राष्ट्रपतिले राजीनामा दिनुको अर्को विकल्प छैन: शान्ति समाज

A+ A A-

मानवअधिकार तथा शान्ति समाजले राष्ट्रपति विद्यादेवी भण्डारीले राजीनामा दिनुपर्ने बताएको छ ।

शान्ति समाजले संसदका दुवै सदनबाट पारित भएर नागरिकता विधेयकलाई प्रमाणीकरण नगर्ने राष्ट्रपतिले राजीनामा दिनुको विकल्प नरहेको बताएको हो ।

'संसदबाट पारित विधेयकमा राष्ट्रपतिको असहमति भए त्यस्तो अवस्थामा एकपटक पुनर्विचारका लागि संसदमा फिर्ता पठाउन सक्ने संवैधानिक अधिकार राष्ट्रपतिले प्रयोग गरिसक्नु भएको छ भने संसदका दुवै सदनबाट पुन पारित भइसकेको अवस्थामा राष्ट्रपतिले त्यसलाई प्रमाणीकरण गर्नु या राष्ट्रपति पदबाट राजीनामा दिनुबाहेक उहाँसँग अर्को विकल्प रहँदैन,' शान्ति समाजले भनेको छ ।

बिहीबार शान्ति समाजका अध्यक्ष गोविन्द खनालले विज्ञप्ति जारी गरी राष्ट्रपति संवैधानिक दायित्वबाट विमुख भएको बताएका छन् । 'संसदका दुवै सदनबाट पारित भई आएको विधेयकलाई संविधान अनुरुप प्रमाणीकरण गर्नुपर्ने दायित्वबाट राष्ट्रपति विद्यादेवी भण्डारी विमुख हुनु आपत्तिजनक छ,' विज्ञप्तिमा भनिएको छ ।

संसदीय सर्वोच्चतालाई चुनौती दिँदै विधेयकलाई प्रमाणीकरण नगर्ने राष्ट्रपति भण्डारीको कदम संविधान र लोकतन्त्र विरोधी भएको विज्ञप्तिमा उल्लेख छ ।

राष्ट्रपति पदको दुरुपयोग गर्दै संवैधानिक मर्यादा विपरीत मोर्चाबन्दी गर्ने र राज्यको संवेदनशील निकायलाई विवादमा तान्न खोज्ने राष्ट्रपति भण्डारीको आचरणप्रति पनि शान्ति समाजले आपत्ति जनाएको छ ।

'राष्ट्रपति भण्डारीको संविधान विरोधी यो कृत्यको सम्बन्धमा संवैधानिक मर्यादाको सीमाभित्र रहेर न्यायिक हल खोज्न पनि सरकार र जिम्मेवार राजनीति दलहरूलाई आग्रह गर्दछ,' विज्ञप्तिमा भनिएको छ, 'राष्ट्रपति भण्डारीको असंवैधानिक कदमको विरोध गर्ने नाममा कुनै पनि असंवैधानिक अभ्यास र अराजकतालाई बढावा दिने काम सरकारले गर्नु हुँदैन ।'

शान्ति समाजले उपराष्ट्रपति नन्दबहादुर पुनले उपराष्ट्रपति पदको मर्यादा र गरिमा विपरीत गरेको टिप्पणीप्रति पनि आपत्ति जनाएको छ ।

प्रकाशित मिति: बिहीबार, असोज ६, २०७९ १३:३४