरमा धेरै उतावचडाव आएको बताउँदै उनले भने, ‘म विगतमा के भयो सम्झिन चाहन्नँ । जे भयो भयो । यस्तै कारणले गर्दा झनै बलियो भइँदो रहेछ ।’

उनले आफ्नो गोल सम्पूर्ण नेपाली समर्थकलाई सुम्पिन चाहेको पनि बताए ।

हुन त, अञ्जन विष्टको करिअरमा धेरै उताबचडाव आयो । विश्वकप छनोटअन्तर्गत कुवेतविरुद्धको खेल खेल्न जानुअघि ‘डिस्को काण्ड’को कारण अञ्जनसहित चार खेलाडी प्रतिबन्धमा परेका थिए । मुख्य प्रशिक्षक अब्दुल्ला अल्मुताइरीले कप्तान किरण चेम्जोङसहित ११ खेलाडीलाई टिमबाट निकाल्दा अञ्जन पनि परेका थिए । अब त्यो नराम्रो क्षणलाई सम्झिन नचाहेको र आउँदो दिनमा त्यसले झनै बलियो बनाएको उनले प्रस्ट्याएका हुन् ।

विमल घर्तिमगरको फ्रिकिकमा खेलको १८औँ मिनेटमा अञ्जनले हेडर गोल गर्दै नेपाललाई १–० गोलको अग्रता दिलाए । खेलको २७औँ मिनेटमा अञ्जनले गोल गर्दै २–० को अग्रता बनाए । खेलको ३८औँ मिनेटमा गोल गर्दै अञ्जनले ह्याट्रिक पूरा गरे ।

अञ्जन राष्ट्रिय टिमबाट ह्याट्रिक गर्ने छैटौं खेलाडी

यो ह्याट्रिक उनको राष्ट्रिय टिमबाट पहिलो हो । अञ्जन नेपाली राष्ट्रिय फुटबल टिमबाट ह्याट्रिक गर्ने खेलाडीहरूमा छैटौँ स्थानमा पर्छन् । यसअघि गणेश थापा, नरेश जोशी, निराजन रायमाझी, भरत खवास र नवयुग श्रेष्ठले राष्ट्रिय टिमबाट ह्याट्रिक गरेका छन् ।

अञ्जनले राष्ट्रिय टिमबाट १० गोल गरेका छन् । उनले ४९ खेलमा १० गोल गरेका छन् । नेपाली राष्ट्रिय फुटबल टिमबाट निराजन रायमाझी र हरि खड्काले समान १३–१३ गोल गरेका छन् । अनिल गुरुङ र भरत खवासले समान १०–१० गोल राष्ट्रिय टिमबाट गरेका छन् ।

आफूले पाएको अवसरलाई गोलमा परिणत गर्दै जित दिलाएका अञ्जन आफूले यति गोल गर्छु भन्दा पनि टिमको लागि खेल्ने गरेको बताए । ‘यो एउटा खेल मात्र थिएन । धेरै लामो समयपछि राष्ट्रिय झण्डा ओड्न पाए । खुसी छु । म शब्दमा बयान गर्न सक्दिनँ,’ अञ्जन भावुक हुँदै भन्छन् ।

नेपालको जस्तोसुकै अवस्थामा पनि आफू टिमको लागि खेल्न तयार रहेको पनि उनले भने ।

यता, कार्यबाहक मुख्य प्रशिक्षक प्रदीप हुमागाईंले खेलाडीको एकरुपताको कारण जित सम्भव भएको बताए । उनले भने, ‘खेलाडीमा विश्वास थियो । सबैले एकरुपताको साथ खेले । हामीले जित्यौँ ।’