सन् २०२३ मा ४.७ प्रतिशतको मात्रै आर्थिक वृद्धिदर हुने एडीबीको प्रक्षेपण

A+ A A-

एसियाली विकास बैंक (एडीबी) ले सन् २०२३ मा नेपालको आर्थिक वृद्धिदर ४.७ प्रतिशतमा सीमित हुने प्रक्षेपण गरेको छ ।

एडीबीले बुधबार सार्वजनिक गरेको 'एसियन डेभलपमेन्ट आउटलुक २०२२' मा नेपालको आर्थिक वृद्धि सन् २०२२ को तुलनामा सन् २०२३ मा अझ घट्ने प्रक्षेपण गरेको हो । सार्वजनिक प्रतिवदेनमा सन् २०२४ मा नेपालको वैदेशिक मुद्राको सञ्चितिमा अझ गिरावट आउने र मुद्रास्फ्रितिमा थप दबाब पर्ने जनाइएको छ।

सरकारले आयात नियन्त्रणका लागि अपनाउने आवश्यक औजारका कारण अर्थतन्त्रको वृद्धि खुम्चिने जोखिम बढ्ने देखिएको प्रतिवदेनमा उल्लेख छ । आयात नियन्त्रणसँगै आन्तरिक उत्पादन र उपभोगसमेत घट्ने जोखिम इंगित गर्दै एडिबीले यस्ता गतिविधिले सन् २०२३ मा नेपालको आर्थिक वृद्धिलाई नकारात्मक प्रभाव पार्ने बताएको छ ।

प्रतिवेदनले कडा मौद्रिक नीतिका कारण नेपालको कुल गार्हस्थ्य उत्पादन प्रभावित हुने भन्दै निर्यातमा जोड दिनुपर्ने सुझाव प्रतिवेदनमा दिइएको छ । 'कोभिड-१९ महामारीपछिको लकडाउन, डेंगी ज्वरोको प्रकोपलगायतले नेपालको स्वास्थ्य प्रणालीलाई कमजोर बनाइदिएको छ भने विभिन्न प्राकृतिक प्रकोपबाट समेत जोखिम ब्यहोर्नुपरिरहेको छ । यसैगरी भूराजनीतिक अवस्थाले पनि नेपालको आर्थिक वृद्धिलाई कमजोर बनाउनेछ,' नेपालका लागि एडीबीका कन्ट्री डाइरेक्टर आनो कुस्वाले भने ।

प्रतिवेदनमा मनसुन राम्रै भएकाले नेपालको कृषिक्षेत्रको वृद्धि हुने सम्भावना देखिए पनि रासायनिक मल अभावले धानको उत्पादनलाई प्रभावित तुल्याउने उल्लेख छ । प्रतिवेदनले सेवा क्षेत्रमा पनि गिरावट आउने बताएको छ । कर्जा नियन्त्रण तथा ब्याजदरमा भएको उच्च वृद्धिले रियल स्टेट, थोक तथा खुद्रा व्यापार गतिविधिमा पनि सुस्तता देखिने उल्लेख छ ।

आगामी निर्वाचनले भने संघ तथा प्रदेशस्तरमा चुनावी खर्चलाई बढावा दिने हुँदा त्यसले जीडीपीको वृद्धिमा सहयोग पुग्ने उल्लेख छ । प्रतिवदेनमा मुद्रास्फ्रिति सन् २०२३ मा थोरै घट्ने बताइएको छ । सन् २०२२ मा ६.३ प्रतिशत रहेकोमा सन् २०२३ मा थोरै घट्ने प्रक्षेपण गरिएको हो ।

प्रकाशित मिति: बुधबार, असोज ५, २०७९ १६:५७